Read Northern Rengma Naga ADECHHÜ 16 Bible Online

ADECHHÜ 16 - Northern Rengma Naga bible

ADECHHÜ 16

¹Abram wubvü Sarai na atsanga nmi. Isala ma Ejipt nyi maghale kesü ma nyan Hagar kesa na ben,

²tsalina ma Abram wi kiza, “Apvüwa na hi yala atsa npvügha thsüladha, no wa imaghalewa gweghe jenlo. Isathu ma ighena atsa kesü pvügha cü benle.” Abram na Sarai kekhi jüh tsü kinaya.

³Tsalina ma Hagar pi Abram wubvü meshibvüwa sa thsüa. (Hana Abram na Kanaan yyi wi kahang amapi tagha seng wi sa.)

⁴Abram na Hagar ssijen nu ma atsa-npvüya. Hagar na atsa- npvükeya wi kapvü nu Sarai nkhichila shagha.

⁵Tsaseng wi Sarai na Abram wi khi, “No kesazzi ghena Hagar na hi n-ghang chüla saben,[27] Hi ma khupi no cü nu ma atsa-npvüya meyi hi nkhichila wadha. No la hi wa meshon khe Apvüwa na ishinyi ghan kenanwa salo.”

⁶Abram na luneng “Ma ncakhu wi nmaghale, no ma miwi mangwa samvu khe saya mehai.” Sarai na Hagar nkhichila nmehai ntsa sa nu ma yala bvü thsüa.

⁷Shur wi kewa len yyikeshü tssükebvüpen kesü wi Apvüwa nyilo kesü na gho Hagar metuya

⁸nu khi, “Sarai maghalewa Hagar, no khiewa na gho nu khiewa wa ten nu?” Nzawa na luneng “Hi ipvüwale Sarai wina bvü tendha le.”

⁹Nyilowa na khi, “Npvüwale wi whanenglo, nu ma maghale sabenlo.”

¹⁰Nyilowa kheneng ma kiza, “Hi ashicübvügha kejon pi no cüden, thola tsüthu siyakhi nben.

¹¹No atsa kesü muyaden, nu ma nyan pi Ishmael [28] cilo; kepaghenanye no n-gükeccü wi kiqai hhai tsü Apvüwa na zayadha.

¹²Isala ntsa tsüna aghangsa gada ti hangben; ma anyi tsüdi shun nu anyi tsüdila ma shunben. Ma ma shilithu tsüdi gweghe hang nben.”

¹³Hagar na ma ketanla ma ccüneng nu khi, “Hi ntsakhiwa Anyiza mukeya seng wi hangben nu tsü cüki khipi nyu kizaya mehai kwe?” Nzawa na Apvüwa ma keccünengwa tsüpi “Muketenwa Anyiza” isa ci.

¹⁴Tsalina Kadesh nu Bered manyi jüwi atssükhang tsüpi “Hangben nu hi mukebenwa tssükhang” isa khiden.

¹⁵ Hagar na atsa kesü pvügha pi Abram cü nu ma nyan pila Ishmael ciya.

¹⁶Tsü tsüwi Abram na ma kahang mapi achentazen nu tugho sadha.