Read Northern Oaxaca Nahuatl San Mateo 26 Bible Online

San Mateo 26 - Northern Oaxaca Nahuatl bible

San Mateo 26

¹Nijkuak in Jesús otlanke okijtoj nochi in yon tlajtole, okinmilwij imomachtijkawan:

²―Namejwan ya ankimatij, nik sa ome tonale poliwi para yen ilwitl itoka pascua. Iwan Nej katlej onimochij nitlakatl nechtemaktiskej (nechtemaktiliskej) para nechmajmasoltiskej itech krus.

³Itech yonmej tonaltin in tlayekankej tiopixkej, iwan tlamachtijkej de itlanawatil in Moisés iwan tlayekankej tetajtzitzintin judiojtin, omololojkej kan patio de yen palacio kan chanti in weyi tiopixke itoka Caifás.

⁴Ompa omotlapowijkej para kitemoskej kenik kikitzkiskej in Jesús ika itlaj tlakajkayawalistle para ijkón welis kimiktiskej.

⁵Pero okijtoayaj: ―Mach tikitzkiskej itech ilwitl, para amo kualaniskej in tlakaj iwan yomoniskej. Se siwatl okiteekilij ajwiakayotl in Jesús ipan itzontekon

⁶Jesús oyeka itech pueblo de Betania, ichan Simón, katlej Jesús okipajtij nijkuak opalania inakayo.

⁷Ijkuakón se siwatl omijkuanij inawak Jesús katlej okitkia se boteyajtzin de alabastro tentok de ajwiakayotl katlej patíoj, iwan okiteekilij in Jesús ipan itzontekon kan oewatoka itech mesa.

⁸Nijkuak imomachtijkawan ijkón okitakej, okualankej iwan okijtojkej: ―¿Tlanik yin siwatl san okawiltij in ajwiakayotl?

⁹Porke welini monamakani patíoj, iwan se kinmakani in tomin katlej pobrestin.

¹⁰Jesús okikakke, iwan okinmilwij: ―¿Tlanik anmokuejsoaj inawak yin siwatl? Porke kuale tlan okichij.

¹¹In pobrestin nochipa ankinpiaskej, pero Nej mach nochipa annechpiaskej.

¹²Yin siwatl nijkuak onechteekilij ajwiakayotl itech notlalnakayo, kijtosneki okiyektlalij notlalnakayo para nijkuak nimotookas.

¹³Ipan melajka namechilwia, ke ik nowian (nian nepa) ixko yin tlaltikpak kan motematiltis in tlajtole katlej temakixtia, noijki se kitemakas kuenta de tlan okichij in yin siwatl iwan ijkón se kelnamikis. Judas okitemaktij (okitemaktilij) in Jesús

¹⁴Ijkuakón se imomachtijkaw itoka Judas Iscariote de yen majtlaktle iwan omen momachtijkej, oyáj omotlapowito inwan tlayekankej tiopixkej

¹⁵iwan okinmilwij: ―¿Kech annechmakaskej tla namechmaktilis in Jesús? Tonses yejwan okilwijkej kimakaskej senpoale iwan majtlaktle tomin de plata.

¹⁶Iwan desde ijkuakón Judas opéj kitemoa kenik welis kinmaktilis in Jesús. Tiotlakantlakuale de toSeñor

¹⁷Nijkuak opéj in ilwitl de pascua yakin se tonale, nijkuak mokua in pan katlej mach kipia levadura, ijkuakón imomachtijkawan Jesús omijkuanijkej inawak, iwan okitlajtlanijkej: ―¿Kan tikneki ma tikyektlalitij in tiotlakantlakuale de pascua para tikmomajsewis?

¹⁸Yej okinmilwij: ―Xiwian itech weyikan de Jerusalén, ichan se tlakatl katlej iwan yonimotlapowij iwan xikilwikan: “In Tlamachtij kijta: Yoajsiko noora, moneki mochan nikmomajsewis in tiotlakantlakuale de pascua iwan nomomachtijkawan.”

¹⁹Imomachtijkawan okichijkej ijkón ken okinnawatij in Jesús, iwan okiyektlalijkej in tiotlakantlakuale de pascua.

