Read Northern Rengma Naga ADECHHÜ 22 Bible Online

ADECHHÜ 22 - Northern Rengma Naga bible

ADECHHÜ 22

¹Matsü pahan seng wi Anyiza na Abraham ghan-nan. Anyiza na ma cichi, “Abraham” Abraham na lesha, “Hi hewi benle!”

² Anyiza na khi, “Ntsawa Isak ma ketan no ma ghali ntsa ketenwa tsü ssiya nu Moria yyi wi walo. Ciwi hi no kiza na ayikha kesü miwi ma pi ahhansha sapi hi cülo.”

³Ghanenwa wi mitu na Abraham na ahhansha kesa ghena achan pahan pi gada khhi saya, ma tsawa Isak nu ma magha keni ssiya; isanu mathu gweghe Anyiza na apen khipi ma kekiza wi tsü wa.

⁴Kecheng ghanan wi Abraham na alen kesie wina apen tsü muya.

⁵Tsaseng wi ma amagha keni kiza, “Gada ssinu hewi ngan ben lalo. Ghanyiwa ishinyi wa apen kawi ka tsü kinyi theng nu kheneng nshinyi wi gho ben na.”

⁶Abraham na Isak yala ahhansha kesa ghena achan tsü pvüya thsü, nu ma annuza kesü nu annithegü khuya. Manyi gweghe wa keten wi,

⁷Isak na khi, “Iba!” Ma lesha chi, “Hi hewi benle, itsawa!” Isak na keü, “No anni nu achan la ben, isala ahhansha kesa ghena aneni zza khiewa ben nu?”

⁸Abraham na khineng “Anyiza na khuchi cüben.” Isanu manyi gweghe wa.

⁹ Manyi wa Anyiza na khipi ma kekiza pen tsü cukeya wi Abraham na kekinyipen kesü saya nu achan pi tsü miwi chiya. Ma ma tsawa tsü bhenya nu pi kekinyipen wi achan miwi chi.

¹⁰Tsaseng wi ma annuza khuya nu pi ma süthia le saben.

¹¹Isala Apvüwa nyilowa tang wina ma cichi, “Abraham, Abraham!” Ma nusha chi, “Hi hewi benle!”

¹²“No ghanyiwa miwi nkwen nchila, nyelela ma miwi mangla nsa lalo. Hi no Anyiza messikü tenle kesa chüyadha, kepaghenanye no hi wina ntsa ma ketan kesawa tsü la ntepagha ladha.”

¹³Abraham na ghang kevüli chinan aneni süpon kesü ma ghacü pi aghangbhon wi vüki keben muya. Ma wa tsü ghanya nu khupi ma tsawa mithon sala mecang pi kekinyi sa.

¹⁴Abraham na apen tsüpi “Apvüwa khuchiden” isa cia. Nu nansü kecu anyithu na tsüpi “Apvüwa yikha wi ma khuchiden” isa khiden.

¹⁵Apvüwa nyilowa na tang wina keni tughuwa Abraham cichi,

¹⁶ nu khi, “Hi ketanla inyan wina kishenben— Apvüwa na khiben —Hi sawegü pi no cü ntsa saden. Kepaghenanye no hi wina ntsa kesütanwa tsü ntepaghala.

¹⁷ Hi nshicübvügha sapi tang wi ghotsithu nu atssükedone ghüsa wi ahachan ti sa cüden kesa khishi chiben. Nshicübvüghathu na mathu ghinyithu miwi khang yaden.

¹⁸ Mizzatenti tsüdila hi sawegü pi nshicübvüghathu kecü ti pi mathu la cülo khieben, — kepaghenanye no hi ayenkhukechi tsüdi kenie ghena.”

¹⁹Abraham na ma magha keni wi whaneng nu mathu gweghe Beersheba wi wa nu Abraham na ciwi hang wa.

²⁰Matsü pahan seng wi Abraham na Milka na atsanga tazen pvügha pi ma cünyuwa Nahor cüle kesa chüya;

²¹Uz na atssütsewa, Buz na ma cünyuwa, Aram bawa Kemuel,

²²Khesed, Hazo, Pildash, Jidlaf, nu Bethuel

²³Rebeka ba. Milka na atsa tazen hathu pvügha pi Abraham cünyuwa Nahor cü.

²⁴Nahor wubvü meshibvüwa Reuma na Teba, Gaham, Tahash, nu Maka pvügha cü.