Read Northern Oaxaca Nahuatl San Marcos 9 Bible Online

San Marcos 9 - Northern Oaxaca Nahuatl bible

San Marcos 9

¹Jesús okinmilwij: ―Ipan melajka namechilwia, sekimej katlej nian katej, mach kixmatiskej in mikilistle asta amo ma kitakan kenik in Dios tlanawatis ika miek ipoder. Jesús otlakenpetlanke

²Chikuasen tonale satepan, Jesús oyáj ipan tepetl okinwikak in Pedro, Jacobo iwan Juan. Iwan ompa inmixpan omopatlak itzotzol in Jesús.

³Itzotzol opetlanke sa tekitl istak, iwan mach akaj tlakatl de nian tlaltikpak welis ijkón kikawas, maski sa tekitl ma kipaka mach ijkón nik istayas.

⁴Iwan ijkuakón omonextijkej in Moisés iwan Elías omotlapowijtokaj iwan Jesús.

⁵Pedro okilwij in Jesús: ―Tlamachtij, sa kuale nian tikatej mowan. Ma tikinchiwakan eyi akawalkaltin, se para tejwatzin, se para Moisés iwan se para Elías.

⁶Pedro mach okimatke tlan okijtoj, porke yejwan omomawtijkej.

⁷Ijkuakón se mixtle okinkenke iwan se tlajtole omokakke okijtoj: ―Yin yen notlasojKone, xikkakilikan itlajtol.

⁸Nijkuak omotlachilijtewakej nian nepa, mach ok akaj okitakej sino sa yen Jesús.

⁹Nijkuak owaltemoayaj de ipan tepetl, Jesús okinmilwij imomachtijkawan mach itlaj ma kijtokan de tlan okitakej, asta ijkuak in Yej akin omochij tlakatl ma moyolkui oksemi satepan de mikis.

¹⁰Okitlaatijkej kiné ipan inyolo iwan omotlajtlaniayaj tlan kijtosneki moyolkuis (moyolitis) oksemi satepan de mikis.

¹¹Okitlajtlanijkej in Jesús: ―¿Tlanik in tlamachtijkej de itlanawatil in Moisés kijtaj ke Elías yej kipia de witz achtoj antes de witz in Cristo?

¹²Jesús okinnankilij: ―Ipan melajka namechilwia, Elías achtoj witz iwan yej tlayektlalis nochi, kajki ijkuilitok nik in Nej katlej onimochij nitlakatl nimoyolkokos sa tekitl iwan nechkokoliskej in tlakaj.

¹³Pero nikneki xikmatikan nik in Elías yowitza iwan tlakaj okitoktijkej san tlan yejwan okinekej, ijkón ken ijkuilitok de tlan panoani in yej. Jesús okipajtij se telpochtle katlej okipiaya se ejekatl mach kuale

¹⁴Nijkuak omokuepato in Jesús kan oyekaj imomachtijkawan, okinmitak miekej tlakaj okinyawalojtokaj, iwan sekimej tlamachtijkej de itlanawatil in Moisés omokuejsoayaj iwan imomachtijkawan.

¹⁵Nochtin sa otlajtlachixkej (omomajmawtijkej) nijkuak okitlatewakej in Jesús, iwan niman omotlalojkej inawak okitlajpalotoj.

¹⁶Jesús okintlajtlanij: ―¿Tlanik wel anmotlajtolnanankiliaj inwan nomomachtijkawan?

¹⁷Se tlakatl katlej ompa oyeka okijtoj: ―Tlamachtij, nian nimitzwalwikilia notelpoch, kipia se ejekatl mach kuale iwan onontik.

¹⁸San kan yawi, in ejekatl mach kuale kikitzkia iwan kitlalwiteki, kamaposoni, motlanteteyitza iwan sojsosoka. Onikintlatlawtij momomachtijkawan ma kikixtilikan in ejekatl mach kuale iwan mach owelikej.

¹⁹Jesús okinmilwij: ―¡Namejwan wel mach antlaneltokakej! ¿Asta keman nietos amowan? ¿Asta keman ijkón nanmechxikojtos? Xinechwalwikilikan in telpochtle.

²⁰Ijkuakón okiwikakej in telpochtle inawak Jesús, iwan nijkuak in ejekatl mach kuale okitak in Jesús, niman okitoktij in telpochtle ma motlalwiteki chikawak iwan omijtikueptinenke iwan okamaposonke.

²¹Jesús okitlajtlanij in tetaj de yon telpochtle: ―¿Ya wejkawitl ijkón mochiwa? In tetaj okinankilij: ―Desde chokotzin.

²²Miekpa kitoktia ma wetzi ijtik tlitl iwan ijtik atl para ma miki. Tla tejwatzin tiwelini itlaj tikchiwani, xitechiknomati iwan xitechpalewi.

²³Jesús okinankilij: ―Amo xikijto: “Tla tejwatzin tiwelini itlaj tikchiwani.” Tla tej tikneltoka, tonses Dios welis mitzpalewis itech nochi tlamantle.

²⁴San niman in tetaj otzajtzik chikawak okijtoj: ―¡Señor, nikneltoka! ¡Xinechpalewi ma nitlaneltoka okachi ken moneki!

