Read Grebo, Northern Wlɛ̀velesɔ̌n 20 Bible Online

Wlɛ̀velesɔ̌n 20 - Grebo, Northern bible

Wlɛ̀velesɔ̌n 20

¹È Ě jěa najiǒpòi tɔ̀ɔ ɔ̌ sonwɛaě jɔkɛn mǒ, ɔ blěa bǐtìe fòɛǒ see mɔ̀ kɔn ɛɛ gbàadɛ̌ kwa, chěen fòe neaě ɔ kwete mǒ.

²Ɔ kmea dɔsmɛǒ ɔ̈ moo smɛ dakǎ ɔ̈ kɔn nynɛ̌ moo kǔ ɔ̀ɔ̌ Setɛ̀n, ɔ̌ nua chěen ɔ̌ pìnʼa nɔ klě jlěe taslěwae wlòmo.

³Ɔ tuǔnʼaě kǔǒ klě bǐtìe fòɛǒ wan ɔ̌ poa ɛ kɔ̀ɔbuǒ je plě ɔ̌ mǎnaǒ slii bo ɛ̈ di ɛɛ numa ɔɔ̌ diaa kɛ̀ dakwɛ̌ mǒ boo lo de ɛ mǐa ɛ kpa kpa jlěe taslěwaeǒ ɛ mǐa dlǒ chlɛ̀. Jlěǒ bǐ sìnʼǎ, ɔ kɔn bɔ jleeǎ bo klě tǐ gbei wlòmo.

⁴È Ě jěa klɔ̀ba gbèsɛi ï nyopò neaa kɛn ble ü kpě nyeea bü tùaa blilǐ. Ě jěa nyopòà uu sìsi ü u bɛ̌aa dlě jele keǒ Jùsuu sàse dɛ nunuɛ tè mɔ̀ klee Nyesoaa win boɔboɔ tè. U sea nmiǒ ɔ klee ɔɔ sùsu tuu wɛ̀ sà plě u sea ɔɔ mǎkpee blě keǒ uu jigbàa gblee wnana mǒ klee keǒ uu son kɛn. Nù sɔnaě kǒla mǒ ü klee Tentǎn Jǔ kɔna win kwa klě jlěe taslěwaeǒ wlòmo.

⁵Dɛǒ nɛ̀ moo nyane je měne duduɛ̌, kɛɛ kokǒ nyo tùuǒ siaǒo u sea je měne dǔ ɛ mǐǎ ɛ kpa kpa jlěe taslěwaeǒ ɛ mǐǎ dlǒ chlɛ̀.

⁶Nyopòǒ miěe klekle je měne duduɛ̌ wakǎ jleě mǒ kɔnma u kɔn ngmna plě ǔ ne ngmà je. Sɔ̌n nenɛ kokoɛ̌ seǒ u kpě dlǒ mǒ kɔn. Nù mi Nyesoa klee Tentǎn Jǔu kpatòapoo mooma plě u klee Tentǎn Jǔ miǒ tàa do win kwa kɔnʼɔ no klě jlěe taslěwaeǒ wlòmo.

⁷Bɛ̌ nu jlěe taslěwaeǒ bɛ̌ chlɛ̀ dlǒ, Setɛ̀n mi wùlo sàeba,

⁸ɔ mǐ mu ɔ mǐ dakwɛ̌ mǒ boo lo klě kmɔ̌ wùɛà mɔ̀, jà deě fòee sɔ̌nʼǒ moo Kɔɔ̀ klee Makɔɔ̀. Ɔ mi u le bòba keǒ to kɛn mumuɛ mɔ̀, u mi fòba, u slě slèslɛ wɔ̀ba mu wòje jbǒo mǐsiɔ̌ ɛ̈ neǒo jbǒ wien.

⁹È u mi chì toba u mǐ kmɔ̌à dlǒ bo tù klee u mǐ Nyesoaa nyopòo diě dǐ tbɛɛ le ɛ̈ Nyesoa noɛɛ mǒ, kɛɛ na miě jɔkɛn mǒ sɔnma nɛ̀ mi u gbè sùeba.

¹⁰È kǔǒ boo uu mǒ ɔ miě na wulǒ mǒ pooba ɛ̈ jǐi wnewne seɛ̌ jele, klě tàa doǒ nmiǒ ɔ klee sen le tmɔ̌ wnɔsàɔǒ u pooa lěe. Klě u miě nema u mǐ tu kɛn tùu lu tǒn klee chnɛ̀ ke ɛ mii jleě mǒ bo tonma.

¹¹È Ě jěa klɔ̀ba gbèsɛɛ plǔ fòɛ Nyu tɔ̀ɔ neaǒ ɛ kɛn bo. Blǒ klee jɔ fǎna keǒ Ɔ jemǒ, nyu ně jěa li de.

¹²È Ě jěa kokǒ nyo, jà nyeflabutupò klee nyopòà kɔn tè kuun, uu wùɛ ǔ nynanaǒ klɔ̀ba gbèsɛɛǒ jemǒ bo. È chněenoǎa tìeǒ neaǒo ì knaea je, è chněedɛ̌ tɛ̀ɛ ɛ̈ moo fònfno chněedɛ̌ ɛ̀ knaea je, kokǒ nyoǒ uu blilǐ tùua wòje dɛ wùɛ u nuaa ɛ̈ chleěa lěe chněenoǎǒ wlòmo.

¹³Jbǒ sàla ɛ blěe kokǒ nyo tàmo ü koǒaě ɛɛ mɔ̀, Kokoɛ̌ klee kokǒ nyoo blǒ ü dɛɛ Hedì i sàla i blěe kokǒ nyo tàmo. È u pea uu do do ǔ tùia u blilǐ wòje dɛ uu nyu wùɛ nuaa.

¹⁴Dɛ tɛ̀ɛ kɛnaǒo nɛ̀ moo Kokoɛ̌ klee Hedì pooaě na wulǒ mǒ. Wulǒǒ nɛ̀ nynaǒ sɔ̌n nenɛ kokoɛ̌ pènmo bo.

¹⁵Bɛ̌ nu nyuu nynɛ̌ bɛ̌ sea chleě le klě fònfno chněedɛ̌ǒ wlòmo, na wulǒǒ nɛ̀ kɔn mǒ u tunwiǐaě ɔ.