Read Northern Oaxaca Nahuatl Apocalipsis 5 Bible Online

Apocalipsis 5 - Northern Oaxaca Nahuatl bible

Apocalipsis 5

¹Ijkuakón onikitak itech iyekma de yen katlej oewatoka ipan siya, iwan onikitak se libro tetejkuixtok ijkuilitok ik tlixko iwan ik tlijtik iwan otzaktoka ika chikome seyojtin.

²Iwan onikitak se ángel katlej kipia poder katlej otlajtlania chikawak: ―¿Akin itech powi kitlapos in libro iwan kintzayanas in seyojtin?

³Pero mach akaj oyeka ompa itech ilwikak nimpor ixko yin tlaltikpak nimpor itlampa in tlaltikpak akin ma itech powi kitlapos in libro, iwan nion para kitas tlanon ijkuilitok.

⁴Iwan nej sa tekitl onichokak, porke mach oyeka nion se akin ma itech powi para kitlapos iwan kileros in libro, iwan nion para kitas tlanon ijkuilitok.

⁵Ijkuakón se de yen tetajtzitzintin onechilwij: ―Amo xichoka, porke in lión katlej walajtok nelwatl de familia de Judá iwan noijki de familia de David, Yej yotlatlanke para welis kitlapos in libro iwan kintzayanas in chikome seyojtin.

⁶Ijkuakón onikitak moketok se Ichkatzin tlatlajko de yen siya iwan tlatlajko de yen nawin katlej yolitokej, iwan tlatlajko de yen tetajtzitzintin. Yon Ichkatzin omotaya kej yokimiktijkaj. Okinpiaya chikome ikuakuawan iwan chikome ixtololowan. In chikome ixtololowan kijtosneki yen chikome espíritus de Dios katlej okintitlankej ixko nochi in tlaltikpak.

⁷Yon Ichkatzin oyáj kan kajki in siya, iwan okitzkij in libro katlej okipiaya itech iyekma de yen katlej oewatoka itech siya.

⁸Nijkuak okitzkij in libro, in nawin katlej yolitokej iwan senpoale iwan nawi tetajtzitzintin, omotlankuaketzkej iyakapan Ichkatzin. Kada se de yonmej tetajtzitzintin okipiaya se arpa, iwan okinmitkiaj kopajtin de oro tentokej de kopale, iwan yon kopale kijtosneki yen intiotzajtzilis de yen katlej iaxkawan in Dios.

⁹Yejwan okitlakuikayaj (okuikayaj) se yankuik tlakuikale:Tejwatzin motech powi para tikitzkis in libro iwan tikintzayanas in seyojtin.Porke omitzmiktijkaj, iwan ika moeso otikinkoj para ma yekan iaxkawan in toTajtzin Dios,nochtin in tlaltikpaktlakaj, nochtin katlej tlapoaj tlatlamantle tlajtole, de nochtin pueblojtin, iwan de nochtin paismej.

¹⁰Iwan otikintlalij ma yekan kej tlanawatijkej iwan kej tiopixkej para kitekipanoskej in toTajtzin Dios,iwan para tlanawatiskej ixko yin tlaltikpak.

¹¹Satepan onitlachixke iwan onikinkakke miekej angelestin katlej okiyawalojtokaj in siya, iwan okinyawalojtokaj in nawin katlej yolitokej, iwan noijki okinyawalojtokaj in senpoale iwan nawi tetajtzitzintin. Oyekaj miekej miyones de angelestin.

¹²Iwan okijtoayaj chikawak:In Ichkatzin katlej okimiktijkajitech powi ma kipia poder iwan ma kipia rikojyotl,ma kipia ixtlamachilistle iwan ma kipia chikawalistle,ma kipialikan tetlakitalistle, ma kimakakan weyikixtilistle iwan noijki nochtin ma kiyektenewakan.

¹³Iwan nochi tlamantle tlan Dios okichij, katlej katej ilwikak, katlej katej ixko yin tlaltikpak iwan katlej katej itlampa yin tlaltikpak, iwan katlej katej ijtik atl, onikinkakke okijtojkej:Nochtin ma kiyektenewakan, ma kipialikan tetlakitalistle, ma kimakakan weyikixtilistle iwan ma kipia poder,iktlanke (ik tlami) ma yeto nochi iaxka katlej ewatok ipan isiya iwan noijki ma yeto iaxka in Ichkatzin.

¹⁴In nawin katlej yolitokej okijtoayaj:―¡Ijkón ma yeto! In senpoale iwan nawi tetajtzitzintin omotlankuaketzkej iwan okiweyikixtijkej katlej yolitok iktlanke (ik tlami).