Read Northern Oaxaca Nahuatl San Lucas 20 Bible Online

San Lucas 20 - Northern Oaxaca Nahuatl bible

San Lucas 20

¹Se tonale nijkuak Jesús oyeka kan weyi tiopan okinmachtijtoka in tlakaj, iwan okinmatiltijtoka in kuale tlajtole katlej temakixtia, ijkuakón oejkokej in tlayekankej tiopixkej iwan in tlamachtijkej de itlanawatil in Moisés, iwan in tlayekankej tetajtzitzintin judiojtin,

²iwan okilwijkej: ―Xitechilwi, ¿ika tlan tlanawatijkayotl tikchiwa in yin tlamantle? ¿Akin omitzmakak in yon tlanawatijkayotl?

³Ijkuakón Jesús okinnankilij: ―Nej noijki namechtlajtlanis se tlajtole. Xinechnankilikan:

⁴¿Akin okinawatij in Juan ma tlakuateeki? ¿Yen Dios okinawatij, o noso yen tlakaj okinawatijkej?

⁵Ijkuakón opéj kimolwiaj entre yejwan ijkín: ―¿Ken tikilwiskej? Tla tikijtoskej yen Dios okinawatij, techilwis: “¿Tlanik kiné mach ankineltokakej?”

⁶Iwan tla tikijtoskej yejwan in tlakaj okinawatijkej, nochtin in tlakaj techmiktiskej ika tetl, porke yejwan kuale kimatij nik in Juan oyeka profeta de Dios.

⁷Iwan okinankilijkej ke mach kimatij akin okinawatij in Juan ma tlakuateeki.

⁸Tonses in Jesús okinmilwij: ―Pues Nej noijki mach namechilwis ika tlan tlanawatijkayotl nikchiwa in yon tlamantle. In tlatookakej mach kualtin

⁹Satepan Jesús opéj kintlapowia in tlakaj, iwan okinmilwij yin ejemplo: ―Oyeka se tlakatl katlej okitookak miek uvas, iwan satepan okinkajtewilij sekimej tekipanojkej para ma kimonekuitlawikan iwan satepan kimokawiskej tlaatlajko de tlan tlakis, iwan oyáj de ompa iwan owejkawato kan oyáj.

¹⁰Nijkuak ya kuale para kitekiskej in uvas, okititlanke se itekipanoj innawak in yonmej tekipanojkej para ma kitlajtlaniti tlan kitokaroa. Pero in tekipanojkej okimagakej iwan okikuepkej san ijki.

¹¹Satepan iteko in uvasyoj okititlanke oksé itekipanoj. Pero noijki okimagakej. San tlan amo okilwijkej iwan okikuepkej san ijki.

¹²Iteko in uvasyoj oksemi okititlanke oksé itekipanoj, pero in tekipanojkej noijki okikojkokojkej iwan okikixtijkej kalan.

¹³’Satepan, iteko in uvasyoj okimolwij: “¿Tlan nikchiwas? Niktitlanis notlasojkone. Nijkuak kitaskej, xamo kitlakitaskej.”

¹⁴Pero nijkuak in tekipanojkej okitakej, okimolwijkej se iwan oksé: “Yin ikone yen katlej kimokawis tlan iaxka in tetaj. Ma tikmiktikan, para tejwan tikmoaxkatiskej in uvasyoj.”

¹⁵Ijkuakón okikixtijkej in tekone de kan uvasyoj iwan okimiktijkej. Satepan Jesús okintlajtlanij: ―Axan kiné, ¿tlan kichiwas iteko in uvasyoj? ¿Tlan kintoktis in tekipanojkej?

¹⁶Yon iteko in uvasyoj yas iwan kinmixpolos nekatej tekipanojkej, iwan iuvasyoj kinmakas oksekimej para ma kimonekuitlawikan. Nijkuak in tlakaj ijkón okikakej, okijtojkej: ―¡Amo ma Dios kimonekilti!

¹⁷Pero Jesús okintlatak, iwan okijtoj: ―¿Tlan kijtosneki kiné tlan kijta in tiotlajkuilole? Kan kijta:In tetl katlej in kalchijkej mach okixitakej,omochij yen tetl katlej okachi kichikajtok in kale.

¹⁸Iwan akin wetzis ipan yon tetl, pojpostekis. Iwan tla in tetl wetzis ipan akaj, kikuejkuechos. Kox se kitlaxtlawas impuesto para César

¹⁹In tlayekankej tiopixkej iwan tlamachtijkej de itlanawatil in Moisés okinekiaj kikitzkianij in Jesús itech yon ora, porke okimomakakej kuenta nik okinkajkakitij ika yon ejemplo. Pero mach okikitzkijkej, porke okinmiimakasiaj in tlakaj.

²⁰Satepan okintitlankej sekimej tlakaj para ma kixpiakan in Jesús iwan omochiwayaj kej kualtin tlakaj, para welis kikakiskej itlaj tlajtole katlej ika welis kimayawiskej iwan ijkón welis kitemaktiskej (kitemaktiliskej) imak in gobernador.

²¹Por yonik yejwan okitlajtlanijkej in Jesús: ―Tlamachtij, tikmatij nik tikijta tlan melawak iwan noijki titlamachtia tlan melawak, iwan tejwatzin mach tikinmita in tlakaj kox rikojtin o noso pobrestin, sino titlamachtia ipan melajka kenik se nemis ken Dios kineki.

