Read Northern Oaxaca Nahuatl San Juan 7 Bible Online

San Juan 7 - Northern Oaxaca Nahuatl bible

San Juan 7

¹Satepan de yon, Jesús onemia itech estado de Galilea. Mach okinekia nemis itech estado de Judea, porke in tlayekankej judiojtin okinekiaj kimiktiskej.

²Iwan yoajsia inmilwiw in judiojtin itoka tabernáculos.

³Ikniwan Jesús okilwijkej: ―Amo nian ximokawa. Xiwia Judea, para ijkón momomachtijkawan katlej ompa katej ma kinmitakan noijki in milagrostin katlej Tej tikinchiwa.

⁴Nijkuak akaj tlakatl kineki ma kixmatikan mach kichiwa itlaj tlamantle san ichtaka sino kichiwa teixpan. Tonses, in Tej moneki xikchiwa inmixpan nochtin in tlakaj para ijkón nochtin ma kitakan tlan tikchiwa.

⁵Nion yen ikniwan mach okineltokayaj.

⁶Iwan Jesús okinmilwij: ―Mach ya ajsi tonale para nias ompa, pero para amejwan san katlij yej tonale welis anyaskej.

⁷In tlaltikpaktlakaj mach welis amechkokoliskej namejwan. Pero Nej nechkokoliaj, porke Nej nikinmilwia nik yejwan kichiwaj tlan mach kuale.

⁸Namejwan xiwian ilwitl. Nej mach nias, porke mach ya ajsi tonale para nias ompa.

⁹Iwan satepan de ijkón okinmilwij, Jesús ompa omokaj itech estado de Galilea. Jesús oyáj itech ilwitl itoka tabernáculos

¹⁰Satepan de ijkuak yoyajkej ikniwan, Jesús noijki oyáj itech yon ilwitl, oyáj san ichtaka para amo ma kitakan nochtin tlakaj.

¹¹In tlayekankej judiojtin okitemoayaj ompa itech ilwitl, iwan okijtoayaj: ―¿Kanin kajki in yon tlakatl itoka Jesús?

¹²Nochtin tlakaj omotlapowiayaj de Yej. Sekimej okijtoayaj: “Jesús kuale tlakatl.” Iwan oksekimej okijtoayaj: “Jesús mach kuale, san kinkajkayajtinemi in tlakaj.”

¹³Pero mach akaj otlapoaya de Yej inmixpan tlakaj porke okinmiimakasiaj in tlayekankej judiojtin.

¹⁴Iwan nijkuak ya tlajko yawi in yon ilwitl, Jesús okalakke ijtik in weyi tiopan iwan ompa opéj tlamachtia.

¹⁵In judiojtin sa omotlajtlachialtiayaj (omomajmawtiayaj) iwan okijtoayaj: ―¿Kenik in yin tlakatl wel kimati miek iwan nion amo omoixtlamachtij?

¹⁶Jesús okinnankilij: ―Notlamachtilis mach kisa de Nej, sino yon witz de noPapan Dios katlej onechwaltitlanke.

¹⁷Tla akaj kineki kichiwas tlan Dios kimonekiltia, welis kimomakas kuenta nik notlamachtilis witz de Dios, iwan mach de Nej.

¹⁸Akin tlapoa san de yej itlayejyekolis, kijtosneki kineki ma kiweyikixtikan. Pero Nej nikneki nikweyikixtis katlej onechwaltitlanke. Nej nikijta tlan melawak, iwan mach nitlakajkayawa.

¹⁹’Moisés oamechmakak namejwan in tlanawatile pero nion se de amejwan mach kichiwa tlan kijta yon tlanawatile. ¿Tlanik namejwan ankinekij annechmiktiskej?

²⁰In tlakaj okinankilijkej: ―Tej tikpia demonio. ¿Akin kineki mitzmiktis?

²¹Jesús okinmilwij: ―Aminochtin sa anmotlajtlachialtijkej (omomajmawtijkej) san por onikpajtij se kokoxke nijkuak weyi tonale.

²²Moisés oamechilwij xikchiwakan in sirkunsisión (maski mach yen Moisés okipewaltij in sirkunsisión sino katlej ya wejkawitl iweyitajwan). Iwan namejwan ankisirkunsidaroaj se chokotzin maski ma yeto weyi tonale.

²³Axan kiné, tla namejwan ankisirkunsidaroaj se chokotzin nijkuak weyi tonale porke itech yon tonale okitokaroj mosirkunsidaros, namejwan maski ma yeto weyi tonale ankisirkunsidaroaj porke ankinekij anmokawaskej kuale itech itlanawatil in Moisés. ¿Tlanik kiné namejwan ankualanij nonawak por onikpajtij se tlakatl nijkuak weyi tonale?

²⁴Amakaj xikistlakawikan san por ankinekiliskej. Sino xikistlakawikan tla melawak ankimatij nik mach kuale tlan okichij. Jesús okijtoj de kan owalaj

²⁵Sekimej katlej ochantiaj Jerusalén okijtoayaj: ―¿Amo yen yin tlakatl katlej kitemojtinemij para kimiktiskej?

²⁶Xikitakan, tlapojtok inmixpan nochtin in tlakaj, iwan mach akaj itlaj kilwia. ¿Xamo in tekiwajkej melawak yokineltokakej nik in yin tlakatl yen Cristo?

