Read Northern Oaxaca Nahuatl Hechos 2 Bible Online

Hechos 2 - Northern Oaxaca Nahuatl bible

Hechos 2

¹Nijkuak oajsiko ilwitl de Pentecostés, nochtin oyekaj san sekan itech se kale.

²Iwan ijkuakón owaltlakokuyokak, kej se ejekatl chikawak, omokakke owalaya de ilwikak. Iwan okiwiwixoj nochi in kale kan yejwan oyekaj.

³Iwan owalmonextijkej sekimej tlimej iwan omoxexelojkej ipan kada se de yejwan.

⁴Iwan nochtin otenkej de Espíritu Santo iwan opéj tlapoaj ika oksekimej tlajtoltin. Iwan okijtoayaj tlan Espíritu Santo okintoktiaya ma kijtokan.

⁵Itech yonmej tonaltin oyekaj Jerusalén miekej judiojtin katlej sa tekitl omotemaktiayaj inawak Dios. Yonmej judiojtin owalajkej de nian nepa ixko yin tlaltikpak.

⁶Nijkuak okikakej owaltlakokuyokak, san niman omololojkej miekej iwan mach ok okimatiaj tlan kijtoskej, porke kada se de yejwan tlatitlaniltin opéj kintlapowiaj in tlakaj ika de yejwan intlajtol.

⁷Melajka sa otlajtlachixkej (omomajmawtijkej), iwan okimolwiayaj: ―¿Amo owalajkej de Galilea nochtin yinmej katlej tlapojtokej?

⁸Pero kada se de tejwan tikinkakij techtlapowiaj ika totlajtol, ¿kenik welij? Tejwan otiwalajkej de miekan paismej de ixko yin tlaltikpak.

⁹Sekimej owalajkej de país de Partia, de Media, de Elam, de Mesopotamia, de Judea, de Capadocia, de Ponto iwan de Asia,

¹⁰noijki nian katej sekimej de Frigia, de Panfilia, de Egipto iwan de regionmej de Africa kanik kajki in pueblo de Cirene. Noijki nian katej sekimej de Roma katlej nian chantij. Sekimej de yejwan yipa judiojtin desde otlakatkej, iwan oksekimej okalakej itech intiotlamachtil in judiojtin.

¹¹Noijki owalajkej sekimej de Creta iwan de Arabia. Tinochtin tikinkakij in yinmej tlatitlaniltin tlapoaj kada se de yejwan ika totlajtol. Techinkakitiaj miekej tlamantin wejweyin de tlan Dios kichiwa.

¹²Nochtin sa otlajtlachiayaj (omomajmawtiayaj) iwan mach ok okimatiaj tlan kijtoskej, iwan omotlajtlaniayaj: ―¿Tlan kijtosneki nochi yin tlan tlamochijtok?

¹³Pero sekimej okinpinawiayaj, okijtoayaj: ―¡Yinmej iwintij! Pedro omoketzke iwan otlapoj

¹⁴Ijkuakón Pedro omoketzke inwan oksekimej majtlaktin iwan se tlatitlaniltin, iwan chikawak okijtoj: ―Judiojtin iwan nochtin katlej nian chantij Jerusalén, xikkakikan iwan xikmatikan kuale nochi tlan namechilwis.

¹⁵Yinmej mach iwintij ken namejwan ankijtaj, porke wel ok kualkan, yakin las nuebe.

¹⁶Nian tlamochijtok tlan ya wejkawitl okijtoj in profeta Joel:

¹⁷Dios kijta:Ijkín tlapanos itech nekatej sa iyakatlanka tonaltin.Niktitlanis noEspíritu intech nochtin tlaltikpaktlakaj.Namopilwan kijtoskej tlan satepan tlapanos.In telpokamej kitaskej itlaj kej yeskia teemiktokej,iwan in tetajtzitzintin kikochteemikiskej tlan tlapanos.

¹⁸Noijki nikinnokilis noEspíritu katlej notekipanojkawan,nikinnokilis in tlakaj iwan siwamej itech nekatej tonaltin,iwan kitenkixtiskej in tiotlajtole tlan Dios kinmakas.

¹⁹De itech ilwikak nikinnextilis wejweyin señalestin,iwan ipan yin tlaltikpak nikinnextilis señalestin ika estle, ika tlitl iwan ika mixpoktle.

²⁰In tonale mach ok tlawis,iwan in metztle chichiliwias kej estle,antes de ajsiki in weyi tonale de toSeñor.

²¹Iwan nochtin akinmej kitlajtlaniliskej in toSeñor ma kinmakixti, in Señor kinmakixtis.

²²’Xikkakikan kiné tlakaj de Israel tlan namechilwis: Jesús de Nazaret, Dios okipejpenke. Namejwan kuale ankimatij porke Jesús okipixke miek poder para okinchij milagrostin iwan señalestin anmoixpan.

²³Namejwan ankikitzkijkej iwan ankitemaktijkej (onkitemaktilijkej) inmak in tlakaj tlajtlakolejkej, iwan ankimiktijkej itech krus, ijkón ken Dios yokimatia iwan okinekke ijkón ma pano.