²⁰Nijkuak otlatleyuak, Jesús omotlalij itech mesa inwan majtlaktle iwan omen imomachtijkawan.

²¹Iwan nijkuak otlakuajtokaj, Jesús okinmilwij: ―Ipan melajka namechilwia, nik se de amejwan nechtemaktis (nechtemaktilis).

²²Yejwan sa tekitl omoyolkokojkej, iwan opéj kitlajtlaniaj kada se de yejwan: ―Señor, ¿kox yen nej?

²³Jesús okinnankilij: ―Katlej kajakia ipan ijtik plato kan Nej noijki nikajakia nopan, yen yon katlej nechtemaktis (nechtemaktilis).

²⁴Nej katlej onimochij nitlakatl nimikis ijkón ken kijta in tiotlajkuilole. Pero ¡pobre in tlakatl katlej nechtemaktis! Okachi kuale mach tlakatini yon tlakatl.

²⁵Ijkuakón okitlajtlanij in Judas, katlej kitemaktis, iwan okilwij: ―Tlamachtij, ¿kox yen nej? Jesús okinankilij: ―Aján, tej meroj.

²⁶Mientras otlakuajtokaj, Jesús okitilanke in pan, iwan omotlasojkamatke inawak Dios, satepan okipojpostekke in pan iwan okinmajmakak imomachtijkawan, iwan okinmilwij: ―Xikkuakan. Yin yen notlalnakayo.

²⁷Ijkuakón okitilanke in kopa, iwan omotlasojkamatke inawak Dios, satepan okinpanoltilij imomachtijkawan, iwan okinmilwij: ―Xikonikan yin kopa aminochtin.

²⁸Yin yen noeso, katlej yankuik akuerdo, katlej toyawis para ijkón miekej tlapojpolwiloskej de intlajtlakol.

²⁹Pero namechilwia, ke desde axan mach ok nikonis iayo uvas asta nekáj tonale nijkuak amowan nikonis iayo uvas yankuik katlej onkaj kan noPapan tlanawatia. Pedro okijtoj mach kixmati in Jesús

³⁰Satepan de okitlakuikakej se tiotlakuikale, oyajkej ipan Olivostepetl.

³¹Iwan ijkuakón Jesús okinmilwij: ―Namejwan aminochtin annechkajtewaskej noselti yin yuak, porke in tiotlajkuilole kijta: “Nikmiktis in tlajpixke iwan ichkamej xixiniskej.”

³²Pero satepan de nimoyolkuis (nimoyolitis), Nej sa nitlayekanas para Galilea iwan satepan namejwan ompa annechitajsij.

³³Ijkuakón Pedro, okilwij: ―Maski nochtin ma mitzkajtewakan, nej mach nimitzkawas.

³⁴Tonses Jesús okinankilij: ―Ipan melajka nimitzilwia nik yin yuak, antes de tzajtzis in kaxtil, ijkuakón tej yotikijtoj eyi buelta nik mach tinechixmati.

³⁵Iwan Pedro okilwij: ―Maski mowan ma nechmiktikan, nej mach keman nimitzkawas. Iwan nochtin imomachtijkawan no ijkón okijtojkej. Jesús omotiotzajtzilij kan tlatokkuawyoj itoka Getsemaní

³⁶Ijkuakón Jesús okinwikak imomachtijkawan se lugar tlatokkuawyoj itoka Getsemaní, iwan okinmilwij: ―Nian ximotlalikan, mientras Nej niawi nimotiotzajtziliti ik ne.

³⁷Okiwikak in Pedro iwan omen ipilwan in Zebedeo, iwan Jesús opéj sa tekitl mosentiroa iwan opéj moyolkokoa sa tekitl.

³⁸Ijkuakón Jesús okinmilwij: ―Nikmachilia itech noanima ya niixpoliwi de neyolkokole. Nian ximokawakan xiijsatokan nowan.

³⁹Jesús oyáj ok achitzin ik tlayakapan, ompa omotlankuaketzke asta okitennamikke in tlale, iwan omotiotzajtzilij okijtoj: ―Papan, in tla welis, xinechkixtili in yin tekokojkayotl. Pero amo ma mochiwa ken Nej nikneki, sino ken tejwatzin tikmonekiltia.