²⁷Pero tejwan tikmatij de kan owalaj in yin tlakatl. Iwan nijkuak witz in Cristo, mach akaj kimatis de kan witz.

²⁸Jesús ok otlamachtijtoka ijtik in weyi tiopan, iwan nijkuak ijkón okikakke, okijtoj chikawak: ―Namejwan annechixmatij iwan ankimatij de kan oniwalaj. Nej amo oniwalaj san por Nej nikneki, sino oniwalaj porke onechwaltitlanke in Dios katlej itech onkaj tlan melawak, iwan katlej namejwan mach ankixmatij.

²⁹Pero Nej nikixmati porke Nej oniwalaj de Yej inawak, iwan Yej onechwaltitlanke.

³⁰Por yonik okinekiaj kikitzkianij. Pero amakaj okikitzkij porke mach ya oajsia in tonale para kikitzkiskej.

³¹Iwan miekej otlaneltokakej inawak, iwan okijtoayaj: ―Tejwan tikneltokaj nik yen yin Cristo porke mach akaj oksé welis witz iwan kinchiwas okachi wejweyin milagrostin ken yin Jesús. In fariseos okintitlankej sekimej mayoltin para ma kitzkikan in Jesús

³²In fariseos okikakej tlan okijtoayaj in tlakaj de yen Jesús. Ijkuakón in tlayekankej tiopixkej iwan in fariseos okintitlankej sekimej mayoltin para ma kikitzkikan in Jesús.

³³Iwan Jesús okijtoj: ―Sa kanaj keski tonale namowan nietos, iwan satepan nimokuepas inawak noPapan Dios katlej onechwaltitlanke.

³⁴Namejwan annechtemoskej, pero mach annechajsiskej. Porke kan Nej nias, namejwan mach welis anyaskej.

³⁵In judiojtin opéj motlajtlaniaj entre yejwan: ―¿Kanin yas iwan amo welis tikajsiskej? ¿Kox yas innawak in tojudiojikniwan katlej chantitokej ipan intlal in griegojtin? ¿Kox yas kinmachtitij in griegojtin?

³⁶¿Tlan kijtosneki tlan kijta: “Annechtemoskej, pero mach annechajsiskej, porke kan Nej nias, namejwan mach welis anyaskej”? Ameyale katlej kitemaka yankuik nemilistle

³⁷In sa iyakatlanka tonale de yon ilwitl, katlej okachi weyi tonale, Jesús omoketzke iwan okijtoj chikawak: ―Tla akaj amiki, ma wiki nonawak iwan ma atli.

³⁸Tla akaj nechneltokas, tonses ipan iyolo meyas atl katlej kitemaka yankuik nemilistle, ijkón ken kijta in tiotlajkuilole.

³⁹Jesús ijkón okijtoj kijtosneki akinmej kineltokaskej in Jesús kiresibiroskej in Espíritu Santo. Ijkuakón ayamo owalaya in Espíritu Santo porke in Jesús mach ya oyaya ilwikak para kiweyikixtiskej. In tlakaj omoxelojkej

⁴⁰Sekimej de yonmej tlakaj nijkuak ijkón okikakej okijtojkej: ―Ipan melajka yin yen profeta katlej otikchixtokaj ma wiki.

⁴¹Iwan oksekimej okijtoayaj: ―Yin yen Cristo. Pero sekimej okijtoayaj: ―Amo. Mach yen Cristo. Porke in Cristo mach witz de Galilea.

⁴²In tiotlajkuilole kijta nik in Cristo kipia de witz nelwatl de yen rey David. Iwan noijki kijta nik witz de pueblo de Belén kan ochantia in David.

⁴³Por yonik in tlakaj omoxelojkej por yen Jesús.

⁴⁴Sekimej de yejwan okinekiaj kikitzkianij. Pero mach akaj okikitzkij. In tlayekankej judiojtin mach okineltokakej in Jesús

⁴⁵In mayoltin oyajkej innawak in tlayekankej tiopixkej iwan innawak in fariseos. Iwan yejwan okintlajtlanijkej in mayoltin: ―¿Tlanik mach ankiwalwikakej?

⁴⁶In mayoltin otlanankilijkej: ―Mach keman tikkakij akaj tlakatl ijkón nik tlapoa.

⁴⁷Tonses in fariseos okinmilwijkej in mayoltin: ―¿Noijki namejwan yoamechkajkayaj?

⁴⁸¿Kox ya ankitakej akaj de totekiwajkawan o noso akaj de tejwan tifariseos yotitlaneltokakej inawak Jesús?

⁴⁹Pero nekatej tlakaj katlej mach kixmatij in tlanawatile de Moisés iwan tlaneltokaj inawak yon Jesús, Dios kintlajtlakoltis.

⁵⁰Nicodemo, katlej okachi achtoj oyáj de yuak okitato in Jesús, iwan katlej oyeka noijki fariseo, okinmilwij:

⁵¹―Totlanawatil kijta nik mach welis tiktlajtlakolmamaltiskej se tlakatl san tekitl, tla mach achtoj tikyolkuitiaj para tikmatiskej tlan okichij.

⁵²Iwan yejwan okilwijkej: ―¿Tej noijki xamo tiwitz de Galilea? Xiktemo itech tiotlajkuilole iwan tikmomakas kuenta nik mach keman kisas nion se profeta de Galilea.

⁵³Ijkuakón kada se de yejwan oyajkej para inchan.