²²Xitechilwi: ¿Kox kuale se kitlaxtlawas impuesto para César o noso amo?

²³Pero Jesús okimatia nik mach kuale tlan okiyejyekojtokaj iwan nik okinekiaj kimayawiskej ika itlaj tlajtole. Iwan okinmilwij: ―¿Tlanik ankinekij annechmayawiskej ika itlaj tlajtole?

²⁴Xinechititikan se tomin. ¿De akin ixko iwan akin itoka katlej nestok itech yin tomin? Yejwan okijtojkej: ―De César.

²⁵Tonses in Jesús okinmilwij: ―Pues xikmakakan in César tlan de yen César, iwan xikmakakan Dios tlan de yen Dios.

²⁶Iwan mach owelikej okitlajtolmayajkej de tlan okijtoaya inmixpan tlakaj. Sino okachi sa omotlajtlachialtiayaj (omomajmawtiayaj) de kenik otlanankiliaya, iwan mach ok itlaj okijtojkej. Okitlajtlanijkej in Jesús kox moyolkuiskej in mikkamej

²⁷Satepan, sekimej saduceos oyajkej okitatoj in Jesús. In yonmej saduceos mach kineltokaj kox welis moyolkuiskej (moyolitiskej) in mikkamej. Iwan okitlajtlanijkej in Jesús:

²⁸―Tlamachtij, Moisés otechkajtewilij ijkuilitok, ke tla se tlakatl omonamiktij, miki iwan mach okipixke nion se ikone iwan isiwa, ikni in difunto kipia de monamiktis iwan yon viuda para kinpias ikonewan para ijkón welis yeskej kej yeskia ikonewan in difunto.

²⁹Axan kiné, oyekaj chikomen iknimej. In yankuiotl achtoj omonamiktij, pero omikke iwan mach okinpixke ikonewan.

³⁰Oksé ikni katlej kiwaltoka omonamiktij iwan yon viuda, iwan noijki omikke iwan mach okinpixke ikonewan.

³¹Ijkuakón oksé katlej kiwaltoka omonamiktij iwan yon viuda, iwan ijkón okichijkej nochtin in oksekimej, iwan san ken chikomen iknimej omikkej iwan mach okipixkej nion se inkone.

³²Satepan noijki omikke in viuda.

³³Tonses, nijkuak moyolkuiskej (moyolitiskej) in mikkamej, ¿katlij yen de yonmej chikomen yetos isiwa? Porke nochtin chikomen omonamiktijkej iwan yon siwatl.

³⁴Tonses in Jesús okinnankilij: ―Itech yin tlaltikpak, in tlakaj iwan siwamej monamiktiaj.

³⁵Pero nijkuak in tlakaj iwan siwamej moyolkuiskej oksemi de itech inmikilis, iwan katlej Dios kinkawilis ajsiskej ompa ilwikak, mach ok motlajtlaniskej iwan nion mach ok monamiktiskej.

³⁶Porke mach ok mikiskej. Yeskej kej angelestin, iwan yeskej ikonewan in Dios porke yokinyolitij.

³⁷Inewian Moisés, okiteititij nik in mikkamej moyolkuiskej, kan tlapoa de se kuatlanwitztle katlej otlatlaya. Kan Dios okilwij in Moisés nik yen Dios de Abraham, de Isaac iwan de Jacob.

³⁸Iwan Dios amo Dios de mikkamej, sino de katlej yolitokej. Porke nochtin katlej iaxkawan Dios, yonmej nochtin yolitokej.

³⁹Ijkuakón sekimej tlamachtijkej de itlanawatil in Moisés okilwijkej: ―Tlamachtij, kuale tlan otikijtoj.

⁴⁰Iwan mach ok omixewijkej ok itlaj okitlajtlanijkej. ¿De akin iKone in Cristo?

⁴¹Ijkuakón Jesús okinmilwij: ―¿Tlanik kijtaj nik in Cristo katlej Dios okipejpenke yen ikone in David?

⁴²Porke inewian in David kijta itech libro de Salmos:In toTajtzin Dios okilwij in noSeñor yin tlajtole:“Ximotlali ik noyekma,

⁴³asta ijkuak Nej nimitztlalis titlayekanke de yejwan katlej mitzkokoliaj.”

⁴⁴Tla inewian David okinotzke in Cristo “noSeñor”; ¿kenik kiné in Cristo ma yeto iKone in David? Jesús okijtoj mach kuale tlan kichiwaj in tlamachtijkej de itlanawatil in Moisés

⁴⁵Nochtin in tlakaj otlakaktokaj nijkuak in Jesús okinmilwij imomachtijkawan:

⁴⁶―Ximotlachilikan de yen tlamachtijkej de itlanawatil in Moisés, porke kiwelitaj nemiskej ika intlaken weweyak, iwan kinekij ma kinyektlajpalokan nijkuak nemij tiankistle. Iwan itech tiopanmej kiwelitaj motlaliskej kan motlaliaj in tlayekankej, iwan kitemoaj motlaliskej kan okachi kuale lugar itech ilwimej.

⁴⁷Iwan yejwan noijki kinkixtiliaj inkalwan in viudajtin, iwan tlaixkajkayawaj motiotzajtziliaj sa tekitl para ma kinmitakan kichiwaj tlan kuale. Por yonik in yejwan kitlaxtlawaskej okachi weyi intlajtlakol.