Read Northern Oaxaca Nahuatl Apocalipsis 19 Bible Online

Apocalipsis 19 - Northern Oaxaca Nahuatl bible

Apocalipsis 19

¹Satepan de yon, onikinkakke miekej otlajtoayaj chikawak ompa ilwikak. Okijtoayaj:Ma tikweyikixtikan in toTajtzin Dios porke Yej techmakixtia.Ma tikweyikixtikan porke Yej kipia weyi ipoder.

²Yej tlaixkomaka (tlatzonmanas) ika melajkayotl ijkón ken moneki.Yokitlajyowiltij in siwatl katlej weyi momekatij,katlej ika imomekatilis okinmijtlakoj in tlaltikpaktlakaj.Dios yokikuepaltij in siwatl momekatij inmikilis de yen itekipanojkawan in Dios.

³Iwan oksemi okijtojkej: ―¡Ma tikweyikixtikan toTajtzin Dios! Porke ipokyo in yon weyikan katlej yokixpolojkej nochipa tlejkotos ipokyo.

⁴In senpoale iwan nawi tetajtzitzintin iwan in nawin katlej yolitokej, omotlankuaketzkej ipan tlale iwan okiweyikixtijkej in toTajtzin Dios, katlej oewatoka ipan isiya. Iwan okijtojkej: ―¡Ijkón ma yeto! ¡Ma tikweyikixtikan toTajtzin Dios!

⁵Ijkuakón omokakke se tlajtole katlej okiske kan kajki in siya iwan okijtoaya:Nochtin namejwan katlej ankitekipanoajiwan katlej ankimakasij in toTajtzin Dios,wejweyin iwan tzitzikinmej,xikweyikixtikan toTajtzin Dios. Monamiktia in Ichkatzin iwan kiilwichiwiaj

⁶Noijki onikakke kej intlajtol de miekej tlakaj, ken nijkuak mokaki kukuyokaj miekej weyamej iwan chikawak tlatijtikuini. Okijtoayaj:¡Ma tikweyikixtikan toTajtzin Dios! Porke yopéj tlanawatia in toSeñor, in toTajtzin Dios katlej kipia nochi poder.

⁷Ma tipakikan, ma titemikan ika pakilistle iwan ma tikweyikixtikan toTajtzin Dios,porke yoajsiko in tonale para monamiktis in Ichkatzin,iwan katlej yetos isiwa yomoyejyektlalij.

⁸Iwan okimakakej ma motzotzolti ika itzotzol de lino katlej kuale, chipawak iwan petlantok. Lino katlej kuale kijtosneki yen inmelajkanemilis in tokniwan yolchipawakej.

⁹Ijkuakón in ángel onechilwij: ―Xikijkuilo: “Ma pakikan akinmej okinnotzkej para tlakuaskej itech ilwitl nijkuak monamiktis in Ichkatzin.” Iwan noijki onechilwij: ―Yin tlajtole melawak itlajtol in Dios.

¹⁰Nej onimotlankuaketzke ikxitlan ángel para nikweyikixtis, pero yej onechilwij: ―Amo xinechweyikixti. Porke nej noijki niktekipanoa in toTajtzin Dios ijkón ken tej iwan mokniwan katlej kichijtokej tlan kijta itlamachtil in Jesús. Moneki xikweyikixti yen toTajtzin Dios. Tlan se kitematiltia de Jesús yen yon tlan okachi okintekipachoaya kitematiltiskej in profetajtin. Katlej ipan oyetiaya in kabayo istak

¹¹Satepan onikitak in ilwikak tlapotok, iwan owalmonextij se kabayo istak. Iwan katlej ipan oyetiaya itoka Kichiwa Tlan Kijta iwan noijki itoka Melawak. Porke tlaixkomaka (tlatzonmana) iwan temaga (temaka) ken moneki.

¹²Ixtololowan oxotlatokaj kej tlitl, iwan itech itzontekon okinpiaya miekej koronajtin. Iwan okipiaya itoka ijkuilitok katlej mach akaj okimatia tlanon kijtosneki, sino san Yej okimatia.

¹³Otzotzolejtoka ika itzotzol sa matztik ika estle, iwan itoka Dios iTlajtol.

¹⁴In soldadojtin de ilwikak ikuitlapan owalayaj ipan kabayojtin istakej, otlakentitokaj ika intlaken de lino katlej kuale, istak iwan chipawak.

¹⁵De ijtik iten okisaya se espada sa tekitl tlateki, katlej ika kinmagas nochtin in paismej. Iwan Yej kinnawatis ika se vara de tepostle kej tekiwaj. Iwan kintoktis ken kitoktiaj in uvas nijkuak ipan tlajtlaksaj para kipatzkaj, kijtosneki sa tekitl kintlajyowiltis ika ikualanilis in Dios katlej kipia nochi poder.

¹⁶Itech itzotzol iwan itech imetztomawakan oijkuilitoka yin tokayotl: “Tlanawatij de nochtin tlatlanawatijkej iwan inTeko de nochtin tekomej.”

¹⁷Satepan onikitak se ángel katlej omoketoka ipan tonale iwan okintzajtzilij chikawak nochtin in totomej katlej patlantinemij ilwikak: ―Xiwikikan iwan ximololokan para ankikuaskej se weyi tlakuale katlej Dios amechmakas.

¹⁸Ankinkuaskej intlalnakayo in reytin, intlalnakayo in kapitanmej iwan intlalnakayo in tlakaj katlej chijchikawakej. Noijki ankinkuaskej innakayo in kabayojtin iwan intlalnakayo katlej inpan yetinemij, intlalnakayo de nochtin tlakaj, maski tlanamaktin o noso amo tlanamaktin, maski wejweyin o noso tzitzikinmej.

¹⁹Ijkuakón onikitak in amo kuale yolkatl iwan nochtin reytin de ixko yin tlaltikpak iwan insoldadojwan, omololojkej para kimomagaskej iwan katlej ipan oyetiaya in kabayo istak iwan isoldadojwan.

²⁰In amo kuale yolkatl okikitzkijkej, iwan noijki okikitzkijkej in profeta tekajkayaj katlej owelia okinchiwaya wejweyin señalestin ixpan amo kuale yolkatl. Ika yonmej señalestin okinkajkayaj katlej omotekawilijkej ma kintlalilikan imarka in amo kuale yolkatl iwan okiweyikixtijkej iretrato. In amo kuale yolkatl iwan profeta tekajkayaj, nochtin omen okintlamotlakej san ken yolitokej ijtik tliko kan xotlatok in tlitl ika azufre.

²¹Iwan nochtin oksekimej insoldadojwan okinmiktijkej ika iespada tlateki katlej okisaya de ijtik iten de yen katlej oyetiaya ipan ikabayo istak. Iwan nochtin in totomej otlakuajkej ika yon nakatl asta kan oixwikej.