Read Northern Rengma Naga ADECHHÜ 20 Bible Online

ADECHHÜ 20 - Northern Rengma Naga bible

ADECHHÜ 20

¹Abraham na Mamre wina apen ketsen sen nu Kanaan yyi acülawa Kadesh nu Shur manyi jüwi hang wa. Matsü keu seng wi ma wa Gerar wi hang keben wi

²ma wubvü Sarah tsüna ma tsüggüwale khi. Tsalina Gerar wi kadimiwa Abimelek na nyu kesun chi nu wa Sarah ssigho ma cü thsü.

³Ghaja kesü Anyiza na aman wina ma wi gho nu khi, “No shüa tendha; kepaghenanye no nza ha ssiyadha, ma nyu wubvü sadha le.”

⁴Isala Abimelek na nzawa kete wi nwa, nu ma khi, “Apvüwa, hi tsatan ben le! No hi nu inyithu yasaten kwe?

⁵Abraham ma ketanla ‘ma itssüggüwale’ khi, nu nzawa la ‘ma ibaghawale’ khi. Hi ileben methasi nu ha kuli, nu hi mangla nsazzile.”

⁶Anyiza na aman wina ma luneng “Anle, no nleben methasi tsü kuli kesa hi chüben, tsalina hi no ya ma nkidhen thsü nu no sami pi hi nshun thsü.

⁷Khili nzawa tsü pi ma wuba cü nenglo. Ma atusenjüh-kechü nyi kesü, ma nghena khie chithu no shü nben. Isala keujüla no nzawa pi ma ncü neng lethu chüyalo, no nu n-nyithu tsüdi shüaben.”

⁸Ghanenwa mitu na Abimelek na ma cakhu wi kedithu tsüdi cighuchi nu khati sa khe tsüdi khipi mathu kiza, nu mathu na messi ntsa sa.

⁹Tsaseng wi Abimelek na Abraham cichi nu ma keü, “No ithu miwi mangwa sadha nu? Hi ntuwi mangwa sazzi nu no agükeccü ha sengho imiwi nu hi kadiyyi wi chi ben nu? No imiwi sa kechiwa ha thola hati sa nben.

¹⁰No mangkesa na hati ha sa nu?”

¹¹Abraham na luneng “Hi kemeshen hewi thola Anyiza kemessi nyi nmi nu mathu hi pathi nu iwubvü ssiya benshe sa.

¹²Ma ntsakhiwa itssüggüwa le. Ma iba nga, isala ijja nga nyele, nu ma iwubvü sa wadha.

¹³Tsalina Anyiza na iba jjen wina hi kesun pi asang yyi kechi wi hi ma wi, ‘No ijühkeya pi nyu ccücaya kemehai tsüna anyi tsüdi wi hi nbaghawale khilo,’ kiza.”

¹⁴Tsaseng wi Abimelek na Sarah pi Abraham cü neng nu aneni, amesüsi, nu amaghathu la pi ma cü.

¹⁵Ma Abraham wi kiza, “Ha maben iyyi! No khiewa no nen khe ciwi hanglo.”

¹⁶Ma Sarah wi kiza, “Hi rükatssü hazar kesü pi nbaghawa cü keben ma jjügi no gweghe kebenthu tsüdila no tsatan ben nu no nsazzi le kesa chüyaben.”

¹⁷Abraham wubvü Sarah ghena Apvüwa na Abimelek kadijjen wi nza kesüla atsanga mu meya thsüla. Isala Abraham na Abimelek ghena khie chi nu Anyiza na ma sapi mehai cü, ma wubvü nu ma maghalethu la sapi mehai cü nu mathu ya atsanga muya thsüa.