Read Northern Oaxaca Nahuatl Hebreos 2 Bible Online

Hebreos 2 - Northern Oaxaca Nahuatl bible

Hebreos 2

¹Por yonik moneki okachi ma tiktlalikan kuidado de yen tlajtole katlej yotikkakej, para amo timopoloskej de itech iojwi in toTajtzin Dios.

²Tikmatij nik in tlanawatiltin katlej Dios okintemakak ya wejkawitl por medio de yen angelestin omochij ijkón ken okijtoaya in tlanawatile, iwan akinmej amo okineltokakej in yonmej tlanawatiltin iwan otlajtlakojkej, yejwan otlajyowijkej ken omonekia.

³Tonses, ¿kenik welis timomakixtiskej de itech ikualanilis in Dios tla amo tikchiwaskej kuenta tlan Dios yokichij por tejwan para otechmakixtij? Porke achtoj yen toSeñor Jesucristo okinmilwij in tlakaj nik techmakixtis de totlajtlakol, iwan satepan in tlakaj katlej ijkón okikakej noijki otechmatiltijkej nik techmakixtis.

⁴Dios noijki otechmatiltij nik in yon melawak, otechmatiltij ika tlamawisoltin, ika señalestin, ika miekej milagrostin, iwan ika poder katlej kitemaka in Espíritu Santo ijkón ken Dios kimonekiltia kitemaka. Cristo omochij tlakatl para techmakixtis

⁵Dios mach okintlalij in angelestin para ma tlanawatikan itech nekáj tlaltikpak katlej satepan yetos.

⁶Sino, se lado itech tiotlajkuilole akaj ijkín okijtoj:¿Tlan ipatij in tlakatl, tejwatzin Dios, komo para xikchiwa kuenta?O noso, ¿tlan ipatij in tlakatl, komo para ximotekipachoj por yej?

⁷San kanaj keski tonale tejwatzin otikchij in tlakatl okachi tzikitzin ke yen angelestin.Pero otikchij ma weyikisto (weyitito) iwan ma kitlakitakan,iwan otiktlalij ma tlanawati itech nochi tlamantle tlan otikchij.

⁸Nochi tlamantle tlan otikchij otikmakak yen tlakatl ma kinawati. Tonses, tla Dios okimakak in tlakatl nochi tlamantle ma kinawati, kijtosneki mach onkaj nion itlaj tlamantle katlej amo ma kinawati. Pero mach ya tikitaj ya kinawatia nochi tlamantle porke ayamo ajsi in tonale para ijkón tlapanos.

⁹Pero tikitaj ke Jesús, katlej Dios okitlalij okachi tzikitzin ke yen angelestin san kanaj keski tonale, axan Yej okachi weyikistok (weyititok) iwan okachi kitlakitaj porke otlajyowij iwan omikke. Dios ika weyi iteiknotlamachilis ijkón okichij ma pano in toSeñor Jesús por tinochtin tejwan titlaltikpaktlakaj.

¹⁰Ijkón omonekia kichiwas in Dios, porke nochi tlamantle tlan onkaj okichij para Yej. Iwan por Yej onkaj nochi tlan okichij. Yej okinekke kinwalwikas miekej ipilwan para ma yekan itech imawisotlanex. Iwan por yonik Dios okikawilij in Jesús ma tlajyowi, para ijkón omochij se kuale tlayekanke katlej welis techmakixtis de totlajtlakol.

¹¹Tejwan katlej Jesús yotechchipaj, Yej iwan tejwan tikpiaj san se toPapan. Iwan por yonik in Jesús mach pinawa de technotza tiikniwan.

¹²Jesús kilwia iPapan, ijkín:Nikintlapowis nokniwan de tejwatzin,iwan nimitzweyikixtis ika tlakuikale kan mololoaj in tlaneltokakej.

¹³Noijki kijta:Niktlalis notlaneltokalis inawak Dios. Iwan noijki kijta:Nian nikaj inwan ikonewan Dios katlej onechinmakak.

¹⁴Tonses, tejwan katlej titekonewan de Dios, tinochtin tikpiaj totlalnakayo iwan toomio. Iwan Jesús noijki okipixke itlalnakayo iwan iomio ijkón ken tejwan tikpiaj, para ijkón owelik okitlanke ika imikilis katlej okipiaya poder para temiktis, kijtosneki yen diablo.

¹⁵Jesús owalaj ken se tlakatl para ke nochtin in tlakaj katlej nochipa omomawtiayaj mikiskej ayakmo ma momawtikan. Yon kej yeskia okintotonke de kan oilpitokaj.

¹⁶Kuale tikmatij nik in Jesús mach owalaj okinpalewiko in angelestin, sino owalaj okinpalewiko iwejkaixwiwan in Abraham.

¹⁷Iwan por yonik in Jesús okipiaya de yetos ijkón ken tejwan, tiikniwan. Para ijkón owelik omochij weyi tiopixke katlej teiknomatke iwan kichiwa nochi tlan Dios kineki. Jesús omochij tlakatl para ijkón owelik omotemaktij (omotemaktilij) ijkón ken nijkuak okimiktiliayaj se yolkatl in toTajtzin Dios para okintlapojpolwiaya in tlakaj, Jesús no ijkón omotemakak para owelik otechtlajtlakolkixtij tejwan katlej tikatej kej ipueblo.

¹⁸Jesús noijki otlajyowij iwan in Amo Kuale Tlakatl okinekia kitoktiani ma tlajtlako, por yonik in Jesús axan kuale kimati kenamij tikmachiliaj nijkuak titlajyowiaj iwan nijkuak in Amo Kuale Tlakatl techyoltilana para ma titlajtlakokan, iwan axan noijki in Jesús welis techpalewis porke Yej kipia poder.