Read Northern Rengma Naga ADECHHÜ 17 Bible Online

ADECHHÜ 17 - Northern Rengma Naga bible

ADECHHÜ 17

¹Abram na ma kahang achentugu nu tugu mapi wi Apvüwa na ma tuwi gho nu khi, “Hi kekhang Nyizawa. Keshüthangla ijühkina nu kemeshonwa sa tenlo.

²Hi no ssinu cenkethenjüh kesü saden nu ashicübvügha kejon pi no cüden.”

³Abram na kukedu ayyi wi ghangwa nu Anyiza na ma wi khi,

⁴“Hi no ssinu cenkethenjüh ha saben; no mizzatenti kejon baqhai saden.

⁵ N-nyan pi Abram nsala Abraham[29] sa wa tendha, kepaghenanye hi no pi mizzatenti kejon baqhai sa thsüden.

⁶Hi ashicübvügha kejon pi no cüden, nu mathu pahan na kadimithu saden. No ashicübvügha kejon benden nu mathu na mizzatenti saden.

⁷ “Hi no nu nshicübvüghathu wi ijühkhishi ketheng ha abvüye ghaketenwa ghena anuphanla cenkethenjüh kesü saden. Hi no nu nshicübvüghathu Nyiza saden.

⁸ No khili kijünyi sala hang keben yyi hawa ha hi khupi no nu nshicübvüghathu cüden. Kanaan yyi mabenla nshicübvüghathu yyi sa, nu hi mathu Nyiza saden.”

⁹Anyiza na Abraham wi kiza, “No nu nshicübvüghathu ghaketen wi lela hi cenkethenjüh ha n-niethu yishü.

¹⁰ No nu nshicübvüghathu jawi npvüza tsüdila ahyuhan nsathu yishü.

¹¹Nansü nten na meme npvüza ghanan tazen sa lethu ma yhuhan nsathu yishü, tsüna njjen wi kepvügha amagha nu asang wi shü keya amaghathu sa lela saghuben. Hawa ha ishinyi jüwi cenkethenjüh kesü benle kesa pi keccüca.

¹³Meshu kesüsü ahyuhan nsathu yishü, nu ha asajjü wi hi cenkethenjühwa tsüna anuphanla benle kesa zensu kesü saden.

¹⁴Npvüza kesüle kesü lela ahyuhan nkesawa tsü pi inyile sa nten, kepaghenanye ma hi cenkethenjüh tsü nkenie ghena.”

¹⁵Anyiza na Abraham wi kiza, “No nwubvü pi Sarai le ncila yilo, khili nten na ma nyan pi Sarah sadha.

¹⁶Hi sawegü pi ma cüden, nu ma wina hi atsa kesü pi no cüden. Hi sawegü pi ma cüden, nu ma ya mizzatenti jjaqhai sa thsüden, nu ma shicübvüghathu jawi kadimithu na shaghaben.”

¹⁷Abraham na kukedu ayyi wi ghangwa, isala ma tsü meshen kechi wi keqhe nu khi, “Anyi kesü ma kahang amapi meza wi atsa benya mehai kwe? Sarah na ma kahang amapi achentugu wi atsa pvüghaya mehai kwe?”

¹⁸Abraham na Anyiza keü, “Mangkesa na Ishmael yala hi keben-keyeng ghongya thsü nten nu?”

¹⁹Isala Anyiza na khi, “Nyele, nwubvü Sarah na atsa kesü pvügha yaden, nu no ma nyan pi Isak [30] ciyalo. Hi ma nu ma shicübvüghathu ssinu cenkethenjüh kesü saden. Cenkethenjüh hawa ha anuphan ghena.

²⁰No Ishmael ghena kekhie tsü hi zayadha, tsalina hi sawegü pi ma cü, nu atsanga nu ashicübvügha kejon pi ma cüden. Ma kadimithu taghakeni ba saden nu hi ma shicübvüghathu wina mizzatenti keti sa cüden.

²¹Isala Sarah na vvüthi hathansha wi pvügha cü kesawa ntsa Isak tsü hi ma ssinu cenkethenjühwa tsü sa benden.”

²²Anyiza na Abraham ssinu ccüneng cenya theng nu bvüa.

²³Tsü ghanan Abraham na Anyiza jühkina nu ma tsa Ishmael nu ma jjen wi npvüzathu tsüdi, tsüna ma jjen wi kepvügha amagha nu nyu wi shükeya amaghathu lela saghula mathu hyuhan.

²⁴Abraham ma kahang amapi achentugu nu tugu wi ma hyuhan,

²⁵nu ma tsa Ishmael kahang amapi taghakecheng wi tsüti sa.

²⁶Manyi qho ghanan kesütan na ahyuhan,

²⁷Abraham maghathu tsüdila gweghe nu ahyuhan.