Read Northern Rengma Naga ADECHHÜ 46 Bible Online

ADECHHÜ 46 - Northern Rengma Naga bible

ADECHHÜ 46

¹Jakob na ma keben tsüdi kiden-keshaya nu Beersheba wi wa, nu ahhansha sapi ma ba Isak Nyiza kinyi.

²Ghaja wi kemanthi wina Anyiza na ma ci chi nu khi, “Jakob, Jakob!” Ma luneng “Hi hewi benle.”

³Ma khi, “Hi Anyiza, nba Nyizawa tsüle. Ejipt wi wa nmessi lalo. Hi ciwi nshicübvügha sapi mizzatenti keti kesü sa thsüden.

⁴Hi no gweghe Ejipt wi waden, nu nshicübvüghathu ssinu ayyi hewi gho neng aben. Josef na no gweghe keben wi no shüaben.”

⁵Jakob na Beersheba wina wa. Ma tsathu na ma, mathu tsangathu, nu mathu wubvüthu, pi kadimiwa Ejipt wina kesunchi kecü garithu witsü chiya.

⁶ Mathu na Kanaan wi mathu sahangthu nu keben mu keyathu tsü pvüya nu Ejipt wi wa. Jakob na ashicübvüghathu tsüdi ssinu ma gweghe wa;

⁷tsüna ma tsathu, ma tsa tsathu, nu ma ngathu, nu ma nga ngathu.

⁸Jakob theghi ma gweghe Ejipt wi kewathu nyan na ma tsa tssütsewa Reuben,

⁹nu Reuben tsathu; Hanok, Pallu, Hezron, nu Karmi.

¹⁰Simeon nu ma tsathu; Jemuel, Jamin, Ohad, Jacin, Zohar, nu Kanaan nza tsawa Shual.

¹¹Levi nu ma tsathu; Gershon, Kohath, nu Merari.

¹²Judah nu ma tsathu; Shela, Perez, nu Zerah. (Judah tsa Er nu Onan manyi Kanaan wi shüa.) Perez tsathu na Hezron nu Hamul.

¹³Issakhar nu ma tsathu; Tola, Pua, Jashub, nu Shimron.

¹⁴Zebulun nu ma tsathu; Sered, Elon, nu Jahleel.

¹⁵Hathu ha Jakob tsathu Mesopotamia wi keben jü Leah na pvügha kecü nu ma ngawa Dina. Leah wina mu keya ma shicüthu na saghu changha nu kecheng.

¹⁶Gad nu ma tsathu; Zefon, Haggi, Shuni, Ezbon, Eri, Arod, nu Areli.

¹⁷Asher nu ma tsathu; Emno, Eshva, Eshvi, Beriya, nu mathu tssüggüwa Sera. Beriya tsa na Heber nu Malkhiel manyi.

¹⁸Tagha nu tugho hathu hana Jakob shicüthu Laban na pi ma nga Leah kecü maghalewa Zilpa wina pvügha keya.

¹⁹Jakob wubvü Rachel na atsa keni pvügha cü: Josef nu Benjamin manyi.

²⁰Josef na Ejipt wi atsa keni Manasseh nu Efraim manyi na Heliopoli wi keqhaikediwa Potifera ngawa Asenath wina pvügha keya.

²¹Benjamin tsathu na Bela, Bekhel, Asbel, Gera, Naaman, Ehi, Rosh, Muppim, Huppim, nu Ard.

²²Tagha mejü hathu hana Jakob shicüthu Rachel wina pvügha keya.

²³Dan nu ma tsa Hushim.

²⁴Naftali nu ma tsathu; Jahzeel, Guni, Jezer, nu Shillen.

²⁵Tagü hathu hana Jakob shicüthu Laban pi ma nga Rachel kecü maghalewa Belha wina pvügha keya.

²⁶Jakob gwo wina keshhugho ma shicüthu, ma tsathu wubvüthu nsila anyi achentugho nu tugho na Ejipt wi wa.

²⁷ Josef na Ejipt wi atsa keni muya nu tsü saghula Jakob theghithu anyi achentagü na ben.

²⁸Jakob na Judah kesun pi atuwi wa Josef na Goshen wi mathu metulo wa thsü. Mathu wa cu keya wi

²⁹Josef na gorugari wi duya nu wa Goshen wi ma ba metu. Mathu kemetuli keya wi Josef na ma ba sun khenteggüya nu matsü kesiela qai wa.

³⁰Jakob na Josef wi kiza, “Hi shü wa lela mehaidha, kepaghenanye hi n-mmi muyadha nu no khilila hangben kesa chüyadha.”

³¹Tsaseng wi Josef na ma cünyuthu nu ma ba theghi kepathu wi kiza, “Hi wa kadimiwa wi icünyuthu nu iba theghithu tsüdi Kanaan wi hang keten hi wi ghodha le kesa nkizathu yishüdha.

³²Hi ma wi nthu na anenikehie nu asahang kenonccathu, nu nthu sahangthu nu nthu keben tsüdi sen ghodha le kizaden.

³³Kadimiwa na nthu cichi nu nthu na mangwa saten khe keü lethu,

³⁴nthu na nthu bamyithu kekuli ti nthu kahang chu asahangthu noncca tenle ma kiza metsilo. Tsütithu ma nthu yala Goshen yegu witsü hang thsüben.” Josef na ha khi, kepaghenanye Ejipt nyithu na anenikehie kekuli tsü mangla sa nketen ghena.