Read Northern Rengma Naga ADECHHÜ 45 Bible Online

ADECHHÜ 45 - Northern Rengma Naga bible

ADECHHÜ 45

¹ Josef na ma maghathu tuwi ma kekheneng meyala nu mathu tsüdi akhemi wi shhulo khichia. Josef na ma thowa khe khipi ma cünyuthu kekiza wi anyi kepa wi kesüla nmi.

²Ma misikhhali kishi nu qai kesalina Ejipt nyithu na zaya, nu ajüh tsü khi sen wa kadimi kadipen cua.

³Josef na ma cünyuthu wi khi, “Hi Josef, ntsakhiwa iba na khilila hang ben kwe?” Isala ma cünyuthu na ha za keya wi mathu qhethi pi ma luneng meyala.

⁴Tsaseng wi Josef na mathu wi khi, “Hi tetsaki gholo.” Mathu na ma tetsaki gho, nu ma mathu wi khi, “Hi nthu cünyuwa Josef, nthu na pi Ejipt wi jeüchi kesawa tsüle.!

⁵Nthu na hi pi hewi jeüchi kesalina khili nthu leben güccü nyelela nthu ketanla nthu nmeshensa lalo. Hawa ha Anyiza na anyithu hangshaya thsüle kesalina hi kesun pi hewi nthu tuwi chi theng le.

⁶Ayyi wi azeng kesa kisü amapi keni ketan saben, ciwila amapi manga azeng sa nu allica nu wwiya nben.

⁷Anyiza na nthu tuwi na hi kesun chi nu nthu khushiya, nthu nu nthu shicü hangshaya thsüle kesalina le.

⁸Tsalina hawa ha nthu na nye, isala Anyiza na hi kesun pi hewi chile. Ma hi sapi kadimi kekhu wi kedi ntsa sa thsüdha; hi ma diyyiwa mabenla kenonccawa saben. Hi Ejipt tsüdi wi kekhang kesenwa saben.

⁹“Khili wan wala iba wi ma tsa Josef na hati khiben le kizalo, ‘Anyiza na hi sapi Ejipt tsüdi miwi kekhang kesenwa sa thsüdha: nkijüla nu hi wi gholo.

¹⁰No Goshen yegu hi tetsaki wi ntsathu, ntsanga tsangathu, nkhaghaneni, n-nenithu, nmesüsi, nu no keben tsüdila sen nu hangya mehai.

¹¹Keujüla no Goshen wi hang lethu hi no nonccaya mehai. Kepaghenanye ciwila amapi manga azeng saden; nu hi no, nu ntheghi, nu ntsangathu ya khwenthi thsü mvu nben.’

¹²‘Khili nthu tsüdi nu Benjamin la hi ntsakhiwa Josef le kesa muyadha.

¹³Hi he Ejipt wi kekhang sen keben nu nthu kemu cüki tsüdi khipi iba kizalo. Isanu wan wa ma ssinu hewi gholo.’ ”

¹⁴Ma ma kwen chang pi Benjamin khenteggüya nu qai wa: nu Benjamin la ma khenteggü sen nu qai.

¹⁵Ma qai nu ma cünyuthu tsüdi khenteggü nu kimang. Tsaseng wi ccüna ma cünyuthu ma ccüneng shagha.

¹⁶Josef cünyuthu na ghoben le kesa ajüh wa kadimi cu keya wi kadimiwa nu ma kekhu wi kedithu na mathu lebenghashu sa.

¹⁷Kadimiwa na Josef kiza, “Ncünyuthu mathu gada khhi saya nu Kanaan yyi wi wa nenglo kizalo.

¹⁸Mathu ya mathu ba nu mathu theghithu ssiya nu hewi gho neng thsülo. Hi Ejipt wi ayyi kemehai ntsa pi mathu cüben, nu mathu ya ayyi nkesenkhi benya thsüben.

¹⁹Mathu wubvüthu, ghanyithu nu mathu ba la ssinu mathu gweghe ghole kesalina Ejipt wi mesügarithu khuyalo kizalo.

²⁰Mathu keben pahan teshi lela tsü ghena aleben güccü nsala: kepaghenanye Ejipt yyi maben wi kemehai ntsawa tsüna mathu ji saben.”

²¹Jakob tsathu na mathu salo kekiza ti saya. Kadimiwa na kekhi ti Josef na mesügarithu nu alenca wi ghena kedsakejjü khupi ma cünyuthu cü.

²²Ma athsü kekimili ghena kesüsü pi mathu tsüdi cü, isala ma rükatssü meza kecheng nu athsü kekimili ghena manga pi Benjamin cü.

²³Ma pala hathu kesun pi ma ba cü: Ejipt nyi tsanqai kemehai ntsathu gada khhi tagha, nu asu, amesa, nu alenca wi kesen ghena kedsakejjü gada khhi tagha.

²⁴Ma ma cünyuthu kesun pi wa thsü, nu mathu wa keten wi ma mathu wi khi, “Nthu alenca wi nkitagha lalo.”

²⁵Mathu na Ejipt teshi theng nu Kanaan wi mathu ba Jakob wi wha neng.

²⁶Mathu ma kiza, “Josef na khilila hangben le. Ma Ejipt tsüdi miwi kekhang senben!” Jakob na ma qhethi nu mathu jüh tsü n-nondi.

²⁷Isala Josef na mathu kekiza tsüdi pi ma kiza, nu ma ssinu Ejipt wi ghalo kesalina Josef na mesügarithu kesun kechi mu keya wi ma metsa nengya.

²⁸Ma khi, “Itsa Josef na khilila hang benne! Mantsadha! Hi npi keshü wi wa ma n-ghang chithu yishü ben.”