Read Northern Oaxaca Nahuatl San Juan 11 Bible Online

San Juan 11 - Northern Oaxaca Nahuatl bible

San Juan 11

¹Oyeka se tlakatl katlej omokokoaya itoka Lázaro, katlej ochantia iwan ikniwan María iwan Marta itech pueblo de Betania.

²Yon María, ikni in Lázaro, yen katlej okiteekilij ajwiakayotl in toSeñor itech ikxiwan iwan okinwajwachilij ika itzonkal.

³Ijkón kiné, María iwan Marta otlatitlankej ma kilwitij in Jesús: ―Señor, moamigo Lázaro chikawak mokokoa.

⁴Nijkuak okikakke in Jesús okijtoj: ―Yon kokolistle mach kimiktis, sino ika moteititis iweyikixtilis in Dios. Iwan ika yon kokolistle noijki ika moteititis noweyikixtilis Nej katlej niiKone in Dios.

⁵Jesús sa tekitl okintlasojtlaya in Marta, in María iwan Lázaro,

⁶iwan maski okilwijkej nik in Lázaro chikawak mokokoa, Yej ok omokaj ome tonale kan oyeka.

⁷Satepan okimilwij imomachtijkawan: ―Ma tiwian oksemi itech estado de Judea.

⁸Imomachtijkawan okilwijkej: ―Tlamachtij, mach ya wejkika ompa in judiojtin okinekiaj mitzmiktianij ika tetl, ¿iwan oksemi tikneki tias ompa?

⁹Jesús okinmilwij: ―¿Amo kipia in tonale majtlaktle iwan ome ora? Tla se nemis nijkuak tlanestok, mach se motepotlamis porke tlanestok.

¹⁰Pero tla se nemis nijkuak tlatleyua, welis se motepotlamis porke mach tlanestok.

¹¹Satepan Jesús okinmilwij: ―In tokni Lázaro kochtok, iwan Nej nikijxitis.

¹²Imomachtijkawan okilwijkej: ―Señor, tla san kochtok, kijtosneki pajtis.

¹³Pero Jesús ijkón okijtoj porke in Lázaro yomikke, iwan imomachtijkawan okiyejyekojkej san kochi.

¹⁴Ijkuakón Jesús okinyekilwij: ―In Lázaro yomikke.

¹⁵Nipaki porke mach ompa onieka. Nipaki porke yon se kuale para amejwan para okachi xitlaneltokakan. Axan ma tiwian ma tikitatij.

¹⁶Ijkuakón in Tomás, katlej kitokayotiaj Kuatejtzin, okinmilwij in oksekimej momachtijkej: ―Tejwan noijki ma tiwian, para ma timikikan san sekan iwan Jesús. Jesús Yej teyolitia iwan Yej kitemaka nemilistle

¹⁷Nijkuak in Jesús oajsito Betania, okimatiltijkej nik in Lázaro ya kipia nawi tonale de toktok.

¹⁸Betania oyeka serka de Jerusalén, san kanaj eyi kilómetro de wejka.

¹⁹Iwan miekej judiojtin oyajkej otetlajpalotoj ichan Marta iwan María, para kinyolojchikawaskej por omikke in Lázaro.

²⁰Nijkuak in Marta okimatke nik in Jesús ya ompa witz, okiske okinamiktiaj, pero in María omokaj kalijtik.

²¹Marta okilwij in Jesús: ―Señor, tla nian tieni, nokni mach mikini.

²²Pero nej nikmati nik in Dios mitzmakas nochi tlan tiktlajtlanilis.

²³Jesús okinankilij: ―Mokni moyolkuis (moyolitis).

²⁴Marta okilwij: ―Ya nikmati nik moyolkuis nijkuak nochtin in mikkamej moyolkuiskej nijkuak sa iyakatlanka tonale.

²⁵Tonses in Jesús okilwij: ―Nej nikinyolitis in mikkamej iwan Nej nikinmakas nemilistle. Akin nechneltoka, maski mikis, moyolkuis iwan kipias nemilistle katlej mach keman tlamis.

²⁶Iwan nochtin katlej ok yolitokej iwan nechneltokaj, mach keman mikiskej. ¿Tikneltoka tlan nimitzilwia?

²⁷Marta okilwij: ―Nikneltoka, Señor. Nikneltoka nik tejwatzin tiCristo, titeKone de Dios. Yen tejwatzin katlej tejwan otikchiayaj ma wiki ixko yin tlaltikpak. Jesús ochokak

²⁸Satepan de ijkón okijtoj in Marta, oyáj okinotzato in María katlej ikni, iwan okilwij ichtaka: ―In Tlamachtij nian kajki iwan mitznotza.

²⁹Nijkuak ijkón okikakke in María, omoketewak iwan oyáj okitato in Jesús.

³⁰Jesús ayamo okalakia itech pueblo, ok oyeka kan Marta okinamikke.

³¹In judiojtin katlej oyekaj kalijtik katlej okiyolosewijtokaj in María, nijkuak okitakej in María omoketewak iwan okistewak, yejwan noijki okikistewakej iwan oyajkej ikuitlapan. Yejwan okiyejyekojkej yawi chokatij kan toktok in Lázaro.

