Read Northern Oaxaca Nahuatl San Marcos 14 Bible Online

San Marcos 14 - Northern Oaxaca Nahuatl bible

San Marcos 14

¹Sa ome tonale opoliwia para ilwitl de pascua nijkuak mokua in pan katlej mach kipia levadura. In saduceos iwan tlamachtijkej de itlanawatil in Moisés, okitemoliayaj in Jesús kenik welis kikitzkiskej ika tlakajkayawalistle iwan ijkón kimiktiskej.

²Pero okimolwiayaj: ―Mach tikitzkiskej itech ilwitl para amo kualaniskej in tlakaj iwan yomoniskej. Se siwatl okiteekilij ajwiakayotl in Jesús ipan itzontekon

³Jesús oyeka itech pueblo de Betania ichan Simón katlej okipiaya se kokolistle, katlej opalania inakayo. Jesús ijkuakón oewatoka itech mesa, oejkok se siwatl kiwalkui se boteyajtzin de alabastro tentok de ajwiakayotl de nardo katlej kuale iwan patíoj, okitlapanke in boteyajtzin iwan okiteekilij in ajwiakayotl ipan itzontekon in Jesús.

⁴Sekimej katlej ompa oyekaj okualankej iwan okimolwiayaj: ―¿Tlanik san okawiltij in ajwiakayotl?

⁵Welini monamakani patíoj ken tlan kitlani se tlakatl katlej tlapalewia de se xiwitl, iwan se kinmakaskia in tomin katlej pobrestin. Iwan okajwakej chikawak in yon siwatl.

⁶Jesús okijtoj: ―Xikkawakan, ¿tlanik ankajwaj? Yej kuale tlan onechtoktij.

⁷In pobrestin nochipa ankinpiaskej iwan welis ankinpalewiskej san keman ankinekiskej, pero Nej mach nochipa annechpiaskej.

⁸Yin siwatl okichij tlan owelik. Yonechajwialij para ijkuak nimotookas.

⁹Ipan melajka namechilwia ke nian nepa ixko yin tlaltikpak, kan motematiltis in tlajtole katlej temakixtia, noijki motematiltis tlan okichij in yin siwatl iwan ijkón se kelnamikis. Judas okitemaktij (okitemaktilij) in Jesús

¹⁰Judas Iscariote, se de yen majtlaktle iwan omen, oyáj okinmitato in tlayekankej tiopixkej para kinmaktilis in Jesús.

¹¹San niman nijkuak okikakej, opakej iwan okilwijkej kimakaskej tomin in Judas. Ijkón yej okitemoaya keman okachi kuale para kinmaktilis in Jesús. Tiotlakantlakuale de toSeñor

¹²Nijkuak opéj ilwitl de pascua yakin se tonale, nijkuak mokua in pan katlej mach kipia levadura, nijkuak noijki okimiktiayaj in ichkatzin de pascua, in momachtijkej okitlajtlanijkej in Jesús: ―¿Kan tikneki ma tikyektlalitij in tiotlakantlakuale de pascua?

¹³Ijkuakón okintitlanke omen imomachtijkawan okinmilwij: ―Xiwian itech pueblo, ompa ankajsitiwej se tlakatl katlej kitki iatekon. Xiwian iwan.

¹⁴Iwan kan ajsiti ompa xiktlajtlanikan iteko in kale: “In Tlamachtij tlajtlani: ¿Katlij yen kuarto kan nikuas in tiotlakantlakuale de pascua inwan nomomachtijkawan?”

¹⁵Yej amechititis se kuarto weyi katlej kajki ajkopan iwan ya tlayektlalitok. Ompa xikchiwakan in tiotlakantlakuale de pascua.

¹⁶In momachtijkej okiskej iwan oyajkej itech pueblo. Okajsitajsikej nochi ken Jesús okinmilwij iwan okichijkej in tiotlakantlakuale de pascua.

