Read Northern Rengma Naga ADECHHÜ 15 Bible Online

ADECHHÜ 15 - Northern Rengma Naga bible

ADECHHÜ 15

¹Tsaseng wi Abram na kemanthi kesü mu nu Apvüwa na hati ma kekiza zaya, “Abram, nmessi lalo, hi kemessi wi ntsonhi saya nu akutimen keti pi no cüden.”

²Isala Abram na luneng “Kekhang Apvüwa, hi atsanga nkemi na no akutimen kemehai mangwa pi hi cüden nu? Hi keben ghong kesawa tsüna Damaska nyiwa Eliezer ketanle.

³No atsanga pi hi ncü, nu imagha kesü hi keben ghongya tendha.”

⁴Tsaseng wi Apvüwa na ajüh khipi ma kiza keben za neng; “Amaghawa Eliezer ha no keben ghongya nben, atsa ntsawa kesü na no keben ghongben.”

⁵ Apvüwa na ma ssinu akhemi wi shhu nu khi, “Atssan wi ghangchi nu ghotsithu tsü sinanlo; nshicübvüghathu na ji pi tsüthu tsüti saben.”

⁶ Abram na ma kenondi pi Apvüwa miwi chi, nu ha ghena Apvüwa na Abram nen nu ma ssiya.

⁷Tsaseng wi Apvüwa na Abram kiza, “Hi Apvüwa, ayyi hapi nji sa thsüle nu Babylonia yyi Ur wina no ssi keshhughowa tsüle.”

⁸Isala Abram na keü, “Kekhang ntsa Apvüwa, hi khatinu tsüna iji le kesa chüya nu?”

⁹Apvüwa na khineng “Amesü kesü, aneni kesü, aneni süpon kesü tsüdila amapi kecheng ji zza, nkhetsü kesü nu duktur kesü tsüthu sen nu hi wi gholo.”

¹⁰Abram na asahangthu sen nu Anyiza wi gho, tsüthu handhi pi kenini sa nu pi alen keni sala ghapeli chia; isala ma awathu tsü nhandhi.

¹¹Kamang kemcüwathu na akamangthu miwi dugho, isala Abram na tsüthu jügü pi bvü thsüa.

¹² Minulen wi Abram na jenchi ntsa wa nu kemessi nu kejang keti na ma miwi gho.

¹³ Apvüwa na ma wi kiza, “Nshicübvüghathu na asang yyi wi kijünyi saben, mathu ciwi amapi meza mejü nyu nssümagha sa nu nyu mathu meten-mesha ntsa saben.

¹⁴ Isala hi mizzatenti mathu pi amagha kesa thsüthu tsü meten-mesha ben. Nshicüthu na khathansha wi asang yyi tsü teshi nu shhu khe keben-keyeng kejon sen nu mathu gweghe shhuaben.

¹⁵No kesie hang pi qhai ntsa, cca shü pi vhüaben.

¹⁶Abvüye mejüwa wi nshicübvüghathu na ayyi hewi ghoneng shaben. Amor nyithu gheshighena ntsa pi kemeten-kemesha npi kemu qo chu hi mathu jügüshi nten.”

¹⁷Aghani du nu atsajang kegho wi anni kekhu-pfü nu annikeqhe kesü wan aghangsa kamangthu jüwi tsü gho.

¹⁸ Ciwi Apvüwa na Abram ssinu cenkethenjüh kesü sa nu ma wi khi, “Hi ayyi ha tsüdi Ejipt na wa Eufrat Ghaku kecu pi nshicübvüghathu cüten kesa kishen ben,

¹⁹tsüna Ken, Keniz, Kadmon,

²⁰Hitti, Periz, Refaim,

²¹Amor, Kanaan, Girgash, nu Jebus nyithu yyi tsüdi saghu.”