Read Northern Oaxaca Nahuatl San Juan 10 Bible Online

San Juan 10 - Northern Oaxaca Nahuatl bible

San Juan 10

¹’Ipan melajka namechilwia, in tlajpixke kalaki itech puerta de yen korral, iwan akin kalakis oksé lado iwan amo itech puerta de yen korral, yon ichtekke.

²Porke in tlajpixke katlej kinmonekuitlawia ichkamej kalaki itech puerta.

³Se tlakatl kitlapolia puerta in tlajpixke para ma kalaki, iwan ichkamej kitenkakij. Iichkawan kinnotza ika intoka, iwan kinkixtia de ijtik inkorral.

⁴Iwan nijkuak nochtin yokinkixtij, kinwika kinyekana. Iwan ichkamej ikuitlapan yawij, porke kitenkakij.

⁵Pero se katlej mach kixmatij mach iwan yawij, sino kicholiliaj, porke mach kitenkakij se katlej mach kixmatij.

⁶Jesús okintlalilij yon ejemplo, pero yejwan mach okimomakakej kuenta tlan Jesús okinekia ma kimatikan. Jesús yen kuale tlajpixke

⁷Jesús oksemi okinmilwij: ―Ipan melajka namechilwia, Nej nikaj kej se puerta kanik kalakij ichkamej.

⁸Nochtin akinmej owalajkej antes de Nej niwitz, oyajkej ichtekej, iwan ichkamej mach okintenkakej nijkuak okinnotzkej.

⁹Nej nikaj kej nipuerta. Iwan akin notech kalakis, momakixtis. Yetos kej se ichka katlej kalaki iwan kisa kan puerta iwan kajsi itlakual.

¹⁰’In ichtekke owalaj san para tlachtekis, san temiktia iwan san teixpoloa. Pero Nej oniwalaj para in tlakaj ma kipiakan nemilistle. Iwan yon nemilistle tentok de nochi tlamantle tlan kuale.

¹¹Yen Nej katlej nikuale nitlajpixke. In kuale tlajpixke kitemaka inemilis por yen ichkamej.

¹²Pero akin san tetlajpialia, nijkuak kita witz in koyotl, kinkajtewa in ichkamej iwan choloa, porke mach melawak tlajpixke iwan ichkamej mach iaxkawan. In koyotl kinkitzkia sekimej ichkamej iwan oksekimej kinchochololtia.

¹³Yon katlej san tetlajpialia choloa porke san tekipanoj iwan por yonik mach kinchiwa kuenta in ichkamej.

¹⁴’Yen Nej katlej nikuale nitlajpixke. Ijkón ken noPapan nechixmati iwan Nej nikixmati noPapan, no ijkón Nej nikinmixmati nochkawan iwan yejwan nechixmatij. Iwan Nej niktemaka nonemilis por yen ichkamej.

¹⁶Noijki nikinpia oksekimej ichkamej katlej mach katej ijtik yin korral, iwan moneki nikinwalwikas noijki. Yejwan nechtenkakiskej, iwan nochtin yeskej san sekan, iwan yetos san se tlajpixke.

¹⁷’NoPapan nechtlasojtla porke niktemaka nonemilis por yen nochkawan, para satepan oksemi nikajsis nonemilis nijkuak nimoyolkuis (nimoyolitis).

¹⁸Mach akaj welis nechkixtilis nonemilis, sino Nej nonewian niktemaka. Nikpia poder para niktemakas nonemilis, iwan nikpia poder para oksemi nikajsis nonemilis. Ijkón noPapan onechnawatij ma nikchiwa.

¹⁹Nijkuak in judiojtin okikakej yon tlajtole, oksemi omoxelojkej.

²⁰Miekej de yejwan okijtoayaj: ―¿Tlanik ankineltokaj tlan amechilwia? Kipia se demonio iwan kualoko.

²¹Oksekimej okijtoayaj: ―Akin kipia demonio mach ijkón nik tlapoa. Se tlakatl katlej kipia demonio mach welis kitlachialtis se katlej mach tlachia. In judiojtin mach otlaneltokakej inawak Jesús

²²Ompa Jerusalén okichijtokaj ilwitl katlej okichiwayaj kada xiwitl para kelnamikij nijkuak okiyankuilijkej in weyi tiopan. Iwan oyeka meroj nijkuak sewa.

²³Jesús ik ompa onentoka itech weyi tiopan itech Korredor de Salomón.

²⁴Ijkuakón in judiojtin okiyawalojkej iwan okitlajtlanijkej: ―¿Asta keman kuale tikmatiskej de Tej? Tla melawak yen Tej tiCristo, melajka xitechilwi.

²⁵Jesús okinnankilij: ―Yonamechilwij iwan mach annechneltokaj. In tlamantin katlej Nej nikinchiwa ika ipoder noPapan kiteititiaj nik Nej niCristo.

²⁶Pero namejwan mach annechneltokaj, porke namejwan mach annochkawan.

²⁷Nochkawan nechtenkakij, iwan Nej nikinmixmati iwan yejwan witzej nonawak.

²⁸Nej nikinmaka nemilistle katlej mach keman tlamis. Iwan mach semi mikiskej, iwan mach akaj welis nechinkixtilis.

²⁹NoPapan katlej onechinmakak nochkawan, Yej kipia okachi weyi ipoder iwan mach akaj onkaj oksé ken Yej, iwan mach akaj welis kinkixtilis.

³⁰NoPapan iwan Nej tisetitokej san se.

³¹In judiojtin oksemi okonintilankej temej para kimojmotlaskej.

³²Pero Jesús okinmilwij: ―Amoixpan nikchijtiwitz miek tlamantle ika ipoder in noPapan. ¿Tlan tlamantle mach kuale onikchij komo para ika xinechmojmotlakan ika tetl?

³³In judiojtin okinankilijkej: ―Mach timitzmojmotlaskej por tlan kuale tikchiwa. Sino porke tikixpanwia in toTajtzin Dios. Tej san tikomokiera tlakatl, iwan timochiwa kej yeskia tiDios.

³⁴Jesús okinmilwij: ―Itech namotlanawatil ijkuilitok nik in Dios okijtoj: “Nej onikijtoj, namejwan andiosmej.”

³⁵Tikmatij ke tlan kijta in tiotlajkuilole mach welis se kipatlas. Iwan Dios okintokayotij diosmej in tlakaj katlej okiresibirojkej itlajtol.

³⁶Iwan tla Dios onechpejpenke iwan onechwaltitlanke ixko yin tlaltikpak, ¿tlanik kiné, namejwan ankijtaj ke nikixpanawia in Dios por onikijtoj nik in Nej niiKone?

³⁷Tla amo nikinchiwa milagrostin ken noPapan kinchiwa, amo xinechneltokakan.

³⁸Pero tla nikinchiwa, xikinneltokakan kiné in milagrostin katlej nikinchiwa, maski amo ankineltokaj tlan namechilwia. Para xikneltokakan iwan xikmatikan nik melawak noPapan nowan kajki iwan Nej Iwan nikaj.

³⁹Oksemi okinekiaj kikitzkianij, pero Jesús okincholilij.

⁴⁰Jesús omokuepke oksemi ik ne lado de yen weyatl Jordán, kan otlakuateekiaya in Juan Tlakuateekij, iwan ompa omokaj.

⁴¹Miekej tlakaj oyajkej inawak, iwan okijtoayaj: ―Maski in Juan mach okichij itlaj milagro, nochi tlan okijtoj de yin Jesús ya nele melawak.

⁴²Iwan miekej otlaneltokakej inawak Jesús itech yon lugar.