¹⁷Nijkuak owaltlatleyuak, Jesús iwan majtlaktle iwan omen imomachtijkawan oejkokej kalijtik.

¹⁸Nijkuak otlakuajtokaj ipan mesa, Jesús okinmilwij: ―Ipan melajka namechilwia, nik se de amejwan katlej nian nowan tlakuajtok, nechtemaktis (nechtemaktilis).

¹⁹Yejwan omoyolkokojkej iwan opéj kitlajtlaniaj se por se: ―¿Kox nej?

²⁰Jesús okinmilwij: ―Se de yen namejwan anmajtlaktin iwan amomen, katlej kajakia ipan ijtik in plato kan Nej noijki nikajakia.

²¹Nej katlej onimochij nitlakatl nipanos ijkón ken kijta in tiotlajkuilole, pero ¡pobre akin nechtemaktis (nechtemaktilis)! Mejor amo tlakatini.

²²Nijkuak otlakuajtokaj, in Jesús okitilanke in pan iwan omotlasojkamatke inawak Dios. Okipojpostekke in pan iwan okinmajmakak imomachtijkawan, iwan Jesús okijtoj: ―Xikkuakan, yin yen notlalnakayo.

²³Ijkuakón okitilanke in kopa iwan omotlasojkamatke inawak Dios, satepan okinpanoltilij imomachtijkawan iwan nochtin okonikej.

²⁴Okinmilwij: ―Yin yen noeso, katlej yankuik akuerdo inawak Dios, katlej toyawis para miekej.

²⁵Ipan melajka namechilwia, ke mach ok nikonis iayo uvas asta itech nekáj tonale nijkuak nikonis iayo uvas yankuik katlej onkaj kan Dios tlanawatia. Pedro okijtoj mach kixmati in Jesús

²⁶Satepan de okitlakuikakej se tiotlakuikale, oyajkej ipan Olivostepetl.

²⁷Ijkuakón Jesús okinmilwij: ―Namejwan aminochtin annechkajtewaskej noselti, porke kajki ijkuilitok kijta: “Nikmiktis in tlajpixke iwan ichkamej xixiniskej.”

²⁸Satepan de ijkuak nimoyolkuis (nimoyolitis), namechyekanas ik estado de Galilea.

²⁹Pedro okijtoj: ―Maski nochtin ma mitzkajtewakan, nej mach nimitzkawas.

³⁰Jesús okilwij: ―Ipan melajka, yin yuak antes de tzajtzis in kaxtil ome buelta, tej ijkuakón yotikijtoj ya eyi buelta nik mach tinechixmati.

³¹Pedro okachi omochijchikawaya: ―Maski mowan ma nechmiktikan, nej mach keman nimitzkawas. Iwan nochtin ijkón okijtojkej. Jesús omotiotzajtzilij kan tlatokkuawyoj itoka Getsemaní

³²Satepan oyajkej ik tlatokkuawyoj kan kilwiaj Getsemaní, iwan Jesús okinmilwij imomachtijkawan: ―Ximotlalikan nian mientras Nej niawi nimotiotzajtziliti.

³³Okinwikak in Pedro, Jacobo iwan Juan, iwan opéj moyolkokoa iwan opéj mosentiroa sa tekitl.

³⁴Okinmilwij: ―Nikmachilia itech noanima ya niixpoliwi de neyolkokole. Nian ximokawakan iwan xiijsatokan.

³⁵Oyáj achitzin ik tlayakapan, ompa omotlankuaketzke asta okitennamikke in tlale. Iwan okimotlatlawtilij in Dios, tla kualtini, amo ma kawili ma pano tekokojkayotl itech nekáj ora.

³⁶Itech itiotzajtzilis okijtoj: ―Abba, Papan, tejwatzin nochi tiweli tikchiwa, xinechkixtili yin tekokojkayotl, pero amo ma mochiwa ken Nej nikneki, sino ken tejwatzin tikmonekiltia.