³²Nijkuak in María oajsito kan oyeka in Jesús, omotlankuaketzke ikxitlan, iwan okilwij: ―Señor, tla nian tieni, nokni mach mikini.

³³Jesús okitak in María sa tekitl choka iwan noijki okinmitak in judiojtin noijki chokaj katlej owalayaj ikuitlapan. Ijkuakón Jesús sa tekitl omoyolkokoj iwan oyoltilinke.

³⁴Iwan okintlajtlanij: ―¿Kan nankitookakej? Yejwan okilwijkej: ―Xiwiki xikitaki, Señor.

³⁵Iwan Jesús ochokak.

³⁶Ijkuakón in judiojtin okijtojkej: ―Xikitakan sa tekitl okitlasojtlaya.

³⁷Iwan sekimej de yejwan okijtoayaj: ―Yin Jesús katlej okitlachialtij in tlakatl katlej mach otlachiaya, ¿amo owelik itlaj okichij para amo ma miki in Lázaro? Jesús okiyolitij in Lázaro

³⁸Jesús oksemi omoyolkokoj iwan omijkuanij kan toktok in Lázaro. Oyeka ijtik se mikkakuyoktle, okamatzaktoka ika se tetl patlaktik.

³⁹Iwan Jesús okijtoj: ―Xikijkuanikan in tetl. Marta ikni in mikkatl, okilwij in Jesús: ―Señor, yotzojyayak, porke yakipia nawi tonale de omikke.

⁴⁰Jesús okinankilij: ―¿Amo onimitzilwij tla tikneltokas, tikitas imawisotlanex in Dios?

⁴¹Ijkuakón okijkuanijkej in tetl. Jesús oajkopantlachixke, iwan okijtoj: ―Papan, nimitztlasojkamachilia porke tinechkaki.

⁴²Nej nikmati nik nochipa tinechkaki, iwan ijkín nikijta para ke in tlakaj katlej nian katej ma kineltokakan nik tejwatzin otinechwaltitlanke.

⁴³Nijkuak otlanke ijkón okijtoj, ijkuakón okijtoj chikawak: ―¡Lázaro, xiwalkisa!

⁴⁴Iwan Lázaro katlej omikka okiske kikimilitiwitz ika tzotzole itech ikxiwan iwan itech imawan, iwan ixkikimilitiwitz ika se tzotzole kej payoj. Iwan Jesús okinmilwij: ―Xiktotomakan iwan xikkawakan ma wia. Okitemojkej kenik kimiktiskej in Jesús

⁴⁵Ijkuakón otlaneltokakej inawak Jesús miekej judiojtin katlej otetlajpalotoj inawak María porke okitakej tlan Jesús okichij.

⁴⁶Pero sekimej de yejwan oyajkej okinmitatoj in fariseos, okinmilwitoj tlan Jesús okichij.

⁴⁷Ijkuakón in fariseos iwan in tlayekankej tiopixkej omololojkej iwan omotlapowijkej, okijtojkej: ―¿Tlan tikchiwaskej? Yin tlakatl kinchiwa miekej milagrostin.

⁴⁸Tla tikkawiliskej ijkón ma kichiwa, nochtin tlaneltokaskej inawak, iwan tekiwajkej romanostin witzej iwan kixitiniskej in toweyi tiopan katlej tlatiochiwaloj, iwan kimoaxkatiskej in topaís.

⁴⁹Pero se de yejwan katlej itoka Caifás, katlej oyeka weyi tiopixke itech yon xiwitl, okinmilwij: ―Namejwan mach itlaj ankimatij.

⁵⁰Nion mach ankimomakaj kuenta nik okachi kuale para tejwan ma miki se tlakatl por nochtin in tlakaj, ke ma timikikan tinochtin tejwan tijudiojtin.

⁵¹Pero tlan okijtoj in Caifás mach okiske de yej itlayejyekolis, sino komo oyeka weyi tiopixke itech yon xiwitl, Dios okitlajtoltij in Caifás nik in Jesús mikis por yen judiojtin.

⁵²Iwan amo mikis san por yen judiojtin, sino noijki mikis para kinmololos nochtin ikonewan Dios katlej xintokej ixko nochi in tlaltikpak.

⁵³Desde yon tonale in tekiwajkej judiojtin opéj kitemoaj kenik kimiktiskej in Jesús.

⁵⁴Por yonik in Jesús mach ok omonextiaya inmixpan in judiojtin. Sino okiske de itech yon región de Judea iwan oyáj itech se pueblo itoka Efraín, katlej kajki serka kan tlawaki. Iwan ompa omokaj iwan imomachtijkawan.

⁵⁵Opoliwia sa kanaj keski tonale para ajsiki imilwiw in judiojtin katlej itoka pascua. Miekej tlakaj de miekej pueblojtin yowalajtokaj Jerusalén para mochipawaskej de intlajtlakol antes de pewas yon ilwitl de pascua.

⁵⁶Ijkuakón okitemoayaj in Jesús, iwan nijkuak yoyekaj nochtin itech weyi tiopan omotlajtlaniayaj: ―¿Tlan ankiyejyekoaj? ¿Kox witz ilwitl in Jesús, o noso amo?

⁵⁷In fariseos iwan in tlayekankej tiopixkej otlanawatijkej tla akaj kimatis kanin kajki in Jesús, ma kinmatilti, para kikitzkiskej.