Read Northern Oaxaca Nahuatl San Juan 2 Bible Online

San Juan 2 - Northern Oaxaca Nahuatl bible

San Juan 2

¹Owiptlatik, omochij se ilwitl kan monamiktiaj itech pueblo de Caná itech estado de Galilea. Ompa oyeka imaman in Jesús.

²Noijki okinminbitarojkej in Jesús iwan imomachtijkawan itech yon ilwitl.

³Iwan nijkuak otlanke in vino, imaman in Jesús okilwij: ―Mach ok kipiaj vino.

⁴Jesús okinankilij: ―Tejwatzin nanan, mach moneki xinechilwi tlanon moneki nikchiwas. Mach ya ajsi ora para pewas nitekipanos.

⁵Imaman okinmilwij katlej otlaserbirojtokaj: ―Xikchiwakan nochi tlan Yej amechilwis.

⁶Ompa oyekaj chikuasen wejweyin xoktzinmej katlej ika okitlaliayaj atl in judiojtin, para ika omomajtekiayaj kej se kostumbre para omochipawayaj inawak Dios. Ijtik kada se xoktzin oakia kanaj se sien litros de atl.

⁷Jesús okinmilwij in tlaserbirojkej: ―Xikintemitikan yinmej xoktzinmej ika atl. Yejwan okintemitijkej asta otenkej.

⁸Iwan Jesús okinmilwij: ―Axan xikixtikan achitzin, iwan xikitkilikan in tlakatl katlej tlayekanke de yen tlaserbirojkej. Okitkilijkej kiné.

⁹In yon tlayekanke okiyekoj in atl katlej omokuepke vino, mach okimatia de kan owalaj, san yen katlej tlaserbiroaj katlej okixtijkej atl okimatiaj de kan owalaj. Iwan ijkuakón in tlayekanke okinotzke in novio.

¹⁰Okilwij: ―Nochtin in tlakaj kitemaka achtoj katlej kuale vino, iwan nijkuak ya miek yokonikej, ijkuakón kitemakaj katlej okachi barato. Pero tejwatzin otikaj katlej kuale vino para satepan tiktemakas.

¹¹Yen yin katlej yakinika milagro okichij in Jesús itech pueblo de Caná de Galilea. Ika yon milagro okiteititij ipoder. Iwan imomachtijkawan otlaneltokakej inawak.

¹²Satepan de yon, Jesús oyáj para Capernaum, ompa opanok kanaj keski tonale iwan imaman, iwan ikniwan, iwan imomachtijkawan. Jesús okinkixtij in tlanamakakej de ijtik in weyi tiopan

¹³Nijkuak yoajsia inmilwiw in judiojtin katlej itoka pascua, Jesús oyáj para Jerusalén.

¹⁴Iwan okinmitajsik ijtik in weyi tiopan in bakajnamakakej, in ichkanamakakej, in palomasnamakakej, iwan in tominpatlakej katlej ompa oewatokaj itech inmesa.

¹⁵Jesús okichij se chikotejmekatl, iwan okinkixtij de kan patio de yen weyi tiopan ika nochi inmichkawan iwan inbakajwan. Okinxoyawilij intomin in tominpatlakej, iwan okintlatlamochilij inmesajwan.

¹⁶Jesús okinmilwij in palomasnamakakej: ―Xikinkixtikan namopalomaswan de nian. Amo xikkuepakan kej se tiankistle ikalijtik in noPapan.

¹⁷Ijkuakón okelnamikej imomachtijkawan nik in tiotlajkuilole kijta: “Sa tekitl niktlasojtla mokalijtik ika nochi noyolo.”

¹⁸In judiojtin okitlajtlanijkej: ―¿Kenik otimixewij otikinkixtij? Tla Dios omitzilwij ijkón xikchiwa, xitechititi kiné se milagro.

¹⁹Jesús okinnankilij: ―Xikxitinikan yin weyi tiopan iwan san ika eyi tonale oksemi nikchiwas.

²⁰In judiojtin okijtojkej: ―Yin weyi tiopan omochij ika omenpoale iwan chikuasen xiwitl. ¿Iwan Tej san ika eyi tonale tikneki tikchiwas oksemi?

²¹Pero in weyi tiopan de katlej Jesús okijtoaya, kijtosneki yen itlalnakayo.

²²Por yonik, nijkuak omoyolkuik oksemi satepan de omikke, imomachtijkawan okelnamikej yon tlan okijtoj, iwan okineltokakej tlan kijta in tiotlajkuilole iwan tlan Jesús okinmilwij. Jesús kinmixmati nochtin in tlakaj ipan inyolo

²³Iwan nijkuak Jesús oyeka Jerusalén itech ilwitl de pascua, miekej otlaneltokakej inawak porke okitakej wejweyin señalestin okinchiwaya.

²⁴Pero Jesús mach okinneltokiliaya, porke Yej kuale okinmixmatia nochtin ipan inyolo.

²⁵Mach omonekia akaj ma kilwi tlanon kiyejyekoaj in tlakaj, porke Yej inewian yokimatia tlanon kiyejyekoaj.