Read Northern Rengma Naga ADECHHÜ 42 Bible Online

ADECHHÜ 42 - Northern Rengma Naga bible

ADECHHÜ 42

¹Jakob na Ejipt wi asu benle kesa chükeya wi ma ma tsathu wi khi, “Mangkesa na nyu ghang ben nu?

²Hi Ejipt wi asu benle kesa zaben, ithu nkhwenthi le kesalina wa asu pahan shü pvü gholo.”

³Tsalina Josef cünyuthu ma tagha na Ejipt wi asu shüya le wa.

⁴Isala Jakob na Josef cünyu ntsawa Benjamin pi mathu gweghe nwa thsü, kepaghenanye ma wa sakeyishü pahan metuyathu kemessi ghena.

⁵Kanaan yyi wi azeng sa kesalina Jakob tsathu na kepathu gweghe asu shüya le wa.

⁶Ejipt yyi wi ahngwa Josef na asu pi ayyi tsüdi wi anyithu wi jeüben. Tsalina Josef cünyuthu na gho ma tuwi ammi zan ncüggü nu ayyi wi nkhwendu.

⁷Josef na ma cünyuthu mukeya wi ma mathu chüya, isala ma mathu nkechüghe sa. Ma ajüh khang ntsa khipi mathu keü, “Nthu khiewa na gho nu?” Mathu luneng “Ikhang Kanaan wina asu shüya le ghoben le.”

⁸Josef na ma cünyuthu chüben lela mathu na ma nchü.

⁹ Ma mathu ghena ma man keman tsü meshenya nu khi, “Nthu na wahhaithu, ikhang diyyiwa nkekhang chüya le bha ghoben.”

¹⁰Mathu khineng “Nyele kediwa, ikhang na nmaghathu asu shüya le ghoben le.

¹¹Ikhang tsüdila cünyunyi. Ikhang na wahhaithu nye, anyi tsentsathu le.”

¹²Josef na mathu luneng “Nyele! Nthu na ikhang diyyiwa nkekhang chüya le bha ghoben le.”

¹³Mathu luneng “Ikhang na Kanaan yyi wi aba kesü tsa hi taghakeni kesa le. Meshu kesü na shüdha, nu ghanyi ntsawa na ikhang ba gwegheben.”

¹⁴Josef na luneng “Hi kekhi ti nthu na wahhaithu.

¹⁵Hatinu nthu ghan nanden: Hi kadimiwa nyan wina kishen ben, nthu cünyu ghanyi ntsawa ssinu hewi npi kegho chu nthu apen ha teshiya nben.

¹⁶Nthu meshu kesü na wa ma ssi gholo. Nthu kekhi tsü atsentsala nye khe npi chükeya chu nthu kepathu pi hewi atssüzü sa benden, kadimiwa na hang keben ti nthu na wahhaithu.”

¹⁷Tsütinu ma mathu pi ghanan kecheng atssüzüjjen wi chia.

¹⁸Kecheng ghanan wi Josef na mathu wi kiza, “Hi Anyiza kemessi nyi, hi ajjügi kesü wina nthu hangsha cüden.

¹⁹Nthu na atsentsa le kesa chüyale kesalina nthu meshu kesü nthu keben pen atssüzüjjen wi ha benla, nu kepa na nthu shü ketheng asu tsü pvü wa nthu theghi ghama kebenthu cüya mehai.

²⁰Isanu nthu cünyu ghanyi ntsawa ssigho hi ncüthu yishü. Ha wina nthu jüh tsü ntsakhiwa le chüyaben, nu hi nthu pi shü thsü nben.” Mathu na anlo sa

²¹nu khokho wi khi, “Ntsakhiwa ikhang na ikhang cünyuwa miwi kesazzi ghena khili ketizensa ben, ma güccü ntsa nu ma ikhang wi nanketizen khie lela ikhang na nkinala le. Tsalina ikhang na khili ketizenkesa wi bendha.”

²² Reuben na khi, “Hi nthu na ghanyiwa npathi lalo kiza lela nthu na ijüh nkina mvula. Tsalina khili ma keshü kutimen pi ikhang cü bendha.”

²³Josef na mathu mangwa khi khe chüben, isala mathu tsü nchü, kepaghenanye mathu khikemiliwa sen nu ma ccüneng keben lina.

²⁴Josef na mathu teshi theng nu wa qai. Ma kheneng gho mathu ccüneng nu mathu tuwi na Simeon ghan pi bhenya.

²⁵Josef na asu pi ma cünyuthu khhi sa cü, mathu pisa tsüdi pi mathu kesüsü khhi wi chi neng cüa, nu mathu alenca wi kedsa ghena kedsakejjü pi cülo ahza khuchi. Mathu ghena tsüti saya.

²⁶Mathu na asu shü ketheng tsüpi gadathu khhi saya nu bvüa.

²⁷Mathu wa aghaja kejen pen cukeya wi meshu kesü na asu pi ma gada dsa thsüle ma khhi lisha wa nan ma pisa tsüna ma khhi pang wi kebenla muya.

²⁸Ma ma cünyuthu cighu chi nu khi, “Ipisa pi chi neng theng cü dhale. He ikhhi wi benle!” Mathu leben güccü nu kemessi wina khokho wi khi, “Anyiza na ikhang miwi ha mangwa sa thengdha nu?”

²⁹Mathu Kanaan wi mathu ba Jakob wi ghokeya wi mathu miwi mangwa sa khe tsüdila khipi ma kiza:

³⁰“Ejipt wi ahngwa na ajüh kekhang pi ikhang kiza nu ma diyyiwa shunle kesalina wahhaithu sagho benle khi pi ikhang ssikitagha.

³¹Ikhang luneng ‘Ikhang na wahhaithu nye, anyi tsentsathu le.

³²Ikhang Kanaan yyi wi anyi kesü tsa hi taghakeni kesale. Meshu kesü na shüdha, nu ghanyi ntsawa na ikhang ba gweghe ben.’

³³Anyi tsüwa na khineng ‘Nthu na anyi tsentsala nye khe hatinu nthu ghan nanden: nthu meshu kesü hewi hi gweghe benla; nu kepa na asu pvü wa nthu theghi ghama kebenthu cülo.

³⁴Nthu cünyu ghanyi ntsawa tsü ssinu hi wi gholo, isathu hi nthu na wahhaithu nye isala anyi tsentsathu le chüyaben. Hi nthu cünyuwa pi nthu cü neng ben, nu hewi ben nu asensaya mehai.’ ”

³⁵Tsaseng wi mathu na mathu khhi lisha wa nan mathu tsüdi khhi wi apisa muya. Mathu na apisa tsü mukeya wi mathu nu mathu ba Jakob na messi wa.

³⁶Mathu ba na mathu wi khi, “Nthu hi ya itsangathu tsüdi pi dedi thsü mvuben kwe? Josef na nmidha; Simeon la nmitha; nu nthu na khili Benjamin ssi bvü mvuben. Hi ileben ketizensa benle.”

³⁷Reuben na ma ba wi khi, “Keujüla hi Benjamin ssi neng gho no ncüla lethu no itsa keni tsü pathiya mehai. Ma pi ikwen wi chi cülo, hi ma ssi neng ghoaben.”

³⁸Isala Jakob na khi, “Itsawa na nthu gweghe waya nben, ma cünyuwa na shü nu ma ketan sadha. Alenca wi sakeyishü na ma miwi ghoya mehai. Hi qhai wadha, nu nthu na agükeccü sengho hi cü nu hi shü thsüale wadhale.”