Read Northern Rengma Naga ADECHHÜ 1 Bible Online

ADECHHÜ 1 - Northern Rengma Naga bible

ADECHHÜ 1

¹Adechhü wi Anyiza na atssan nu ayyi sachi; [1]

²ayyi na matsi nmi nu kaghacang. Kejang na pala tsüdi kejibhon, nu Anyiza ghamu[2] na atssü miwi keqoeden.

³Tsaseng wi Anyiza na khi, “Kewegü yala ciwi ben thsülo.” — Ciwi kewegü na shhugho.

⁴Anyiza na kewegü tsü mu pi ma nen. Tsaseng wi Anyiza na kejang wina kewegü sapi ma kepa sa,

⁵nu ma kewegü tsüpi “aghanan” nu kejang tsüpi “aghaja” tsüti cia. Shitawa cen nu aghanen gho — tsüna atsathang atuwa.

⁶ Tsaseng wi Anyiza na khi, “Ciwi atssan na ayyi gishü nu tsü yala apen keni wi kepapa sa benya thsülo”— nu tsüti saya. Tsalina Anyiza na atssan sachi, nu tsüna atssü sa pi kepapa sala atssü yala ma cakhu nu ma miwi ben thsü.

⁸Anyiza na atssan tsüpi “tang” isa cia. Shitawa cen nu aghanen gho — tsüna atsathang keniwa.

⁹Tsaseng wi Anyiza na khi, “Ayyi ya shhugho thsüle kesalina atssan cakhu wi atssü ya apen kesü wi saghuya thsülo” — nu tsüti saya.

¹⁰Anyiza na ayyi keqha tsüpi “ayyi” nu atssü saghu keben tsüpi “atssükedone” isa cia. Anyiza na tsü mupi ma nen.

¹¹Anyiza na khi, “Ayyi wi aghanglani tsüdila shigü shhugho yathsü, aghanglanithu ma cü ben nu achantonthu ma bi bünya thsülo” — nu tsüti saya.

¹²Tsalina ayyi wina aghanglani cü tsüdi shigüya, nu Anyiza na tsü mupi ma nen.

¹³Shitawa cen nu aghanen gho — tsüna atsathang kechengwa.

¹⁴Tsaseng wi Anyiza na khi, “Atssan wi kewegüthu shhugho aghaja nu aghanan kepapa sa thsü, nu atsathang, amapi, nu takhunavü [3] sa kewa tsü chüya thsü;

¹⁵tsüthu atssan wi wegü nu kewegü pi ayyiwi chi thsülo” — nu tsüti saya.

¹⁶Isanu Anyiza na kewegü keti keni saya, aghani pi aghanan wi ben thsü nu asha pi aghaja wi ben thsü; tsüti ghotsithu la sachi.

¹⁷Anyiza na kewegüthu pi atssan wi chi nu ayyi wegü thsü,

¹⁸aghanan nu aghaja wi wegü thsü, nu kejang kewegü kepapa sa thsü. Anyiza na tsü mupi ma nen.

¹⁹Shitawa chen nu aghanen gho — tsüna atsathang mejüwa.

²⁰Tsaseng wi Anyiza na khi, “Atssü wi kahangli kepapa kesa yala pongya thsü nu atssan wi awathu ya pighe thsülo.”

²¹Isanu Anyiza na atssükedone ghassübvü keti, atssü wi kahangli kepapa kesathu nu awathu tsüdila sachi. Anyiza na tsü mupi ma nen.

²²Anyiza na sawegü pi tsüthu tsüdi cü nu khi, “Atssü wi kahanglithu mezzasa nu jikayi, nu awathu ayyi wi jikayi waya.”

²³Shitawa cen nu aghanen gho — tsüna atsathang mangawa.

²⁴Tsaseng wi Anyiza na khi, “Ayyi wi aghangsa kahangli kepapa kesa asahang nu aghangsa, kizza nu keti tsüdila benya thsülo”— nu tsüti saya.

²⁵Isanu Anyiza na tsüthu tsüdi saya, nu Anyiza na tsü mupi ma nen.

²⁶Tsaseng wi Anyiza na khi, “Ikhang khili anyi sachi na; mathu tsiyen na ikhang ti nu ikhang cheng thsü na. Mathu ya atssü wi anga, awathu, nu aghangsathu asahang nu aghangsa [4] keti nu kizza tsüdi miwi kedi sa thsüden.”

²⁷Isanu Anyiza na ma tsiyen ti kesa anyi sahangchi. Manyi pi npvüza nu nza sahangchi,

²⁸sawegü pi manyi cü nu khi, “Atsanga kejon benyalo, isanu ashicübvüghathu ayyi tsüdi wi wa hang nu tsü miwi kekhang sen thsü. Hi nshinyi pi anga, awathu, nu aghangsathu tsüdi miwi kekhang sen thsüden.

²⁹Hi nshinyi ya dsa thsüle kesalina pala cüghe nu achan bi tsüdi khuchidha;

³⁰isala aghangsathu awathu tsüdi tsse ghena hi aghanglanithu khuchitheng” — nu tsüti saya.

³¹Anyiza na ma sakechithu tsüdi ghangchi, nu ma nen ntsa ya. Shitawa cen nu aghanen gho — tsüna atsathang tughowa.