Read Grebo, Northern Wlɛ̀velesɔ̌n 5 Bible Online

Wlɛ̀velesɔ̌n 5 - Grebo, Northern bible

Wlɛ̀velesɔ̌n 5

¹È Ě jěa chněedɛ̌à u plǎlaa nɛ̀ neaě Nyuǒ neaǒo klɔ̀ba gbèsɛɛǒ kɛn bo Ɔɔ dilǎ son mǒ ɛ̈ kɔn wakěe sɔ̌n wùɛ u chlěaa kɛn le plě ü poaa sluu kpɛɛ nyiɛta je.

²Plě Ě jěa kpě kɛne najiǒpòi ɔ̌ pea sàe ɔ je, “Mɔ blɛɛ leě kɛ je keǒ bò sàǎ chněedɛ̌à sluuà jele?”

³Kɛɛ ɛ sea nyu kɔn klě jɔkɛn klee kělɔ kmɔ̌ mɔ̀ klee kělɔ blǒ bobo ɔ̈ wɔ̀laa je bɔ̈ knanaa plaplǎ chněedɛ̌ǒ je ɔ̈ mǐa ɛɛ slè.

⁴Tà ɛ tùu nyu wùɛ sea tà ne ɔ̈ blɛɛa lɛɛ je keǒ bɔ̈ knanaa chněedɛ̌ǒ je ɔ̈ mǐa lɛɛ slè, è mǒǒ fìnʼa wɔle fìɛn chɔɔ.

⁵È kě kunkunyɔɔ do tɔ̀ɔ dǎlaǎ je ɔ je, “Ma wien, bɔ̌ fìnfiɛn, tanà le, ɛ kɔn Sà Fòɛ Ɔ̈ sɔn lěe dakɔ̌ǒ moo Jùdǎ slè mǒ, Ɔ sɔnʼě klɔ̀ba Dèběsee jlǔ slè mǒ, Nɔ̀ du ɛmo toǒ Ɔ̈ wɔ̀le je Bɔ̈ sàǒ sluu kpɛɛ nyiɛtaǒ chněedɛ̌ǒ je Bɔ̈ kna ɛ je.”

⁶È Ě jěa Blajǔ Ɔ̈ wǒ dɛ u dbǎlaa, Nɔ̀ nynanaǒ klɔ̀ba gbèsɛɛǒ ɛɛ slè bo ɛ̈ kmɔ̌ ne soaa hɛ̀n klee kunkunyoǒ u tbɛɛa dǐ. Ngmèe nyiɛta nì neaǒ Ɛ dlǒ klee jǐi nyiɛta ï nynanaǒo Nyesoaa Sìsii nyiɛta pènmo bo ï Ɔ dboo kělɔ kmɔ̌ wùɛɔ mɔ̀,

⁷Nɛ̀ mua Ɛ̈ dǔa plaplǎ chněedɛ̌ǒ mǒ Ɛ̈ sàlaě ɛ Nyuǒ neaǒo klɔ̀ba gbèsɛɛǒ kɛn bo Ɔɔ dilǎ son mǒ.

⁸Tà Ɔ dǔa ɛ mǒo, è kmɔ̌ ne soaa hɛ̀n klee kunkunyoo wlò tùo hɛ̀nʼǒ è nìǒ kɔ kwne bo keǒ Blajǔǒ jemǒ. Uu wùɛ u blěa kwa le kanǐkàe plě klò fui neaě u kwete mǒ ï sonsnǒ noǎa jǐaa je ï nynaǒo pènmo bo Nyesoa nyoo bàtea keǒ Nyesoa mɔ̀.

⁹U blea wlɛ̌ jajlo, è kě uu wlɛ̌ win dɛ̌a ɛ̈ moo, “Mò ɛ blɛɛ je Bɔ̈ dǔ ɛmo plaplǎ chněedɛ̌à mǒ Bɔ̈ sà ɛ sluu wùɛǒ jele. Mɛ kɔɔ̌n tèǒ joo nɛ̀ moo u dbǎlaà le, è Nè nymɔǒ nɛ̀ nù È tɔ̀n nyopò keǒ Nyesoa mɔ̀ ü sɔnʼɔ blǒ wùɛ kɛn mǒ plě ü pee winʼi doědoe plě ü sɔnʼɔ dakwɛ̌ wùɛ mɔ̀ měne klee tùonyopoo doědoe wùɛ.

¹⁰Plě È nu u klɔ̀bapoo mǒ klee bodiɔpò keǒ bu nu äa Nyesoaa konkwa bu kɔn kmɔ̌à win kwa.”

¹¹Tà Ě keaǒo le tɛn, Ě wɔ̌na najiǒpò fòfoaa win ü tbɛɛaa klɔ̀ba gbèsɛɛǒ dǐ klee soaǒ plě klee kunkunyoǒ, uu wùɛ u nua taslěwɛ klee mǐniɔwɛ

¹²ǔ jɛɛ̌aě win ǔ blea, kě uu bleble win dɛ̌a ɛ̈ moo, “Blajǔà u dbǎlaa Nɔ̀ blɛɛ ɛ je bu nye kpěǒ klee pònpanʼa doědoe, tɔ̀n plě kpě klee tùtuɛ klee tè jǐ boaboǎ plě de bìsea!”

¹³Ě wɔ̌na noǎ wùɛ ï neaa kmɔ̌ ii win klě jɔkɛn klee kělɔ blǒ mɔ̀ klee klě blǒ bobo plě noǎǒ neěe jbǒ mɔ̀ ǐ blea, kě i dɛ̌ i je, “Keǒ Nyuǒ neǒo klɔ̀baa gbèsɛɛǒ kɛn bo mɔ̀ plě keǒ Blajǔǒ mɔ̀, nɛ bo de bìsea klee bo tùtuɛ klee tè jǐ boaboǎ plě klee kpě bi kɔnʼǒ Ɔ mɔ̀ ke ɛ mii jleě mǒ bo tonma!”

¹⁴È soaa hɛ̀nʼǒ kě i dǎla i je, “Kě bɛ ne!” È kunkunyoo wlò tùo hɛ̀nʼǒ u kɔla kwne bo ǔ sàla Blajǔu wɛ̀ klee Nyuǒ neaǒo gbèsɛɛǒ kɛn bo.