Read Northern Rengma Naga ADECHHÜ 2 Bible Online

ADECHHÜ 2 - Northern Rengma Naga bible

ADECHHÜ 2

¹Tsütinu atssan, ayyi, nu ciwi keben tsüdila sa cenya.

²Ghanan tagüwa wi Anyiza na ma kuli keben tsü sacenya nu atsathang tagüwa wi ma nkulila ngan wa.

³Anyiza na sawegü pi atsathang tagüwa miwi chi nu tsü sametha, kepaghenanye ma sahangchi cenya theng[5] nu tsü ghanan mnan wa.

⁴Hatinu atssan, ayyi sahangya. Apvüwa[6] Anyiza na atssan nu ayyi sa kechi wi

⁵aghanglanithu ayyi miwi nmi nu pala cü mangla npi shhughoya, kepaghenanye ma atsankegho kesun pi ayyi wi npi chi nu thola ciwi ayyiwa tsü npi ca;

⁶isala atssü manon wina lle shhugho ayyi ten tecca cü.

⁷ Apvüwa Anyiza na ayyi[7]wi anisha pahan khuya nu tsüpi anyi zhüya; ma kahang khuchi keten hathakissa pi anyi tsüwa mitsan wi chi nu anyi tsüna hang shagha.

⁸Tsaseng wi Apvüwa Anyiza na nishuwa Eden wi asanku kesü saya; nu ma sahangkeyawa anyi tsüpi ciwi chi.

⁹ Apvüwa Anyiza na achanton tsikemehai tsüdi sapi ciwi shigü thsü nu ma bi kemehai bünya thsü. Asanku non wi kahang khuchiketen nu kemehai-keteshi [8] chüya keten chanton na ben.

¹⁰Eden wi aghaku kesü lle shhugho atssü na asanku tsü zügü cüden; ciwi tsüna gishü pi aghaku mejü saben.

¹¹Aghaku atuwa tsüna Pishon; tsüna lle sen nu Havila diyyiwa vüben.

¹²(Ciwi suna kemetha hankedemvu nu alon menkedhu la muyaden.)

¹³Aghaku keniwa tsüna Gihon; tsüna lle sen nu Kush [9] diyyiwa vüben.

¹⁴Aghaku kechengwa tsüna Tigri; tsüna Assiriya nishu lenwa lle waben, nu aghaku mejüwa tsüna Eufrat.

¹⁵Tsaseng wi Apvüwa Anyiza na anyi tsüpi Eden Sanku wi chi nu tsü ca nu hie thsü.

¹⁶Apvüwa Anyiza na anyiwa wi khi, “No asanku wi kedsau bi tsüdila la dsaya mehai;

¹⁷isala kemehai-keteshi chüya keten chan bi tsü ndsala, no tsü dsa lethu tsü ghanan no shüaben.”

¹⁸Apvüwa Anyiza na khi, “Anyi tsüwa ma ketan kahang thsü na mejumaghali. Hi ma kaghanpfü kemehai kesü sapi ma kekiqawa sa thsüden.

¹⁹Tsalina Apvüwa Anyiza na ayyi wi anisha pahan khuya nu pi aghangsathu nu awathu tsüdila zhüya. Isanu ma tsüthu ssinu anyiwa wi gho nu ma tsüthu nyan pi mangwale citen khe ghang; nu anyiwa na tsüthu pi mangwale ci khe tsüpi ma nyan sa.

²⁰Tsalina anyi na awathu nu aghangsathu tsüdi nyan ci cü; isala tsüthu kesütanla anyi kaghanpfü kemehaiwa sa meya.”

²¹Tsalina Apvüwa Anyiza na anyi tsü sapi jenchi ntsa wa thsü, nu ma jen keben jü ma menni gü kesü khushiya nu ma yisü meyen bhon.

²²Apvüwa Anyiza na amenni gü tsüpi nza kesü zhüya nu ma ssinu npvüzawa wi gho.

²³Tsaseng wi npvüzawa na khi, “Ha hi ti kesa kesü — Agü la igü, wina khushiya, asa la isa pi saya. Ma nyan na ‘nza’, kepaghenanye npvüza wina ma khushiya. ”

²⁴ Tsalina npvüza na ma ba, ma jja teshi nu wa ma wubvü manyi pen waden, nu manyi tsüna asajjü kesütan saden.

²⁵Npvüzawa nu nzawa manyi qho kemissü lela njüghe.