²⁴Pero Dios okiyolitij iwan okimakixtij de itech mikilistle. Porke in mikilistle mach owelik okitlanke in Jesús iwan Yej omoyolkuik oksemi.

²⁵Achtoj in rey David otlajtoj de yen Jesús, okijtoj:Nochipa onikitaya in Señor noyakapan.Yej ik noyekma, mach akaj welis itlaj nechtoktis.

²⁶Por yonik niyolpaki, iwan noten tlakuika ika pakilistle.Maski nimelatok, nikmati nik nimoyolkuis (nimoyolitis).

²⁷Porke amo tikkawas noanima kan tliko,nion amo tikkawas ma ijtlakawi notlalnakayode Nej nimochipawkaKone.

²⁸Otinechititij in kuale ojtle kan nias para nikpias nemilistle nochipa,iwan nikpias miek pakilistle nijkuak nietos mowan.

²⁹’Nokniwan, nikneki namechilwis nik in rey David omikke iwan okitookakej, iwan asta axan tikmatij kanin toktok.

³⁰David oyeka profeta, iwan okimatia nik in Dios okilwij ipan melajka, nik kitlalis se Rey se de iwejkaixwi katlej satepan motlalis itech isiya para tlanawatis.

³¹Ijkón kiné, kej yeskia okonitoka, David otlajtoj de kenik moyolkuini in Cristo. Okijtoj nik in Dios mach kikawani kan tliko iwan itlalnakayo mach ijtlakawini.

³²Ijkón kiné, Dios yokiyolitij in Jesús, iwan tejwan titlatitlaniltin tinochtin otikitakej.

³³Yej omoyolkuik ika poder para omotlalij ik iyekma in toTajtzin Dios, yen toTajtzin Dios okimakak in Espíritu Santo katlej achtoj Jesús okijtoj techwaltitlanilis, iwan axan Yej yotechnokilij iEspíritu katlej namejwan axan ankitaj iwan ankikakij.

³⁴Porke mach yen David katlej otlejkok ilwikak, porke yej inewian okijtoj:In Dios okilwij in noSeñor:“Ximotlali ik noyekma,

³⁵asta ijkuak Nej nimitztlalis titlayekanke de yejwan katlej mitzkokoliaj.”

³⁶’Tlakaj de Israel, kuale xikmatikan iwan ipan melajka, nik in Jesús katlej ankimajmasoltijkej itech krus. Dios okitlalij para ma yeto yen toSeñor iwan yen Cristo.

³⁷Nijkuak okikakej yon tlajtole katlej ompa oololitokaj, sa tekitl omoyolkokojkej, iwan okitlajtlanijkej in Pedro iwan oksekimej tlatitlaniltin: ―Tokniwan, ¿tlan moneki tikchiwaskej?

³⁸Pedro okinnankilij: ―Ximoyolkuepakan inawak Dios iwan ximokuateekikan kada se de amejwan ika itoka in toSeñor Jesucristo, para ijkón Dios amechtlapojpolwis de amotlajtlakol, iwan ijkón Yej amechtliokolis iEspíritu Santo.

³⁹Dios okisentlalij amechmakas iEspíritu Santo namejwan iwan namopilwan, iwan noijki nekatej tlakaj katlej katej wejka. Kijtosneki nochtin in tlakaj katlej Dios kinnotzas ma yekan iaxkawan.

⁴⁰Pedro okintlapowij ika okachi oksekin tlajtole iwan okinyekilwij: ―¡Amo inwan ximonelokan in tlakaj katlej mach kinekij kikakiskej in melajkayotl!

⁴¹Ijkón kiné, katlej okineltokakej tlan okijtoj in Pedro, omokuateekijkej. Iwan yon tonale omajxitijkej oksekimej tlaneltokakej kej eyi mil tlakaj.

⁴²Nochtin omotekipachoayaj de tlan okinmachtiayaj in tlatitlaniltin, iwan okimoxejxeliliayaj nochi tlan okipiayaj, omotiotzajtziliayaj iwan omololoayaj para kisepankuaskej in pan para kelnamikiskej imikilis in Jesús. Kenik omoyekwikayaj katlej achtoj okineltokakej in Cristo

⁴³Miekej milagrostin iwan señalestin okinchiwayaj in tlatitlaniltin. Iwan nochtin in tlakaj opéj momawtiaj.

⁴⁴Nochtin in tlaneltokakej omoyekwikayaj iwan okipiayaj san se inyolo, iwan okimoxejxeliliayaj tlan okipiayaj.

⁴⁵Okinnamakayaj intlalwan iwan nochi tlan okipiayaj iwan okinpalewiayaj katlej mach itlaj okipiayaj.

⁴⁶Nochipa omololoayaj kan weyi tiopan, iwan itech inkajkalijtik okisepankuayaj in pan para kelnamikiskej imikilis in Jesús, iwan osepantlakuayaj ika pakilistle,

⁴⁷iwan okiweyikixtiayaj in toTajtzin Dios. Iwan nochtin in tlakaj okintlakitayaj in tlaneltokakej, iwan nochi tonale omomiekiliayaj katlej toSeñor okinmakixtiayaj de intlajtlakol.