Read Northern Rengma Naga ADECHHÜ 37 Bible Online

ADECHHÜ 37 - Northern Rengma Naga bible

ADECHHÜ 37

¹Jakob na ma ba kahang pen Kanaan yyi wi tsü hangden,

²nu hana Jakob theghi cüki. Josef na ma kahang mapi tagha nu tagü wi tsü ma cünyuthu na ma ba wubvü meshipvü keni Bilha nu Zilpa tsathu gweghe aneni nu khaghanenithu hieden, ma ma cünyuthu nkemehai kekuli tsü khi sengho ma ba kizaden.

³Jakob na ma tsathu tsüdi miwila Josef ghali, kepaghenanye ma keqhai seng wi Josef pvüghaya. Ma agwomejuwa kaghazu kesü degü pi ma pvü thsü.

⁴Ma cünyuthu na mathu ba na mathu tsüdi miwi Josef ghalile kesa mukeya wi mathu Josef nanmeghü nu mehaitsü ma nccünengla.

⁵Ghaja kesü wi Josef na aman kesü man, nu ma tsü khipi ma cünyuthu kiza nan mathu na ma nanmeghü kayi wa.

⁶Ma khi, “Iman ha kina chilo;

⁷Ikhang tsüdi alli kesü wi awhengsu tonthu mishü ten nan, isuton tsüna shagha meshonqhe ngan wa. Nthu su tonthu tsüna gho iji vüya nu tsü tuwi kukedu shan le!”

⁸Ma cünyuthu na ma wi khi, “No kemeshentsü no kadimi kesü sa nu ikhang miwi kekhang sen benle ben kwe?” Tsalina mathu na ma man nu ma jüh ghena ma nanmeghü kayi wa.

⁹Tsaseng wi la Josef na aman kepa wi kesü man nu tsü khipi ma cünyuthu kiza, “Hi aman kepa wi la kesü man le, ciwi aghani, asha, nu ghotsithu taghakhen na gho ituwi qancale!”

¹⁰Ma man tsü khipi ma ba la kiza, nu ma ba na ma kha. “Nman hana ma jjügi mangwa dha nu? No kemeshentsü hi, njja, nu ncünyuthu tsüdi gho ntuwi kukedu benle ben kwe?”

¹¹ Josef cünyuthu na ma miwi nanghopvü, isala ma ba na ha meshen pi ma leben wi chipvü ben wa.

¹²Ghanan kesü Josef cünyuthu na Shekhem wi mathu ba neni hie wa,

¹³Jakob na Josef wi kiza, “Hi no kesun pi Shekhem wi ncünyuthu na aneni hie keten wi wa thsü mvu benle.” Josef na luneng “Hi wa tenle.”

¹⁴Ma ba na ma wi kiza, “Wala ncünyuthu nu anenithu tsüdila kemehai sabenla nye khe ghangchi nu gho hi kizalo.” Tsalina ma ba na Hebron yyiketijü wina ma kesun pi wa thsüa. Josef na wa Shekhem cuya

¹⁵nu alli wi kegoedeja keten anyi kesü ma muya nu ma wi keü, “No hewi mangwa bha ten nu?”

¹⁶Ma khi, “Hi icünyuthu na aneni hie keten tsü bha tenle! Mathu na khiewa ten khe no hi kiza ma?”

¹⁷Anyi tsüwa na khi, “Mathu na bvüdha. Mathu na Dothan wi wale kekhi hi zayale.” Tsalina Josef na ma cünyuthu sen nie wa Dothan wi mathu muya.

¹⁸Mathu alen kesie wina Josef muya theng nu ma gho mathu npi kecu wina mathu na ma pathiale cenya.

¹⁹Mathu na khokho wi khi, “Aman kechüwa na hewi gho tendha.

²⁰Ghalo, ikhang ma pathi nu ma kamang pi ayyiku kesü wi khalachia na. Ikhang na aghangsa nkemehai na ma ghandhale khia na. Isanu ikhang na ma mangthu tsü khati saten khe ghang nanden!”

²¹Reuben na mathu tsüti kekhi zaya nu ma Josef hangshayale sa nu khi, “Ikhang na ma npathila na.”

²²Ma mathu wi khi, “Ma pi he agheja wi ayyiku wi ha khalachia na, isala ma npathi lalo.” Ma mathu kwen wina Josef hangshaya nu ma kesun pi ma ba wi wha neng thsüale kesalina ha khi.

²³Josef na gho ma cünyuthu cukeya wi mathu na ma gwomejuwa kaghazu tsü khushiya.

²⁴Tsaseng wi mathu ma ghan sen wa ayyiku atssü nkemi witsü khalachia.

²⁵Mathu dsajjütu keben wi Ishmael nyi akhang kesü Gilead wina Ejipt wi wa keten muya. Mathu na pala menkedhu nu mirr pi sunsiesa khhi sa pvüden.

²⁶Judah na ma cünyuthu wi kiza, “Ikhang cünyuwa ha pathi nu ma kepathi tsüpi kuthi kesa ghena ikhang kekiyi mangwa ben nu?

²⁷Ma ghan pi Ishmael nyithu wi jeü chia na. Isanu ikhang ma npathila na; kepaghenanye ma ikhang cünyuwa asa nu ajjü kesütan. Ma cünyuthu na ma jühkina,

²⁸ nu Midia nyi asenkesathu pahan na kegho wi ma cünyuthu na wa ayyiku wi Josef zanshiya nu pi Ishmael nyithu wi rükatssü ngwe wi jeü, nu mathu na ma ssinu Ejipt wi wa.”

²⁹Reuben na ayyiku witsü kheneng gho nan ciwi Josef mu meya, nu ma ahathakina wina ma thsü mezüqhe.

³⁰Ma ma cünyuthu wi ghoneng nu khi, “Pvüzanyiwa tsüna ciwi nmidha le! Hi khati sadha nu?”

³¹Tsaseng wi mathu aneni kesü pathi nu Josef gwomejuwa tsüpi tsü jjü wi tenya.

³²Mathu na agwomejuwa tsü sen nu mathu ba wi wha nu khi, “Ha ntsawa gwomejuwa la nu, ikhang na ha muyale?”

³³Ma tsü chüya nu khi, “Anle, ha ma gwomejuwa le! Aghangsa nkemehai na itsa Josef ghan nu ma zandhi-zanghe benla metsidha.”

³⁴Jakob na ma hathakina wina ma thsü mezüqhe nu aleshithsü mphiya. Ma ma tsawa ghena matsü kesiela ma nongü.

³⁵Ma tsathu nu ma ngathu tsüdila gho ma leben cüsha lela ma tsü nkinala khi, “Hi itsa ghena inongü wa ashüjjen wi dua tendha.” Isanu ma ma tsa Josef ghena anongü.

³⁶Tsü tsüwi Ejipt wi Midia nyithu na Josef pi Potifar, kadimi kadipen kehiethu meza miwi kediwa wi jeü chia.