Read Northern Oaxaca Nahuatl San Marcos 4 Bible Online

San Marcos 4 - Northern Oaxaca Nahuatl bible

San Marcos 4

¹Jesús oksemi opéj tlamachtia inakastlan lago de Galilea. Sa tekitl miekej tlakaj omololojkej inawak, iwan okachi kuale otlejkok itech se barko katlej oyeka tlatentle ijtik atl iwan ompa ipan omotlalij. In tlakaj oyekaj itempan atl.

²Okinmachtij de miek tlamantle iwan okintlapowij ika ejemplos para ma kimomakakan kuenta. Okinmilwij:

³―¡Xikkakikan kuale tlan namechilwis! Se tlakatl okiske otookato.

⁴Nijkuak otookatoka, sekin semiya owetzke ipan ojtle. In totomej owalajkej iwan okikuajkej in semiya.

⁵Oksekin owetzke ijtik teyoj, okiske totoka porke mach okipiaya miek tlale.

⁶Pero nijkuak chikawak otonak, okichichinoj porke mach okipiaya wejkatlan inelwayo.

⁷Oksekin owetzke itzalko in bierojxiwitl, omoskaltij okachi miek yon xiwitl, iwan tlatoktle mach semi omoskaltij porke oxiwmikke iwan mach otlakke.

⁸Oksekin owetzke kan kuale tlale, okiske iwan otlakke miek. Sekin semiya okitemakak senpoale iwan majtlaktle itliolo san de se semiya, iwan oksekin okitemakak eyinpoale itliolo iwan oksekin asta se siento itliolo.

⁹Iwan okinmilwij: ―Tla ankinekij ankimomakaskej kuenta, xikkakikan. Jesús okitlajtlanijkej tlanik tlamachtia ika ejemplos

¹⁰Nijkuak omokaj sa yen Jesús, in majtlaktle iwan omen iwan kanaj keskimej oksekimej, ijkuakón okitlajtlanijkej in Jesús tlan kijtosneki in ejemplo de yen tlatookak.

¹¹Yej okinmilwij: ―Namejwan Dios yoamechkawilij xikmatikan tlan oyeka tlatitok de kenik in Dios tlanawatia. Oksekimej katlej mach ya kimatij, se kinmatiltia ika ejemplos.

¹²Para ijkón, maski ma kitakan, mach ma kimomakakan kuenta tlan kitaj. Iwan maski ma kikakikan, mach ma kimatikan tlanon kijtosneki tlan kikakij. Iwan ijkón yejwan mach moyolkuepaskej, iwan Dios mach kintlapojpolwis de intlajtlakol. Jesús okintomilij in ejemplo de yen tlatookak

¹³Jesús okinmilwij: ―Tla amo ankimomakaj kuenta yin ejemplo, tonses ¿kenik welis ankimomakaskej kuenta de yen oksekimej ejemplos?

¹⁴Tlan omotookak yon kej yeskia yen itlajtol in Dios.

¹⁵In semiya katlej owetzke ipan ojtle yon kej yeskia yejwan katlej kikakij in tlajtole, pero san niman ejko in Satanás iwan kikixtia in tlajtole katlej omotookak ipan inyolo.

¹⁶In semiya katlej owetzke ijtik teyoj, yon ken se tlakatl katlej kiresibiroa itlajtol in toTajtzin Dios ika pakilistle nijkuak kikaki.

¹⁷Pero mach wejkatlan monelwayotia iwan san niman nelwayowaki ipan iyolo. Pewa trabajojpanoa iwan pewa kitlatlalochtiaj por yen itlajtol in toTajtzin Dios, walmosotlawa iwan kikawa in Dios.

¹⁸In semiya katlej owetzke itzalko in bierojxiwitl, yon ken sekimej katlej kikakij in tlajtole,

¹⁹pero sa tekitl tlanemiliaj itech tlamantin de yin nemilistle, kawiliaj ma moskalti in bierojxiwitl ipan inyolo. Kinekij kipiaskej miek tomin iwan kinekij kipiaskej miek tlamantle, yon ken bierojxiwitl katlej mach kikawilia ma tlaki in tlatoktle de yen itlajtol in Dios ipan inyolo.

