Read Northern Oaxaca Nahuatl Apocalipsis 7 Bible Online

Apocalipsis 7 - Northern Oaxaca Nahuatl bible

Apocalipsis 7

¹Satepan de yin, onikinmitak nawi angelestin moketokej itech nawi eskinajtin de yen tlaltikpak, katlej okintzakuilijtokaj in nawi ejekamej para amo ma ejeka ixko yin tlaltikpak, nion ixko atl, iwan nion itech kuanmej.

²Noijki onikitak oksé ángel katlej otlejkoya ik ikisayan tonale, katlej okipiaya iseyo in Dios katlej nochipa yolitok. Yon ángel okintzajtzilij chikawak in nawi angelestin katlej okinmakakej poder para tlaijtlakoskej ipan tlaltikpak iwan itech atl, okijtoj:

³―Ayamo xikijtlakokan in tlaltikpak, nion ayamo xikijtlakokan in atl, iwan nion ayamo xikinmijtlakokan in kuanmej, achtoj moneki tikinseyaroskej itekipanojkawan in toTajtzin Dios ika se seyo itech inmixkuak.

⁴Iwan onikakke okintenejkej se siento iwan omenpoale iwan nawi mil tlakaj katlej okinseyarojkej itech inmixkuak de nochtin in majtlaktin iwan ome familias de Israel.

⁵De familia de Judá oyekaj majtlaktle iwan ome mil katlej okinseyarojkej.De familia de Rubén okinseyarojkej majtlaktle iwan ome mil,de familia de Gad okinseyarojkej majtlaktle iwan ome mil,

⁶de familia de Aser okinseyarojkej majtlaktle iwan ome mil,de familia de Neftalí okinseyarojkej majtlaktle iwan ome mil,de familia de Manasés okinseyarojkej majtlaktle iwan ome mil,

⁷de familia de Simeón okinseyarojkej majtlaktle iwan ome mil,de familia de Leví okinseyarojkej majtlaktle iwan ome mil,de familia de Isacar okinseyarojkej majtlaktle iwan ome mil,

⁸de familia de Zabulón okinseyarojkej majtlaktle iwan ome mil,de familia de José okinseyarojkej majtlaktle iwan ome mil,iwan de familia de Benjamín okinseyarojkej majtlaktle iwan ome mil. Miekej tlakaj otlakentitokaj de istak

⁹Satepan de yin, onitlachixke iwan onikinmitak sa tekitl miekej tlakaj asta mach akaj welis kinpoas. Owalajkej de nochtin paismej, de nochi tlatlamantin tlakajtin, de nochtin pueblojtin, iwan de nochtin katlej tlapoaj tlatlamantle tlajtole. Omoketokaj iyakapan siya iwan iyakapan in Ichkatzin. Okipiayaj intlaken istak iwan okikitzkijtokaj sekin soyatl itech inma.

¹⁰Iwan chikawak otzajtziaj, okijtoayaj:Totemakixtilis witz de toTajtzin Dios,katlej ewatok ipan isiya,iwan noijki witz de yen Ichkatzin.

¹¹Iwan nochtin in angelestin omoketokaj okiyawalojtokaj in siya iwan okinyawalojtokaj in tetajtzitzintin, iwan noijki okinyawalojtokaj in nawin katlej yolitokej. Iwan omotlankuaketzkej iyakapan siya asta okitennamikej in tlale iwan okiweyikixtijkej in toTajtzin Dios.

¹²Okijtojkej:¡Ijkón ma yeto! Dios ma yeto iaxka axan iwan iktlanke (ik tlami) in yektenewalistle,weyikixtilistle, ixtlamachilistle, tlasojkamachilistle,tetlakitalistle, poder iwan chikawalistle. Ijkón ma yeto.

¹³Ijkuakón se de yen tetajtzitzintin onechtlajtlanij: ―¿Akinmej yinmej katlej tlakentitokej ika intlaken istak, iwan de kan owalajkej?

¹⁴Iwan nej onikilwij: ―Señor, mach nikmati. Tejwatzin tikmati akinmej iwan de kan owalajkej. Iwan Yej onechilwij: ―Yinmej yejwan katlej opanokej in temawtij tlajyowilistle. Iwan axan yokiskej iwan yokipakej intlaken ika ieso in Ichkatzin iwan yoistayakej.

¹⁵Por yonik katej iyakapan isiya in Dios, iwan kitekipanoaj itech itiopan yuale tonale. Iwan katlej ewatok ipan isiya kinpalewis porke inwan yetos.

¹⁶Mach ok tiojsiwiskej iwan mach ok amikiskej, mach ok tonaltlatlaskej iwan nion mach ok tonalmikiskej.

¹⁷Porke in Ichkatzin katlej kajki tlatlajko de yen siya, kinmonekuitlawis kej ichkamej iwan kinwikas itech ameyaltin katlej kitemakaj nemilistle. Iwan toTajtzin Dios kinwajwachilis inmixayo.