Read Grebo, Northern Wlɛ̀velesɔ̌n 8 Bible Online

Wlɛ̀velesɔ̌n 8 - Grebo, Northern bible

Wlɛ̀velesɔ̌n 8

¹Tà Blajǔ sàla lěe sluu nyiɛta nenɛǒ, è klě jɔkɛn dě poaě kpee ɛ̈ sìnʼaa àwɔ bɔ̀tie dlǒ mǒ.

²È Ě jěa najiǒpòo nyiɛta ǔ nynanaǒ Nyesoa jemǒ bo ǔ nyea u nokpee nyiɛta.

³È najiǒpòi tɔ̀ɔ diaě ɔ̌ nynanaǒ chɔ̀no tògbee kǒngmàǒ wakǎ mǒ bo, klò jagbee neaě ɔ kwete mǒ ɛ̈ u pee sonsnǒ noǎa fòfoa wan ï bɔ̈ siɛnaa, i klee Nyesoaa nyopòo bàtea miiaǒ tàa do keǒ klò chɔ̀no tògbeǒ ii kǒngmà kɛn ɛ̈ neaǒo klɔ̀ba gbèsɛɛ jemǒ.

⁴Sonsnǒ noǎaǒ ii nǎno klee Nyesoa nyoo bàtea nì sonwɛaě najiǒpòiǒ kwete mǒ ï jɛ̌a jɔ mǒ klě Nyesoa mɔ̀.

⁵Dɛ tɛ̀ɛ ɔ nuaa nɛ̀ moo ɔ dǔa jagbeeǒ mǒ ɔ̌ jiěa ɛ nàkne jele ï sɔnaěe kǒngmà kɛn mǒ, nì ɔ tuǔnʼa nɔ kmɔ̌ɔ mɔ̀, è tɛ̀n pnǎna ne ɛ̌ kwlia ɛ̌ ngmněa plě blǒ sèkea.

⁶È najiǒpòo nyiɛtaǒ ü blěaa nokpee nyiɛtaǒ ü wɛ̀a le mɔ̀ keǒ bu bea li.

⁷Tà klekle najiǒpòiǒ ɔ bea ɔɔ nokpa, chɛn kpěn fòe klee na ɛ̈ chìseeaa nymɔ nì u tunwiǐa lɔ wɔ̀ɔn le kělɔ blǒ mɔ̀, ii tè blǒà ɛɛ wakǎ peǎn fòɛ sinʼa klee tii wakǎ peǎn fòɛ sinʼa klee tii wakǎ peǎn fòɛ klee kwlǎ jajle wùɛ.

⁸Tà sɔ̌n nonɔ najiǒpòiǒ ɔ bea ɔɔ nokpa, è dɛ tɛ̀ɛ ɛ̈ wǒaa togbee fòɛ na sosǒ wneaěe mǒ nɛ̀ u tuǔnʼaě jbǒ mɔ̀, nɛ̀ nua nɛ jbǒo wakǎ peǎn fòɛ nua nymɔ sosǒ.

⁹Smì fòfoa kǒa klě jbǒǒ mɔ̀. Ně kɛn mea fòfoa nymia jǐ le.

¹⁰Tà tan nonɔ najiǒpòiǒ ɔ bea ɔɔ nokpa, è jɔtnàe fòɛ ɛ̈ kɔn wnewnɛ niaa blàublàu wòje wnewne slè nɛ̀ bloaě jɔ mǒ ɛ̈ nymiia neǎ fòfoa klee něe chlolǎi fòfoa jǐ le.

¹¹Jɔtnàeǒ ɛɛ nynɛ̌ mooa Wan Nonɔ̌a, ɛ nua nɛ neǎ fòfoa nonɔ̌a wan, è nyopò fòfoa nǎna ni ǔ kǒa.

¹²Tà hɛ̀n nonɔ najiǒpòiǒ ɔ bea ɔɔ nokpa, è wɛnʼɛ wakǎ peǎn fòɛ klee sòbaee wakǎ peǎn fòɛ klee jɔtnè fòfoa nì tbaea dɛ, ii tè ii peěnʼǒ i bɔ̌a fonfɔn. Nɛ̀ nua nɛ chnɛ̀ jlǒ waě sea pepě kɔn klě àwɛɛ hɛ̀n wlòmo klee tǒn jlǒ waě sea pepě kɔn klě àwɛɛ hɛ̀n wlòmo.

¹³Ě keaǒ le tɛn, è Ě wɔ̌na kee wonwan klě jɔtùwle mǒ ɔ̌ pnɛ̌a le ɔ je, “Bo najiǒpòo tanʼǒ siǒo bǔ be u blěe nokpeǒ, a jě ke ɛ mii jǐlenymi dɛ tùtu numa ne keǒ nyopòà neɔɔ kmɔ̌ mɔ̀. Ɛ mi jǐlenymi dɛ tùba keǒ u mɔ̀!”