Read Northern Rengma Naga ADECHHÜ 41 Bible Online

ADECHHÜ 41 - Northern Rengma Naga bible

ADECHHÜ 41

¹Amapi keni seng wi Ejipt kadimiwa ma man wina ma Nil Ghaku katen wi nganben.

²Ciwi amesü kekunon dende kesa tagü aghaku wina shhugho aghang maha dsa wa.

³Tsaseng wi amesü qan-yi nu ma gü ketan kesa tagü na shhugho. Tsüthu na shhugho amesü kepathu kete aghaku katen wi nganya,

⁴nu amesü qan-yi kesathu tsüna kekunonthu ghan dsa. Tsaseng wi kadimiwa na shaghaya.

⁵Ma kheneng jen wa nan aman kesü mu. Asu tsang tagü na ma ton kesü wi shhugho ma bi kejon bün nu nyünben.

⁶Tsaseng wi asu tsang kepa wi tagü ma bi zeng nu ayyikeshü meghü na mo pi jü wa kesa na shhugho.

⁷Ma tsang bi kezengthu tsüna kejon kebenthu meji ya. Kadimiwa na tsüna ma man le kesa chü.

⁸ Ma ghanenwa wi shagha ma leben güccüya, tsalina ma Ejipt wi demathu nu kemetsathu cighu chi. Ma ma man keni tsü khipi mathu kiza, isala thola tsü jjügi khipi ma kiza keya nmila.

⁹Tsaseng wi ahyi kepiewa na kadimiwa wi kiza, “Hi nansü sazzidha le nkhishithu yishüdha.

¹⁰No amesa gü keten miwi kediwa ishinyi miwi aghepvü nu ishinyi pi kadipen kehiethu meza miwi kediwa jjen wi atssüzü sa thsüa.

¹¹Ghaja kesü ishinyi qho aman kesüsü man, nu aman tsüna ma jjügi kepapa kesa.

¹²Ciwi Ibri pvüza kesü kadipen kehiethu meza miwi kediwa maghawa na ishinyi gweghe ben. Ishinyi man tsü khipi ma kiza, nu ma tsüthu jjügi khikemili pi ishinyi kiza le.

¹³Ma kekhi jjügi tsüti sale: no hi pi ipen wi ben neng thsü, isala amesa gü ketenwa tsüpi hanthia.”

¹⁴Kadimiwa na Josef ssinu gholo kesun chi, nu mathu atssüzüjjen wina wan ma ssinu gho. Josef na ma pang kenye ca nu ma thsümeni kemiliya nu kadimiwa tuwi gho.

¹⁵Kadimiwa na ma wi khi, “Hi aman kesü man, nu thola tsü jjügi khi meya. No aman jjügi khiya mehai le kesa nyu hi kiza le.”

¹⁶Josef na kadimiwa wi khineng “Hi tsü khiya nben, isala Anyiza na kadimiwa kenenwa khikemili cüben.”

¹⁷Kadimiwa na Josef wi khi, “Aman wina hi Nil Ghaku katen wi ngan ben,

¹⁸ciwi amesü kenon dende kesa tagü aghaku wina shhugho aghang maha dsa wa.

¹⁹Tsaseng wi amesü qan-yi nu ma gü ketan kesa tagü na shhugho. Tsüthu na amesü qan-yi ntsa kesa hi Ejipt wi khiela tsüti kesa npi mu.

²⁰Amesü qan-yi kesathu tsüna kekunonthu ghan dsa,

²¹isala thola tsü chüya nben, kepaghenanye mathu na khili lela kishi makesü. Tsaseng wi hi shaghaya.

²²Hi kheneng iman wi asu tsang tagü na ma ton kesü wi shhugho ma bi kejon bün nu nyün keben muya.

²³Tsaseng wi asu tsang kepa wi tagü na ma bi zeng nu ayyikeshü meghü na mo pi jü wa kesa na shhugho,

²⁴nu ma tsang kezengthu tsüna kejon kebenthu tsü meji ya. Hi aman keni tsü khipi demathu kiza. Isala thola tsü jjügi khipi hi kiza keya nmila.”

²⁵Josef na kadimiwa wi kiza, “Aman keni tsüna ajjügi kesütan; Anyiza na ma mangwa sale ben khe pi no kizadha.

²⁶Amesü kekunon tagü tsüna amapi tagü, nu asu tsang ma bi kejon keben tagü tsü lela amapi tagü; manyi jjügi kesü.

²⁷Amesü qan-yi kesa tagü, nu asu tsang tagü ma bi zeng nu ayyikeshü meghü na mo pi jü wa kesa asakhenwa keshhugho tsüna azeng amapi tagü sa keten tsü le.

²⁸Tsüna hi no kekiza tile — Anyiza na ma mangwa sa wale ben khe pi no kizadha.

²⁹Ejipt yyi tsüdi wi amapi tagü jü pala meshumena ntsa saben.

³⁰Tsaseng wi amapi tagü azeng sa nu amapi kemehaithu tsüdila maliaben, kepaghenanye azeng tsüna diyyiwa yasaben.

