Read Northern Rengma Naga ADECHHÜ 23 Bible Online

ADECHHÜ 23 - Northern Rengma Naga bible

ADECHHÜ 23

¹Sarah na amapi 127 hang.

²Ma Kanaan yyi Hebron wi shü, nu Abraham na ma keshü ghena anongü nu qai.

³Abraham na ma wubvü keshü kamang tsü teshi theng nu Hitti nyithu wi khi,

⁴ “Hi asang sa nu he nthu jawi hangben, ayyi pi hi shüya thsü nu iwubvü pi vhüya thsülo.”

⁵Mathu na khi,

⁶“Ikhang jüh kina chilo, kediwa. No ithu jawi kekhang kedi nyi kesü saben, nwubvü pi ithu shüjjen kemehai ntsawa wi vhüyalo. No nwubvü pi vhüya thsüle kesalina ashüjjenpen pi no kecü tsü ithu tsüdila anonghe benle.”

⁷Abraham na mathu tuwi kukedu,

⁸nu khi, “Keujüla nthu na hi ya iwubvü pi hewi vhü thsü mvuben lethu, nthu nchala Zohar tsawa Efron wi

⁹ma lli khutsu wi Makhpela Lonshiku tsüpi hi wi jeü cülo kizalo. Nthu tuwi na hi ma men maben pi ma cü nu tsüpi iji saya, nu pi ashüjjenpen saya thsülo.”

¹⁰Efron la Hitti nyithu gweghe anyunuti khweti-jenka wi keccünengli pen witsü donki ben. Mathu tsüdi za keben wi ma Abraham luneng,

¹¹“Ijüh kina chilo, kediwa; hi alli tsü maben nu ma non wi alonshiku tsüpi no cüaden. Hi inyithu tuwi na tsüpi no cü ben na nwubvü pi ciwi vhüyalo.”

¹²Isala Abraham na Hitti nyithu tu kukedu

¹³nu tsüdi zaya thsüle kesalina Efron wi kiza, “Hi no wi khieben, ijüh kina chilo. Hi alli maben shüyaden, no hi wi alli men ha khuyalo, nu iwubvü pi ciwi vhüya thsülo.”

¹⁴Efron na khineng

¹⁵“Kediwa, alli tsüna rükatssü meza mejü men ketan —— ishinyi jüwi mangwa kaghakhi ma? Nwubvü pi ciwi vhüyalo.”

¹⁶Abraham na anlo khichi, nu Efron na anyithu za keben wi kekhi ju ma rükatssü meza mejü whu chi, tsüna tsü tsüwi apisa men kenie wina.

¹⁷Tsütinu Efron lli Mamre na nishuwa Makhpela tsüna Abraham ji saya. Alli tsü maben ciwi alonshiku nu achanton tsüdila saghu ben.

¹⁸Tsüna Abraham ji sadhale kesa pi Hitti nyithu anyunuti jenka keccünengli pen wi kewathu tsüdila chü thsüa.

¹⁹Tsaseng wi Abraham na ma wubvü Sarah pi alonshiku tsüwa wi Kanaan yyi wi vhüa.

²⁰Tsalina Hitti nyithu lli alonshiku ciwi keben tsüna Abraham ji sa nu ma tsüpi ashüjjenpen saya.