⁴⁰Ijkuakón Jesús omokuepke kan oyekaj eyin imomachtijkawan, iwan okinmajsitajsik kochtokej. Iwan okilwij in Pedro: ―¿Amo ankixikojkej nion se ora anmijsatokej nowan?

⁴¹Xiijsatokan iwan ximotiotzajtzilijtokan, para amo ma amechmayawi in tlajtlakole. Namoespíritu kineki kichiwas tlan kuale, pero namotlalnakayo mach tlaxikoa.

⁴²Jesús oyáj ipan ojpatian omotiotzajtzilito, iwan omotiotzajtzilij ijkín: ―Papan, tla amo welis nimakisas de itech yin tekokojkayotl, tonses ma mochiwa kiné tlan tejwatzin tikmonekiltis.

⁴³Oksemi omokuepke kan oyekaj imomachtijkawan, iwan oksemi okinmajsitajsik kochtokej, porke inpan omopachoj in kochilistle.

⁴⁴Oksemi okinkajtej, iwan oyáj omotiotzajtzilito ya eyi buelta, iwan oksemi okijtoj tlan achtoj okijtoj.

⁴⁵Satepan oyáj kan oyekaj imomachtijkawan, iwan okinmilwij: ―Axan keman xikochikan iwan ximosewikan. Yoajsik ora, Nej katlej onimochij nitlakatl ya nechtemaktiskej (nechtemaktiliskej) inmak in tlakaj tlajtlakolejkej.

⁴⁶Ximewakan, ma tiwian. Yompa witz katlej nechtemaktis. Jesús okikitzkijkej

⁴⁷Jesús ok otlapojtoka nijkuak oejkok in Judas, katlej oyeka se de yejwan majtlaktle iwan omen imomachtijkawan, okualinwikaya miekej tlakaj kiwalkuij espada iwan kiwalkuij kuawitl. Yinmej tlakaj okualintitlankej in tlayekankej tiopixkej iwan tlayekankej tetajtzitzintin judiojtin.

⁴⁸Pero in Judas antes de kinmaktilis in Jesús, achtoj okinmilwij in tlakaj kenik kinmititis. Okinmilwij: ―Katlej nej nikixpipitzos, yen yon Jesús. Xikitzkikan iwan xikwikakan.

⁴⁹Satepan in Judas omijkuanij inawak Jesús iwan okijtoj: ―¡Noltij Tlamachtij! Iwan okixpipitzoj.

⁵⁰Iwan Jesús okinankilij: ―Amigo, ¿tlan otikchiwako? Ijkuakón omijkuanijkej okitzkijkej in Jesús, iwan okiwikakej.

⁵¹Ijkuakón se imomachtijkaw in Jesús okikixtij iespada iwan okinakastzontekke itekipanoj in weyi tiopixke.

⁵²Ijkuakón Jesús okilwij: ―Xiktlaati moespada. Porke nochtin akinmej kimomagaskej ika espada, noijki mikiskej ika espada.

⁵³¿Amo tikmati tla Nej niknekini, welini niktlajtlaniliani noPapan, ma kualintitlani miles de angelestin para ma nechpalewikij iwan san niman kualintitlanini?

⁵⁴Pero tla ijkón nikchiwas, ¿kenik mochiwas tlan kijta tiotlajkuilole, katlej kijta nik ijkón nipanos?

⁵⁵Tonses Jesús okinmilwij in tlakaj: ―¿Annechkitzkikoj namejwan ika espada iwan ika kuawitl kej yeskia niichtekke? Nochipa onieka amowan itech in weyi tiopan onitlamachtijtoka iwan mach keman annechkitzkijkej.

⁵⁶Pero nochi yin nipanoa para ma mochiwa tlan kijta in tiotlajkuilole katlej okijkuilojkej in profetajtin. Ijkuakón nochtin imomachtijkawan okikajtejkej iselti in Jesús iwan ocholojkej. Jesús okiwikakej kan tlaixkomakaj (tlatzonmanaj)

⁵⁷Katlej okitzkijkej in Jesús okiwikakej ixpan weyi tiopixke Caifás, kan oololitokaj in tlamachtijkej de itlanawatil in Moisés iwan tlayekankej tetajtzitzintin.