³¹Meshumena kesa mapi tsüdi maliaben, kepaghenanye azeng sa ketenwa tsüna qhethiketen saden.

³²No keni tughu mang kesa tsüna Anyiza na tsü ssan pi thengdha, nu ma wan tsü senghoaben.

³³“No khili kemetsa nu kemeshen kemehai nyi kesü kessiya nu ma pi Ejipt yyi tsüdi kaghangwa sa thsülo.

³⁴No kedi nyi pahan yala meshumena kesa mapi tagü jü tsü asu kegishü manga wi kesü saghuya thsü.

³⁵Mathu ya gho keten mapi kemehai jüwi kedsakejjü tsüdi saghuya thsü, nu asu tsüpi anyunutiwa wi tsanqai nu hieyalo kesa kekhang pi mathu cülo.

³⁶Ejipt wi azeng amapi tagü gho keten tsü jüwi senle kesalina diyyiwa ghena kedsakejjü pi tsanqai yalo. Tsüti sayathu anyithu na azeng ghena khhwen nben.”

³⁷Kadimiwa nu ma kekhu wi kedithu na kemeshen hawa ha mehai le khi,

³⁸nu ma mathu wi khi, “Ithu na Josef Anyiza ghamu na ma miwi kebenwa ha miwi kemehaiki mu meyadha le.”

³⁹Kadimiwa na Josef wi kiza, “Anyiza na ha tsüdi pi no ccücadha, tsalina no nyu miwi kemetsa nu kemeshen kemehai ben le kesa muti yadha.

⁴⁰Hi no pi diyyiwa ha miwi ben thsüden, nu inyithu tsüdila njühkina thsüden. No kekhang sen nu ishiwa saden.

⁴¹Hi khili nten no pi Ejipt tsüdi miwi Ahng sa thsüdha.”

⁴² Kadimiwa na ma kwenzza wi kadimi kemechan ma miwi keben kwenzzakeqhan tsü khushiya nu pi Josef kwenzza wi chi cü. Ma linen gwomejuwa kaghazu pi ma pvü thsü nu suna yan pi ma meyan thsü.

⁴³Ma gorugari kadimi shiwa ji tsüpi ma pvü thsü, nu ma nyuwakekü ghikehiethu ya ma tuwi wa “Tankhu chilo! Tankhu chilo! isa jisha thsü.” Tsütinu Josef pila Ejipt tsüdi miwi ahng sa thsüa.

⁴⁴Kadimiwa na Josef wi khi, “Hi kadimiwa — nu Ejipt tsüdi wi anyi thola njüh nkekhuchi tsü accü akwen zankiya nben.”

⁴⁵Ma Josef pi Ejipt nyi nyan wina Zafenath Paneah ci, nu Heliopoli nyunuti wi keqhaikedi kesü Potifera nga Asenath pi ma wubvü sa thsüa. Josef na ma kahang mapi changha wi Ejipt kadimiwa kekuli sa wa. Ma kadimi kadipen teshi nu ayyi tsüdi wila wa.

⁴⁶

⁴⁷Meshumena kesa mapi tagü jüwi alli na apvüya ntsawa sa.

⁴⁸Josef na tsüdi saghuya nu pi anyunutithu wi tsanqai. Ma anyunuti tsüdi wi nu tsü kevü alli wi mukeya asu tsüpi tsanqaiya.

⁴⁹Ciwi asu na ji ntsa sa kesalina Josef na kede meyakhila nu nkedela — tsüna atssükedone wi ahachan ti sa.

⁵⁰Azeng npi kegho wi Josef na Asenath wina atsa keni muya.

⁵¹Ma khi, “Anyiza na hi sapi igükeccü tsüdi nu iba theghi tsüdi mali thsüdha,” tsalina ma tsa tssütsewa nyan pi Manasseh [75] ci.

⁵²Ma kheneng khi, “Agükeccü kesa yyi wi Anyiza na atsanga pi hi cüdha,” tsalina ma tsa keniwa nyan pi Efraim [76] ci.

⁵³Ejipt yyi wi amapi tagü meshumena kesa matsü tsüna asakhen sa,

⁵⁴ nu Josef na kekhi ti amapi tagü azeng tsüna gho. Ayyi kepa wi tsüdila azeng sa, isala Ejipt yyi tsüdi wi kedsakejjü na ben.

⁵⁵ Ejipt nyithu na ghamaya lethu mathu kadimiwa wi wa kedsakejjü khie. Tsalina ma mathu na Josef wi wa nu ma mangwa le mathu kiza khe salo kiza.

⁵⁶Azeng nkemehai na diyyiwa maben wila sa wa kesalina Josef na asabe tsüdila sha nu asu pi Ejipt nyithu wi jeü cü.

⁵⁷Ayyi tsüdi wi anyithu na Ejipt wi gho nu Josef wi asu shü, kepaghenanye apen tsüdi wila azeng na nmehai sa wa.