Read Northern Oaxaca Nahuatl Hebreos 3 Bible Online

Hebreos 3 - Northern Oaxaca Nahuatl bible

Hebreos 3

¹Por yonik, nokniwan, namejwan katlej anchipawakej, Dios oamechnotzke para xiekan iaxkawan, por yonik namotlayejyekolis ma yeto inawak Cristo Jesús. Dios okiwaltitlanke in Jesús ixko yin tlaltikpak para ma yeto yen toweyi tiopixke para ma techpalewi tejwan katlej titlaneltokaj inawak.

²Jesús okichij nochi in tekitl de weyi tiopixke katlej Dios okimakak ma kichiwa, ijkón ken Moisés noijki okichij nochi in tekitl katlej Dios okimakak ma kichiwa innawak in tlakaj de Israel, katlej katej kej ifamilia in toTajtzin Dios.

³Pero moneki okachi tikweyikixtiskej in Jesús iwan amo yen Moisés. Porke akin kichiwa se kale, okachi kiweyikixtiaj in kalchij iwan amo yen kale.

⁴Kada se kale kichiwa akaj tlakatl, pero Dios yen kichiwa nochi tlan onkaj.

⁵Moisés okitlakitakej kej se kuale tekipanoj porke okichij nochi in tekitl katlej Dios okimakak ma kichiwa innawak in tlakaj de Israel katlej katej kej ifamilia in toTajtzin Dios, iwan okijtoj tlanon Dios kichiwas satepan.

⁶Pero Cristo mach san tekipanoj, sino Yej iKone in Dios iwan okichij nochi tlan Dios okilwij ma kichiwa itech ikonewan Dios. Iwan ikonewan Dios yen tejwan tla melawak titlaneltokatoskej iktlanke (ik tlami), iwan tla melawak tikmatij tikchiaj ika pakilistle tlan Dios techmakas satepan. Ikonewan Dios mosewiskej inawak

⁷Por yonik, ken kijta in Espíritu Santo itech tiotlajkuilole:Tla namejwan axan annechkakiliskej notlajtol,

⁸mach anyoltlakuawaskej ken nekatej katlej onechixnamikej ne kan tlawaki,iwan okajkej se lado tlan onikinmilwij iwan por yonik onechkualanijkej.

⁹Ompa kan tlawaki in ya wejkawitl namoweyitajwan onechnonotzkej para kitaskej tlanon nikchiwas,maski ipan omenpoale xiwitl Nej onikinmititij miek tlamantle ika nopoder.

¹⁰Por yonik onikualanke innawak in yonmej tlakaj,iwan onikijtoj: “Yonmej tlakaj nochipa moyolpolojtinemij,iwan mach kinekij kixmatiskej noojwi.”

¹¹Por yonik onikualanke iwan oniksentlalij onikijtoj,nik mach kalakiskej kan Nej yonitlayektlalij para mosewiskej.

¹²Por yonik, nokniwan, xikpiakan kuidado de amo ankipiaskej namoyolo mach kuale para amo ankikawaskej de ankineltokaskej in toTajtzin Dios, iwan amo anmoxeloskej de inawak Dios katlej yolitok.

¹³Sino, ximoyolojchikawakan nochipa se iwan oksé, mientras ok anwelij, para amo ma amechkajkayawa in tlajtlakole iwan amo ma amechtokti xiyoltlakuawakan.

¹⁴Porke tla titlaneltokatoskej inawak Dios asta ijkuak timikiskej ijkón ken achtoj otitlaneltokakej, tonses in Dios techmakas tlan techtokaroa san sekan iwan Cristo.

¹⁵Por yonik xikelnamikikan in tiotlajkuilole katlej kijta:Tla axan namejwan annechkakiliaj notlajtol,mach anyoltlakuawaskej ken nekatej katlej onechixnamikej.

¹⁶¿Akinmej yonmej katlej okikakej itlajtol in Dios iwan satepan okixnamikej? Pues nochtin katlej Moisés okinkixtij de itech país de Egipto.

¹⁷¿Iwan akinmej innawak okualanke in toTajtzin Dios omenpoale xiwitl? Pues innawak nochtin katlej otlajtlakojkej katlej omikkej ne kan tlawaki.

¹⁸¿Iwan akinmej okinmilwij in toTajtzin Dios nik mach kalakiskej kan Yej yotlayektlalij para mosewiskej? Pues yejwan katlej mach okitlakitakej.

¹⁹Tonses tikmomakaj kuenta nik in yejwan mach okalakej porke mach okineltokakej tlan Dios okinmilwiaya.