Read Northern Rengma Naga ADECHHÜ 38 Bible Online

ADECHHÜ 38 - Northern Rengma Naga bible

ADECHHÜ 38

¹Tsü tsüwi Judah na ma cünyuthu teshi nu wa anyi kesü Adullam nyunuti wina keghowa Hira gweghe ben wa.

²Ciwi Judah na Kanaan nyi Shua nga kesü metuya. Ma nzawa tsü yaya,

³nu ma atsa kesü pvügha cü, nu ma nyan pi Er ci.

⁴Nzawa kheneng atsa-npvüya nu atsa kepa wi kesü pvügha cü, nu ma nyan pi Onan ci.

⁵Kheneng ma atsa kesü pvüghaya nu ma nyan pi Shela ci. Atsa tsü kepvügha tsüwi Judah na Akhzib wi ben.

⁶Judah na ma tsa tssütsewa ghena awubvü ma nyan Tamar kesa yapi cü.

⁷Er na anyi nmehai, ma Apvüwa nkenen sa kesalina Apvüwa na ma pathia.

⁸Tsaseng wi Judah na Er cünyuwa Onan wi kiza, “Wala ncü denyilewa ssijenlo. Ma miwi ma wuba cünyuwa kekuli tsü sa chi nu ncünyuwa ghena ashicü muya thsülo!”

⁹Isala Onan na atsangathu tsü ma ji sa nben kesa chüya nu ma wa ma cü denyilewa ssimehai kesa wi ma gwotssü pi ayyi wi khatsü thsüa, isanu ma biwa ghena ashicü nben thsüla.

¹⁰Ma kekuli tsüna Apvüwa nkenen sa nu Apvüwa na ma la pathia.

¹¹Tsaseng wi Judah na ma cünyiewa Tamar wi kiza, “Itsawa Shela na npi pvüza keya chu whala nba jjen wi denyi ben lalo. Ma cünyuthu pathi kesa ti Shela la pathi nashe kemessi ghena ma ha khi. Tsalina Tamar na ma ba jjen wi wha neng.”

¹²Matsü pahan seng wi Judah wubvü na shüa. Judah na ma nonke-ü tsü cenya theng nu ma pvüshangwa Hira, Adullam wina keghowa, manyi Timnah wi ma khaghaneni ssen han keben witsü wa.

¹³Nyu na Tamar wi n-myi na Timnah wi ma khaghaneni ssen han watenle kiza.

¹⁴Tsalina Tamar na ma denyile thsümeni mphi keten tsü kemili, nu alikeshanthsü kesü pi ma mmi shanbhonya nu wa Timnah wi kewalen anyuti kesü Enaim kedulen wi donki wa. Judah tsa pvükhenwa Shela na pvüza wadha kesa ma chüben, isala ma pi Shela wubvü npi sa thsü.

¹⁵Judah na ma mukeya wi ma mmi shanbhon pvü keten lina keqheza menkedsa nza kesü le meshen.

¹⁶Judah na alen katen wi ma kete wi wha nu khi, “No amen khaju ya ben nu?” (Nzawa tsüna ma cünyiewa le kesa ma nchü.) Nzawa na khi, “No mangwa pi hi cü ben nu?”

¹⁷Ma lunneng “Hi aneni zza kesü kesun chi cüben.” Nzawa na khi, “Isalethu no aneni npi kesun kechi chu pala pahan pi hi dhabi ntheng lathu yishü.”

¹⁸Ma keü, “Hi mangwa pi no wi dhabi thengla nu?” Nzawa na khineng “Nkwen keqhan, n-geshi keqhan nu nkwen wi akhhatssü tsüle.” Tsalina ma tsüthu tsüpi nzawa cü nu wa ma ssimehai, nu nzawa na atsa-npvüya.

¹⁹Tamar na ajjen wi whala ma likeshonthsü khupia, nu ma denyile thsümeni tsü mphi neng ya.

²⁰Judah na ma pvüshangwa Hira na aneni sen nu walo, nu nzawa wi ma atsanqai pi dhabi ketheng tsü sen gholo kesun chi, isala Hira na nzawa mu meyala.

²¹Ma Enaim wi anyi pahan keü, “Keqheza menkedsa nzawa alen kete ha keben tsü khiewa wadha nu?” Mathu luneng “Keqheza menkedsa nza kesüla hewi ben ntenle.”

²²Ma Judah wi ghoneng nu khi, “Hi ma mu meyale. Apen ciwi anyithu na keqheza menkedsa kesüla ciwi nbenle khi.”

²³Judah na khi, “Ma ya itsanqaithu pi thengya thsülo. Ishinyi nyu ya ishinyi nan-nkeqhe thsü mvu. Hi ma men pi ma cüale sa, isala no ma mu meya ladha.”

²⁴Asha kecheng seng wi nyu pahan na Judah kiza, “Ncünyiewa Tamar na keqheza menkedsa nza ti sa nu ma khili atsa-npvü tendha.” Judah kekhi na, “Ma kushi pi nu ssi wa mecangthi thsülo.”

²⁵Nzawa ssinu shhu keten wi ma ajüh kesü pi ma myiwa Judah wi kesun chi; “Hi atsa-npvü keten ha atsanqai hathu pvüwa na le. Hathu ha thowa ji khe ghangchilo — akwen keqhan, ageshi keqhan nu akhhatssü.”

²⁶Judah na tsüthu chüya nu khi, “Nzawa tsüna meshonle. Hi ma tuwi kesau nsa ladha — hi itsawa Shela pi ma meya thsülale.” Nu Judah na ma gweghe njen neng la.

²⁷Ma kepvügha tsü kegho wi ma gweghetsa pvügha ben kesa chüya.

²⁸Ma aggüsanaa keben wi atsa kesü ma kwen changshi chi nu noncca kebenwa na tsü zanya nu anan kenmie pi tsü khün nu khi, “Hawa ha atuwa pvügha le.”

²⁹Isala ma ma kwen zan nengya nu ma cünyuwa na atuwa pvüghaya. Isanu noncca kebenwa na khi, “No hatinu nlen pvükhhi shhughodha.” Tsalina ma nyan pi Perez[73] cia.

³⁰Tsaseng wi ma cünyuwa na anan kenmie pi ma kwen khün kepvü pvüghaya, nu ma nyan pi Zerah [74] cia.