Read Northern Rengma Naga ADECHHÜ 13 Bible Online

ADECHHÜ 13 - Northern Rengma Naga bible

ADECHHÜ 13

¹Abram na ma wubvü ssiya nu ma keben tsüdi sen nu Ejipt na aghawa shu Kanaan cülawa wi wa, nu Lot la ma nie wa.

²Abram na keban kesü, ma khaghaneni, anenithu, nu amesüsi, rükatssü nu suna kejonla ben.

³Ma ciwi na ketsen sen apen kesü na kesü wi wala Bethel kepeghe wi wa. Ma ciwi wa Bethel nu Ai manyi jüwi kheni ma keben pen tsü cuya,

⁴nu kekinyipen kesü saya. Ciwi ma Apvüwa kinyi.

⁵Lot la khaghaneni, anenithu, amesüsi, ma theghi nu amaghathu na ben.

⁶Ciwi ayyi kemehai na manyi gweghe keben qo nmi, kepaghenanye manyi qho asahang sha ntsa keben ghena.

⁷Tsalina ciwi Abram nu Lot sahang noncca ketenthu jawi kitagha shagha. (Tsü tsüwi Kanaan nu Periz nyithu na ayyi ciwi hangben.)

⁸Tsaseng wi Abram na Lot kiza, “Ishinyi ashili, n-nyi nu inyithu kitagha thsü yishü.

⁹Tsalina ishinyi zighea na. Ayyi no kenen penwa kessiyalo. No alen kesü wi wathu, hi alen kepawa wi wana.”

¹⁰ Lot na ghang kevüli chinan Jordan yyiketijü maben, Zoar wi kewa len tsüdi atssü kejon ben nu Apvüwa Sanku[26] nyelela Ejipt yyi ti kesa muya. (Hawa ha Apvüwa na anyunuti Sodom nu Gomorrah tsü npi keyasa tsüwi.)

¹¹Tsalina Lot na ma ghena Jordan yyiketijü maben kessiya nu nishuwa wa. Tsütinu manyi zighe.

¹²Abram na Kanaan yyi wi ben wa, nu Lot na wa Sodom kete yyiketijü anyunuti jawi hang wa.

¹³Ciwi anyithu na gheshighena nu sami pi Apvüwa shunden.

¹⁴Lot kebvü seng wi Apvüwa na Abram kiza, “No keben pen wina mehaitsü ghang kevüli chilo.

¹⁵ No ayyi mukeben tsü tsüdi hi pi no nu nshicüthu cüden, nu tsüna anuphanla nji sa ben.

¹⁶Hi ashicübvügha kejon pi no cüden, nu thola mathu sikhiya nben; tsüna ayyinikhu sikhi keyawa la le ben.

¹⁷Shagha nu wa ayyi maben ghangchilo, kepaghenanye hi tsü tsüdila pi no cüaden.”

¹⁸Tsalina Abram na ma keben pen ketsen sen nu wa Hebron wi Mamre ji chan kemetha kete wi ben wa, nu ma ciwi kekinyipen kesü sapi Apvüwa wi chi.