Read Northern Rengma Naga ADECHHÜ 43 Bible Online

ADECHHÜ 43 - Northern Rengma Naga bible

ADECHHÜ 43

¹Kanaan wi azeng na nmehai pfüpfü wa,

²nu Jakob theghi na Ejipt wi asu shü pvü kegho tsü kedsakhi seng wi Jakob na ma tsathu wi khi, “Kheneng wa asu keu shü pvü gholo.”

³Judah na ma wi khi, “Anyi tsüwa na ikhang cünyuwa ssi nkegho chu ma tuwi ngho lalo kesa ikhang kitsan ntsa satheng.

⁴Keujüla no ikhang cünyuwa pi ikhang gweghe wa thsü lethu ikhang na wa nghena asu shü pvü ghoben.

⁵Isala no ma nkesun chi mvu lethu ikhang wa nten, kepaghenanye anyi tsüwa na ikhang wi ikhang cünyuwa ssi nkegho tsü ma tuwi ngho lalo kizadha.”

⁶Jakob na khi, “Nthu mangkesa na nthu cünyu kepa la benle anyi tsüwa kiza nu agükeccü pi hi cü ben nu?”

⁷Mathu na khineng “Anyi tsüwa na ikhang theghi nu ikhang cüki keü khvu sala, ‘Nthu ba khilila hang ben ma? Nthu cünyu kepa wi benla nmi nu?’ Ikhang na ma keü keben tsü nlunengthu yishü. Khatinu ma ikhang cünyuwa ssi gholo ikhang kizaben kesa ikhang na tsü chüya mehai nu?”

⁸Judah na ma ba wi kiza, “Ghanyiwa kesun pi hi gweghe thsülo, ikhang na wan wa tendha. Isathu ithu thola khwenthi nben.

⁹Hi kahangli pi dhabi ben, nu ma ghena akhhi pi hi pvü thsüya mehai. Keujüla hi kemehai sa ma ssigho no ncüla lethu hi ya anuphanla kemeshensa tsü pvü thsülo.

¹⁰Keujüla ikhang na hathuthu matsü nkijü lethu khili ha keni tughuwa ghoa kesadha le.”

¹¹Mathu ba na mathu wi khi, “Keujüla tsüti lethu hati salo; ayyi hewi muya keten kedsau bi kemehai pahan, kemeshentsse bi keqen keu, anikhotssü keu, cüdemvuji, mirr, aguni bi, nu mcüshüli tsüti kessi pi nthu jula wi chi pvü cüla aju sapi ahngwa cülo.

¹²Nthu na apisa pi nthu jula wi chi neng theng kecü tsü keniju pvü cülo, kepaghenanye nthu apisa tsü pvü neng ncüthu yishü, tsüna pi chimi thengla metsiben.

¹³Nthu cünyuwa ssi wa nu wan ssi neng gholo.

¹⁴Kekhang ntsawa Anyiza na anyi tsüwa sapi nthu nantizen nu Benjamin nu nthu cünyu kepawa la pi nthu cü neng kesawa salo. Ighena tsü, keujüla hi itsathu bhatagha lethu ileben güccü thia tendha.”

¹⁵Tsalina mathu na ajuthu nu apisa tsü keniju khuya, nu Benjamin ssiya nu Ejipt wi wa. Ciwi mathu Josef tuwi wha.

¹⁶Josef na mathu Benjamin ssisen keten muya nu ma jjen wi amagha kediwa wi kiza, “Anyi hathu ha ssinu ijjen wi whalo. Mathu na hi gweghe ghananshu dsaden, tsalina asa pathi pi “kiden-kesha chilo.”

¹⁷Maghalowa na ma kekiza ti saya nu acünyuthu ssisen Josef jjen wi wha.

¹⁸Mathu ssinu ajjen wi kegho wi mathu messiya nu hati meshen, “Ikhang ssinu hewi gho keben ha hatu wi apisa pi ikhang khhi wi chi neng theng cü kesa tsüghena she. Mathu na ikhang ghanya nu ikhang gadathu khuya, nu ikhang pi ma nssümaghathu sa thsüaben.”

¹⁹Tsalina mathu ajjen wi wha ajenka wina amagha kediwa wi kiza,

²⁰“Kediwa, hatu wi ikhang hewi asu shüya le ghale;

²¹Ikhang wa aghaja wi kemnanpen cu keya wi akhhi lisha wanan ikhang pisa maben- la papa khhi pang wi kebenla muya le. Ikhang na tsü pvü neng gha theng le.

²²Tsü miwi ikhang na asu shüya le apisa kepa wila pvü gha theng. Thowa na apisa tsüpi ikhang khhi wi chi theng cü khe nchü.”

²³Amaghawa na khi, “Leben güccü nu nmessila. Nthu Nyiza nu nthu ba Nyiza na nthu ghena apisa pi nthu jula wi chi theng cü benla metsi. Hi nthu pisa tsü muyadha.” Tsaseng wi ma Simeon ssinu mathu wi gho.

²⁴Amaghawa na ma cünyuthu ssinu ajjen wi du. Ma atssü pi mathu cü nu mathu ccü bhuya thsü, nu ma mathu gadathu la ghanja cü.

²⁵Mathu na Josef ghanan-lapvü wi ghothu mathu ju pi ma cüle kidenya, kepaghenanye mathu na ma gweghe ghananshu dsaten le kesa kiza kesalina.

²⁶Josef na ajjen wi kegho wi mathu aju sen wala ma cü nu ma tuwi kukedu.

²⁷Ma gho mathu cüki keü nu khi, “Nthu na nthu ba keqhaiwa cüki hi kekizawa tsüna kemehai sa ben ma? Ma khilila hang ben ma?”

²⁸Mathu luneng “N-maghathu, ikhang ba tsüna hangben nu kemehai sa benle.” Mathu na ali zan ncüggü nu ma tuwi akhhutsü du.

²⁹Josef na ma cünyuwa Benjamin muya nu khi, “Nthu na nthu cünyu ghanyi ntsawa cüki hi kekiza tsüna ha kwe? Anyiza na sawegü pi no kecüwa salo itsawa.”

³⁰Tsaseng wi Josef na wan apen tsü teshia, kepaghenanye ma ma cünyuwa ghena leben güccüya kesalina ma kejen pen wi du nu qai wa.

³¹Ma ma mmi miya theng nu shhugho ma kekhenengya nu kedsakejjü pi mathu dsajjü thsüyilo khi.

³²Josef na miz kesü wi nu ma cünyuthu na miz kepawa wi dsajjü. Ejipt nyithu pi mathu kepa dsajjü thsü, kepaghenanye mathu na Ibri nyithu gweghe kedsakejjü tsüna mathu ghena anyan kekinyen le saden.

³³Acünyuthu miz tsüpi Josef jentan nu mathu pi ghanyi keqhai sa kesenniela donki thsü. Mathu na tsüti donki keben wi khokho keghangli nu amansa.

³⁴Josef miz wina kedsakejjü pi mathu cü, kepathu miwi kishen manga pi Benjamin cü. Isanu mathu Josef gweghe dsa nu jjü pi anonkwen ntsa saya.