Read Northern Rengma Naga ADECHHÜ 18 Bible Online

ADECHHÜ 18 - Northern Rengma Naga bible

ADECHHÜ 18

¹Mamre ji chanton kemetha kete wi Apvüwa na Abraham tuwi gho. Abraham na aghani kisa ghanan-lapvü wi ma nithsüjjen jenka wi donkiben,

² Ma ma mmi pieki shagha nan ciwi meshu kecheng ngan keben muya. Mathu muya meyi ma bvüsen wa mathu metu, ma ayyi wi kukedu,

³nu khi, “Kedithu, ijjen wi n-nganla nbvü lalo; hi nthu ketsikina mvu ben.

⁴Hi atssü pie gho nthu ccü bhuya thsüna; nthu na achanton ha cakhu wi mnanyalo.

⁵Hi anün la keu sengho na, nthu tsü dsa nu kijünyi kewa ghena zü nengyalo. Nthu hi nyuwakü nu ijjen wi ghodha, tsalina hi ya nthu ketsikina thsülo.” Mathu khineng “No nkesengcha le, wa no kekhi ti salo.”

⁶Abraham na kaghajila nithsüjjen wi du nu Sarah wi kiza, “Wan awheng kemehai ntsa khuya nu pi amesa pahan gü chilo.”

⁷Tsaseng wi ma bvüsen wa amesü jawi ma zza kaghanie asa kemehai kesü zanya, nu pi amaghathu cü nu wan kiden-kesha yathsü.

⁸Tsaseng wi ma awwen, tsenitssü, nu asa pahan khuya nu sen wa mathu tuwi don cü. Achanton chakhu wi ma mathu ketsikina nu mathu yala dsaya thsüa.

⁹Mathu ma wi keüchi, “Nwubvü Sarah na khiewa ben nu?” Ma luneng “Ma kawi anithsüjjen non wi ben le.”

¹⁰ Mathu meshu kesü na khi, “Vvüthi hathansha wi [31] hi kheneng ghoden, nu nwubvü Sarah na atsa kesü muyaden.” Sarah na ma seng wi ajenka wi ngan nu kina ben.

¹¹Abraham nu Sarah manyi qho qhai ntsa sadha, nu Sarah na asha kaghapeng nzayen tsü la nsa ladha.

¹² Tsalina Sarah na ma ketanla ma nankeqhe nu khi, “Hi khili qhai wadha nu iwuba la qhai wadha, hi ma ssinu inonkwenya mehai kwe!”

¹³Apvüwa na Abraham wi keü, “Mangkesa na Sarah na keqhe nu hati khiten nu? ‘Hi khili qhai wadha ntsakhiwa atsa muya mehai kwe?’

¹⁴ Apvüwa ghena pala pahan kedhu ben kwe? Hi kekhi ti, vvüthi hathansha wi hi kheneng ghoden, nu Sarah na atsa kesü muyaden.”

¹⁵Isala Sarah na ma kemessi ghena nye le nu khi, “Hi nkeqhe le.” Ma luneng “Anle, no keqhedha.”

¹⁶Tsaseng wi anyithu tsüna apen tsü teshi nu Sodom kaghapi pen kesü wi wa, nu Abraham na mathu ssiwa alen wi chi cüle mathu gweghe wa.

¹⁷Apvüwa na ma ketanla khi, “Hi mangwa sale ben khe pi Abraham kuthi nten.

¹⁸Ma shicübvüghathu na mizzatenti keti nu kekhang kesü sa thsüden, nu hi ma wina sawegü pi mizzatenti tsüdi cüden. [32]

¹⁹Ma ya ma tsangathu nu ma shicübvüghathu sansi pi ijühkina nu kemetha nu ketsantanwa kuli thsüle kesalina hi ma kessiyadha. Mathu na tsüti sa lethu hi ma ghena khichi ketheng tsüdi sa cüden.”

²⁰Tsaseng wi Apvüwa na Abraham wi kiza, “Sodom nu Gomorrah nyunuti keni kethen jüh nu mathu kesami na ji ntsa ben.

²¹Hi zakeya kethen jühthu tsü ntsakhiwala nye khe hi ketanla wa nu chüyaden.”

²²Tsaseng wi meshu keni apen tsü teshi nu Sodom kaghapiwa wa, isala Apvüwa na Abraham gweghe ben.

²³Abraham na Apvüwa tetsaki wha nu keü, “No ntsakhiwa ketsatanthu pi gheshighenathu gweghe yasaten kwe?

²⁴Keujüla ciwi ketsatan nyi deni na ben lethu no anyunuti tsü maben yasaten kwe? Ketsatan nyi deni ghena no anyuti tsü meyasala sa nben kwe?

²⁵No khiela ketsatanthu pi gheshighenathu gweghe pathia nben. Tsüti saya nben. No mangla tsüti sa nben. No tsüti sa lethu ketsatanthu pi gheshighenathu gweghe meten-meshadha. Tsüti saya nben. Ayyi tsüdi wi ajüh kekaghatenwa tsüna kemeshonwa saden.”

²⁶Apvüwa na luneng “Keujüla Sodom nyunuti wi ketsatan nyi deni muya lethu hi mathu ghena anyunuti tsü yasa nben.”

²⁷Abraham na khineng “Apvüwa, hi kempvüza sa nu no wi ajühkhi keben ghena kesami teshi cülo. Hi anyi mele nu kekhiu mangla nmi.

²⁸Isala ciwi ketsatan nyi deni nyela jügha nu manga ben lethu manga ncenla kesalina no anyunuti tsü maben yasaten kwe?” Apvüwa na tsü luneng “Keujüla ketsatan nyi jügha nu manga muya lethu hi anyunuti tsü yasa nben.”

²⁹Abraham na khineng “Keujüla ciwi meshu jügha ketan muya lethu khati?” Apvüwa na luneng “Meshu jügha muya lethu hi tsü yasa nben.”

³⁰Abraham na khi, “Apvüwa nleben nminu lalo, hi ajühkhi neng tenle. Keujüla ciwi meshu changha ketan muya lethu khati nu?” Ma tsü luneng “Meshu changha ketanla muya lethu hi tsü yasa nben.”

³¹Abraham na khi, “Apvüwa, hi kempvüza sa nu no wi ajühkhi keben ghena kesami teshi cülo. Keujüla meshu ngwe ketan muya lethu khati nu?” Ma khi, “Keujüla meshu ngwe muya lethu hi anyunuti tsü yasa nben.”

³²Abraham na khi, “Apvüwa nleben nminu lalo, hi ajüh kutitan khineng tenle. Keujüla ciwi meshu tagha ketan muya lethu khati nu?” Ma khineng “Keujüla meshu tagha muya lethu hi tsü yasa nben.”

³³Apvüwa na Abraham ssinu keccüneng cen seng wi bvüa, nu Abraham na ajjen wi kheneng ghoa.