Read Northern Rengma Naga ADECHHÜ 28 Bible Online

ADECHHÜ 28 - Northern Rengma Naga bible

ADECHHÜ 28

¹Isak na Jakob cichi nu sawegü pi ma cü nu ma kiza, “No Kanaan nyi ghala meya lalo.

²Shagha nu Mesopotamia wi njja bawa Bethuel jjen wi wa nu ciwi njja baghawa Laban nga ghala kesü yayalo.

³Kekhang ntsa Nyiza ya sawegü pi no cü nu nshicü kejon benya thsü, isanu no mizzatentithu kejon ba sayaden!

⁴ Ma sawegü pi Abraham kecü ti pi no nu nshicübvüghathu la kecüwa salo, nu no khili hang keben Anyiza na pi Abraham kecü yyi ha ya keyawa sa.”

⁵Isak na Jakob kesun pi Mesopotamia wi Arameya nyi Bethuel tsawa, nu Jakob nu Esau manyi jja Rebaka baghawa Laban jjen wi wa thsüa.

⁶Isak na Jakob kesun pi Mesopotamia wi awubvü bha wa thsüdha le kesa Esau na zaya. Isak na sawegü pi Jakob cü nu ma Kanaan nza meya lalo kekhi tsü la Esau na zaya.

⁷Jakob na ma ba nu ma jja jühkina nu Mesopotamia wi wa.

⁸Esau na ma ba Isak na Kanaan nzathu n-nenle kesa tsü chüya.

⁹Tsalina ma wa Abraham tsawa Ishmael nga Lebaioth tssüggüwa Mahalath yaya.

¹⁰Jakob na Beersheba teshi nu Haran kaghapi wi wa.

¹¹Aghani na du keten wi ma kemetha pen wi ghoya nu ciwi mnan wa. Ma alon kesü khupi ma mchen saya nu jen wa.

¹² Ma aman wina abenlen kesü ayyi wina ki tang cu keben, nu nyilothu na tsü miwi ki nu dugho keben mu.

¹³ Nu Apvüwa na ma kete [46] wi ngan nu khi, “Hi Apvüwa, Abraham nu Isak Nyizawa. Hi no khili jen keben ayyi hapi no nu nshicübvüghathu cüden.

¹⁴Nshicübvüghathu na sha pi ayyinikhu ti saben. Mathu na bvüzighe sen nu acüla, agha, nidu, nu nishu tsüdi wi waben, nu hi no nu nshicübvüghathu miwi na sawegü pi mizzatenti tsüdi cüben.[47]

¹⁵Meshenyalo, no khiewa wa khe hi no ssiden nu no khweden, nu hi no ssinu ayyi hawi gho nengden. Hi no wi khichi ketheng tsüdi npi kesacen chu hi no teshi nben.”

¹⁶Jakob na jencan shagha nu khi, “Apvüwa na hewi ben! Ma apen hawi ben lela hi tsü nchü!”

¹⁷Ma messiya nu khi, “Ha khatila qhethiketen kesa pen dha nu! Ha Anyiza jjen sabenla metsi, nu khweti-jenka sha sen nu tang wi ki benla metsi.”

¹⁸Jakob na ghanenwa mitu na shagha alon pi ma mchen kesa tsü pi meshenkeben kesü sala sheng. Tsaseng wi ma oliv deli pi tsü miwi zügüchi nu sametha pi Anyiza wi chi.

¹⁹Ma apen tsü nyan pi Bethel[48] ciya. (Anyuti tsüwa tsüna kuti wi pi Luz le khi.)

²⁰Tsaseng wi Jakob na Anyiza wi kishen; “Keujüla no hi kijünyi wa keten wi ha hi ssinu hi khwe nu kedsakejjü nu athsümeni pi hi cü lethu,

²¹nu kemehaisa gho iba jjen cu nengya lethu hi no pi iNyiza saden.

²²Hi meshenkeben lon sheng ketheng pen ha wina no kinyiden, nu no pi hi kecü alentagha wi gishü tagha wi kesü pi no cüden.”