³⁷Satepan omokuepke kan oyekaj eyin imomachtijkawan iwan okinmajsito kochtokej, iwan okilwij in Pedro: ―Simón, ¿tikochi? ¿Amo otikxikoj tiijsatok nion se ora?

³⁸Xiijsatokan iwan ximotiotzajtzilijtokan, para amo ma amechmayawi in tlajtlakole, namoespíritu kineki kichiwas tlan kuale, pero namotlalnakayo mach tlaxikoa.

³⁹Jesús oyáj oksemi omotiotzajtzilito iwan oksemi okijtoj tlan achtoj yokijtoj.

⁴⁰Nijkuak omokuepato, oksemi okinmitajsik kochtokej porke inpan omopachoj in kochilistle. Iwan mach ok okimatiaj tlan kijtoskej.

⁴¹Nijkuak omokuepato ya eyi buelta, okinmilwij: ―¿Ankiseguiroaj anmosewiaj iwan ankochij? ¡Xiijsakan! Yoajsik ora, porke Nej katlej onimochij nitlakatl ya nechtemaktiskej (nechtemaktiliskej) inmak in tlakaj tlajtlakolejkej.

⁴²¡Ximewakan ma tiwian! Xikitakan, ya ompa witz katlej nechtemaktis. Jesús okikitzkijkej

⁴³Jesús ok otlapojtoka iwan ijkuakón oejkok in Judas, se de yen majtlaktle iwan omen imomachtijkawan, kualinwika miekej tlakaj kiwalkuij espada iwan kiwalkuij kuawitl. In yonmej tlakaj okualintitlankej in tlayekankej tiopixkej, in tlamachtijkej de itlanawatil in Moisés iwan tlayekankej tetajtzitzintin.

⁴⁴Iwan Judas antes de kitemaktis (kitemaktilis) in Jesús, ijkín okinmilwij in tlakaj: ―Akin nej nikixpipitzos yen yon Jesús, xikitzkikan kuale iwan xikwikakan.

⁴⁵Niman nijkuak oejkok in Judas, omijkuanij inawak Jesús iwan okilwij: ―¡Tlamachtij! Iwan ijkuakón okixpipitzoj.

⁴⁶San niman ijkuakón omijkuanijkej in tlakaj iwan okitzkijkej in Jesús.

⁴⁷Pero se imomachtijkaw in Jesús okikixtij iespada iwan okinakastzontekke itekipanoj in weyi tiopixke.

⁴⁸Iwan Jesús okinmilwij: ―¿Tlanik anwalajkej annechkitzkikoj ika espada iwan ika kuawitl? Mach niichtekke.

⁴⁹Nochipa onieka amowan itech in weyi tiopan onitlamachtijtoka iwan mach keman annechkitzkijkej. Pero ijkín nipanoa para ma mochiwa tlan kijta in tiotlajkuilole.

⁵⁰Nochtin imomachtijkawan ochocholojkej iwan okikajtejkej iselti in Jesús.

⁵¹Se telpochtle ompa oyaya otlakentitiaya san ika se sábana katlej kuale, pero nijkuak okitzkijkej,

⁵²omoxolkopinke iwan ocholoj sa xitlatztik. Jesús okiwikakej kan tlaixkomakaj (tlatzonmanaj)

⁵³Okiwikakej in Jesús imak in weyi tiopixke, iwan omololojkej in tlayekankej tiopixkej, in tlayekankej tetajtzitzintin iwan tlamachtijkej de itlanawatil in Moisés.

⁵⁴Pedro oyaya san wejka iwan omokaj kan patio de yen ichan in weyi tiopixke, iwan ompa omotlalij omototonijtoka itech tlikuile inwan sekimej tlamonekuitlawijkej de ompa.