²⁵Nijkuak Jesús okitak opéj mololoaj miekej tlakaj, okijtoj: ―¡Tej, ejekatl mach tikuale, tinakastzajtzaktok iwan tinontle! ¡Nimitznawatia xikisa de ijtik yin telpochtle iwan mach oksemi xikalaki ijtik!

²⁶In ejekatl mach kuale okuawtzajtzik, okimimiktij iwan okikuekuepke in telpochtle iwan okiske de ijtik. In telpochtle omokaj kej mikkatl. Iwan miekej okijtojkej yomikke in telpochtle.

²⁷Ijkuakón Jesús, okimakitzkij iwan okewaltij. Iwan telpochtle omoyekketzke.

²⁸Nijkuak in Jesús okalakke itech se kale iwan imomachtijkawan, ompa yejwan inselti okitlajtlanijkej in Jesús: ―¿Tlanik in tejwan mach otiwelikej otikixtijkej in ejekatl mach kuale?

²⁹Yej okinmilwij: ―Yinmej ejekamej mach kualtin, welis ankinkixtiskej tla anmotiotzajtziliskej iwan anmosawaskej (onayunaroskej). Jesús oksemi okitematiltij imikilis

³⁰Jesús iwan imomachtijkawan okiskej de ompa iwan opanokej ik estado de Galilea. Pero Jesús mach okinekke akaj ma kimati kanin kajki.

³¹Porke okinekia kinmachtis imomachtijkawan. Okinmilwiaya: ―Nej katlej onimochij nitlakatl nechtemaktiskej (nechtemaktiliskej) inmak in tlakaj iwan nechmiktiskej, pero eyi tonale satepan de yonimikke nimoyolkuis (nimoyolitis).

³²Yejwan mach okimomakakej kuenta de tlan okinmilwiaya, iwan okimakaskej de kitlajtlaniiskej tlan kijtosneki. ¿Akin okachi weyikistok?

³³Oajsitoj itech pueblo de Capernaum, nijkuak in Jesús oyeka kalijtik, okintlajtlanij: ―¿Tlan nankimolwijtiwalayaj ipan ojtle?

³⁴Yejwan mach otlanankilijkej, porke okimolwijtiwalayaj akin de yejwan okachi weyikistok (weyititok).

³⁵Ijkuakón Jesús omotlalij iwan okinnotzke in majtlaktle iwan omen imomachtijkawan. Okinmilwij: ―Tla akaj kineki tlayekantos, kipia de motzikitzinilis, iwan yej yetos tekipanoj de nochtin.

³⁶Jesús okitlalij se chokotzin tlatlajko de kan yejwan oyekaj, omotlalij iwan okinapaloj iwan okinmilwij:

³⁷―Akin kiresibiros se chokotzin ken yin, kijtosneki Nej nechresibiroa, iwan akin nechresibiroa, amo san Nej nechresibiroa, sino noijki akin onechwaltitlanke. Akin amo kajki kontra tejwan towan kajki

³⁸Juan okilwij in Jesús: ―Tlamachtij, otiktakej se tlakatl kinkixtia ejekamej mach kualtin ika motoka, iwan otikilwijkej mach ijkón ma kichiwa, porke yej mach towan nemi.

³⁹Jesús okinmilwij: ―Xikkawilikan, porke akin kichiwa milagro ika notoka, mach welis tlajtos biero de Nej.

⁴⁰Akin amo kajki kontra tejwan, towan kajki.

⁴¹Ipan melajka namechilwia, akin anmechmakas se xikale de atl ika notoka, san akin, porke amejwan annoaxkawan, ipan melajka namechilwia nik kiresibiros itlaxtlawil. Dios kintlajtlakoltis katlej tlajtlakolchiwaj

⁴²’In chochokomej nechneltokaj, pero tla akaj kichiwa se de yin tzikitzin ma wetzi ipan tlajtlakole, okachi kuale ma kilpilikan ikechtlan se metlatl iwan ma kitlamotlakan ijtik atl.

⁴³Tla moma mitztoktia xieto titlajtlakolej, xikmotzontekili. Okachi kuale xikalaki ilwikak timatepoj ke tias ika nochi ome momawan ijtik tliko, kan tlitl mach keman sewis,

⁴⁴kan okuilimej mach mikij iwan in tlitl mach keman sewi.

⁴⁵Tla mokxi mitztoktia xieto titlajtlakolej, xikmotzontekili. Okachi kuale xikalaki ilwikak tikoxo ke ma mitztlamotlakan ijtik tliko ika nochi ome mokxiwan,

⁴⁶kan okuilimej mach mikij iwan in tlitl mach keman sewi.

⁴⁷Iwan tla moixtololo mitztoktia xieto titlajtlakolej, xikmokixtili. Porke okachi kuale xikalaki kan Dios tlanawatia ika se moixtololo ke ika nochi ome moixtololowan ma mitztlamotlakan ijtik tliko,

⁴⁸kan okuilimej mach mikij iwan in tlitl mach keman sewi.

⁴⁹’Porke nochtin in tlakaj weliaskej ika tlitl, ken in tlakuale welia ika istatl.

⁵⁰In istatl sa tekitl kuale, pero tla in istatl kipolos ipuyeka, ¿kenik oksemi puyeyas? Namejwan xipuyextokan iwan kuale ximoyekwikakan.