⁵⁸Pero in Pedro inkuitlapan oyáj de wejka asta kan patio de ichan in weyi tiopixke, ompa okalakke iwan omotlalij inwan mayoltin para kitas tlanon tlapanos.

⁵⁹In tlayekankej tiopixkej, iwan tlayekankej tetajtzitzintin, iwan nochtin de yen junta, okitemoayaj kenik kimayawiskej in Jesús ika tlajtoltlatlalilistle para kimiktiskej.

⁶⁰Pero mach itlaj okajxiliayaj tlan ika kistlakawiskej, maski miekej okijtojkej tlan amo melawak. Pero satepan omoketzkej omen tlakaj teistlakawijkej katlej mach kualtin,

⁶¹iwan okijtojkej: ―Yin tlakatl okijtoj: “Nej welis nikxitinis in weyi tiopan de Dios, iwan san ika eyi tonale nikkewaltis oksemi.”

⁶²Tonses in tlayekanke tiopixke omoketzke, iwan okilwij in Jesús: ―¿Amo titlanankilis? ¿Melawak tlan yejwan mitzistlakawiaj?

⁶³Pero Jesús mach otlanankilij. Ijkuakón in tlayekanke tiopixke okilwij: ―Nimitznawatia ika itoka in toTajtzin Dios katlej nochipa yolitok, xitechilwi kox yen tej tiCristo, iKone in Dios.

⁶⁴Jesús okinankilij: ―Aján yen Nej, ijkón ken tej yotikijtoj. Iwan noijki namechilwia, nik namejwan annechitaskej Nej katlej onimochij nitlakatl niewatos ik iyekma in Dios katlej kipia weyi ipoder, iwan niwitz de ilwikak ijtik mixtle.

⁶⁵Ijkuakón in tlayekanke tiopixke omotlakentzayanke, iwan okijtoj: ―¡Yin tlakatl kixpanawia in Dios! ¿Tlan para moneki ok akaj ma kistlakawi de tlan yokijtoj? Namejwan ya ankikakej tlan yej inewian yokimokuitij.

⁶⁶¿Namejwan ken ankijtaj? Iwan yejwan okijtojkej: ―¡Tlajtlakolej, moneki ma miki!

⁶⁷Ijkuakón okixchijchakej iwan okimaitenkej. Oksekimej okixtlajtlatzinijkej

⁶⁸iwan okilwijkej: ―Tej komo tiCristo, ¡tla xitlajto (xikadibinaro) akin omitzmaak! Pedro okijtoj mach kixmati in Jesús

⁶⁹Pedro oewatoka kalan kan patio, iwan ijkuakón se tlapalewijkasiwatl omijkuanij inawak iwan okilwij: ―Tej noijki otinemia iwan Jesús katlej de estado de Galilea.

⁷⁰Pedro mach okimokuitij, okijtoj: ―Mach nikmati tlan tikijta.

⁷¹Pedro yokistiaya ik puertajko, oksé siwatl okitak, iwan okinmilwij katlej ompa oyekaj: ―Yin tlakatl noijki onemia iwan Jesús de pueblo de Nazaret.

⁷²Pedro oksemi mach okimokuitij, iwan asta okijtoj nik in Dios tlachixtok. Okijtoj: ―Mach nikixmati in yon tlakatl.

⁷³Okachitzin satepan, katlej ompa oyekaj omijkuanijkej inawak in Pedro, iwan okilwijkej: ―Ya nele, tej noijki se de yejwan, porke mokaki oksé nik titlapoa.

⁷⁴Ijkuakón opéj tlawikaltia iwan asta okijtoj nik in Dios tlachixtok mach melawak. Okijtoj: ―Mach nikixmati in yon tlakatl. Iwan san niman ijkuakón owaltzajtzik in kaxtil.

⁷⁵Ijkuakón Pedro okelnamikke tlan achtoj okilwij in Jesús: “Antes de tzajtzis in kaxtil, tej ijkuakón yotikijtoj ya eyi buelta nik mach tinechixmati.” Iwan Pedro okiske de ompa iwan ochokak sa tekitl.