⁵⁵In tlayekankej tiopixkej iwan nochtin katlej tlatlanawatijkej tlaixkomakakej (tlatzonmankej), okistlakawiayaj ika san tlan amo, tlan ika welis kimayawiskej in Jesús iwan ijkón kualtis kimiktiskej, pero mach itlaj okajxiliayaj.

⁵⁶Miekej okijtojkej tlan amo melawak (tlen amo ijkón). Sekimej okijtoayaj se tlamantle iwan oksekimej okijtoayaj oksé tlamantle.

⁵⁷Sekimej tlakaj mach kualtin omoketzkej iwan okistlakawijkej in Jesús okijtojkej:

⁵⁸―Tejwan otikkakej okijtoj: “Nikxitinis yin weyi tiopan katlej okichijkej in tlakaj, iwan san ika eyi tonale nikkewaltis oksé katlej mach akaj tlakatl kichiwas.”

⁵⁹Maski ijkón okijtoayaj mach oajsiaj san se tlajtole.

⁶⁰Ijkuakón omoketzke tlatlajko in weyi tiopixke iwan okitlajtlanij in Jesús: ―¿Amitlaj tikijtos de tlan yinmej mitzistlakawiaj?

⁶¹Jesús mach otlanankilij. Iwan in weyi tiopixke oksemi okitlajtlanij: ―¿Yen tej tiCristo titeKone de Dios katlej tikweyitenewaj?

⁶²Jesús okinankilij in weyi tiopixke: ―Aján, yen Nej, iwan namejwan annechitaskej Nej katlej onimochij nitlakatl niewatos ik iyekma in Dios katlej kipia weyi ipoder, iwan namejwan annechitaskej niwitz de ilwikak ijtik mixtle.

⁶³Iwan in weyi tiopixke omotlakentzayanke iwan okijtoj: ―¿Tlan para moneki okachi ankistlakawiskej?

⁶⁴¡Namejwan ya ankikakej nik otlajtoj kej yeskia yen Dios! ¿Tlan ankijtaj? Nochtin okijtojkej nik tlajtlakolej iwan moneki ma kimiktikan.

⁶⁵Sekimej opéj kichijchijchaj, okixilpiayaj iwan okimaitemayaj, iwan okilwiayaj: ―¡Tla xitlajto (xikadibinaro), akin omitzmaak! Iwan mayoltin noijki okixtlajtlatziniayaj. Pedro okijtoj mach kixmati in Jesús

⁶⁶Pedro oyeka tlatlampa kan patio, iwan ik ompa opanok se siwatl itlapalewij in weyi tiopixke.

⁶⁷Nijkuak okitak in pedro mototonijtok, omoketzke iwan okitlatak, iwan okijtoj: ―Tej noijki otinemia iwan Jesús de pueblo de Nazaret.

⁶⁸Pedro mach okimokuitij iwan okijtoj: ―Mach nikixmati iwan nion mach nikmati tlan tikijta. Iwan okiske ik kalan iwan ijkuakón otzajtzik in kaxtil.

⁶⁹In tlapalewijkasiwatl, oksemi okitak in Pedro iwan opéj kinmilwia katlej ompa oyekaj: ―Yin se de yejwan.

⁷⁰Pedro oksemi mach okimokuitij. Ok achitzin satepan, katlej ompa oyekaj oksemi okilwijkej in Pedro: ―Ipan melajka, tej se de yejwan, porke in tej noijki de estado de Galilea.

⁷¹Ijkuakón Pedro opéj tlawikaltia iwan okijtoj nik in Dios tlachixtok nik melawak tlan kijta. Okijtoj: ―Mach nikixmati yon tlakatl katlej namejwan ankitenewaj.

⁷²Ijkuakón in kaxtil otzajtzik oksemi. Pedro ijkuakón okelnamikke tlan achtoj okilwijka in Jesús: “Antes de tzajtzis in kaxtil ome buelta, tej ijkuakón yotikijtoj ya eyi buelta nik mach tinechixmati.” Iwan ochokak sa tekitl.