²⁰In semiya katlej omotookak kan kuale tlale, yon ken tlakaj katlej melawak kikakij itlajtol in Dios iwan kiresibiroaj ipan inyolo. Yonmej tlakaj katej ken semiya katlej kitemakaj senpoale iwan majtlaktle intliolo san de se semiya, iwan sekimej kitemakaj eyinpoale intliolo, iwan sekimej kitemakaj asta se siento intliolo. Ejemplo de se tlanextle

²¹Jesús okinmilwij: ―Mach akaj kitlalia se tlanextle itlampa se chikiwitl o noso itlampa se tlapechtle. Sino motlalia ajkopan para ma tlawi.

²²Nochi katlej amo momati kipia por momatis, iwan nochi katlej kajki tlatitok kipia por nesis.

²³Tla ankinekij ankimomakaskej kuenta, xikkakikan.

²⁴Jesús okinmilwij: ―Moneki kuale xikkakikan tlan ankikakij. Ijkón ken tlan namejwan ankitemakaskej, Dios no ijkón amechmakas iwan amechmakas asta okachi.

²⁵Porke akin kinekis moskaltis okachi itech itlajtol in Dios, moskaltis okachi. Iwan katlej amo kinekis, kipolos asta tlan ya kimati. Ejemplo de se semiya katlej moskaltia wejkapan

²⁶Jesús okijtoj: ―Namechilwis se ejemplo para xikmatikan kenik in Dios tlanawatia: se tlakatl otlatookak itlalaj.

²⁷Tla kochis nochi yuale iwan tla mewas o noso amo mewas nochi kualkan, in tlatoktle moskaltijtiw, pero yej mach kimati kenik moskaltia,

²⁸inewian in tlale kitlakiltia in tlatoktle, achtoj kisa iwan moxiwyotia iwan satepan miawati, xiloti iwan motliolotia.

²⁹Iwan nijkuak walchikawa, in tlakatl kipixka porke yokualtik. Ejemplo de iyolo in mostaza katlej okachi tzikitzin ke iyolo in miltomatl

³⁰Satepan Jesús okinmilwij: ―¿Tlan ika welis tikparejaroskej para xikmomakakan kuenta kenik in Dios tlanawatia? O noso, ¿tlan ejemplo welis namechilwis para okachi xikmomakakan kuenta?

³¹Yon ken iyolo mostaza, katlej okachi tzikitzin de miek oksekin semiya.

³²Pero nijkuak se kitooka, kisa iwan moskaltia okachi weyi de nochi namotlatok. Momamayotia iwan totomej asta itech motepajsoltiaj.

³³Jesús okintlapowij ika miek ejemplos asta kan okimomakayaj kuenta in tlakaj.

³⁴Pero nijkuak oyeka san Yej iwan imomachtijkawan, okinyekilwiaya para ma kimomakakan kuenta. Jesús okiketzaltij in ejekatl iwan atl

³⁵Itech yon tonale nijkuak otleyuak, Jesús okinmilwij imomachtijkawan: ―Ma tipanokan oksé lado.

³⁶Tonses, imomachtijkawan okinkajtejkej in tlakaj katlej ompa inwan oyekaj iwan okiwikakej in Jesús itech se barko katlej itech yoyeka. Oksekimej barkojtin noijki no oyajkej.

³⁷Satepan owalaj se ejekatl chikawak iwan atl opéj motlamotla ipan barko iwan opéj atemi.

³⁸Jesús okochtoka tlakuitlapan ipan se ikpale. Iwan okijxitijkej okilwijkej: ―¡Tlamachtij! ¿Amo tikmomaka kuenta nik tiapolakij?

³⁹Yej owalmej iwan okajwak in ejekatl iwan okilwij in atl: ―¡Ximoketza! ¡San xieto! San niman in ejekatl omoketzke iwan atl sa omokaj.

⁴⁰Jesús okinmilwij imomachtijkawan: ―¿Tlanik wel anmomawtiaj? ¿Ayamo antlaneltokaj inawak Dios?

⁴¹Yejwan sa tekitl omomawtijkej iwan okimolwijkej entre yejwan: ―¿Akin Yin tlakatl, porke asta yen ejekatl iwan atl kitlakitaj?