Read Northern Rengma Naga ADECHHÜ 47 Bible Online

ADECHHÜ 47 - Northern Rengma Naga bible

ADECHHÜ 47

¹Tsalina Josef na ma cünyuthu manga ssiya nu kadimiwa wi wa, nu ma wi khi, “Iba nu icünyuthu na Kanaan wina mathu sahangthu, mathu tsanqaitsana nu keben tsüdi sen nu ghodha. Mathu khili Goshen yegu wi ben.”

²Ma ma cünyuthu cüki pi kadimiwa wi kiza.

³Kadimiwa na mathu wi keü, “Nthu na kekuli mangwa sa ten nu?” Mathu na luneng “Kediwa, ikhang na ikhang bamyithu kekuli ti ikhang na anenikehiethu le.

⁴Ikhang na diyyi hewi hangle ghodha le, kepaghenanye Kanaan yyi wi azeng na nmehai pi ikhang sahangthu tsse ghena aghang nmidha. Ikhang tizenthu ikhang yala Goshen yegu witsü hang wa thsülo.”

⁵Kadimiwa na Josef wi kiza, “Khili nba nu ncünyuthu na gho no cuyadha,

⁶Ejipt yyi tsüna mathu ji. Mathu ya ayyi kemehai ntsa Goshen yegu witsü hang wa thsülo, nu keujüla mathu jawi saya kemehai nyi pahan ben lethu mathu pi isahangthu kenoncca nyi sa thsülo.”

⁷Tsaseng wi Josef na ma ba Jakob ssinu kadimiwa tuwi gho. Jakob na sawegü pi kadimiwa cü,

⁸nu kadimiwa na ma wi keü, “No kahang mapi khaju sadha nu?”

⁹Jakob na luneng “Hi kegoedeja kesa kahang mapi meza nu changha sadha. Amapi hathu wi gükeccü kahang na keu ketan, tsüna ibaqhaithu na amapi kejon kegoedejala gükeccü sa kahang tsü ncenle.”

¹⁰Jakob na sawegü pi kadimiwa cü nu bvüa.

¹¹Tsaseng wi kadimiwa na khi kechi ti Josef na Ejipt yyi keben kemehai ntsawa Ramese nyunuti kete wi ayyi pi ma ba nu ma cünyuthu cü nu ciwi ben wa thsüa.

¹²Josef na ma ba, ma cünyuthu, nu ma ba theghi kepathu ghanyi ntsawa saghu tsüdi ghena kedsakejjü pi cü.

¹³Azeng na nmehai ntsa wa kesalina khie wila kedsakejjü nmila, nu Ejipt nyi nu Kanaan nyithu na ghama pi nkhangla wa.

¹⁴Mathu asu shü kesalina Josef na apisa tsüdi saghuya nu tsü sen nu kadipen wi wa.

¹⁵Ejipt nu Kanaan wi apisa senkhi kesa seng wi Ejipt nyithu na gho Josef wi khi, “Ikhang ya nshü thsüle kesalina kedsakejjü pi ikhang cülo. Ikhang pisa tsüdi senkhidha le, pala pahan sachi cülo.”

¹⁶Josef na khineng “Nthu apisa tsüdi senkhidha lethu nthu sahangthu sen gholo; hi tsüthu mithon wi asu pi nthu cü na.”

¹⁷Tsalina mathu na mathu sahangthu sen nu Josef wi gho, nu ma mathu goru, khaghaneni, anenithu, amesüsi, nu gadathu mithon wina ma kedsakejjü pi mathu cü. Tsü mapi mathu sahang tsüdi mithon wina ma kedsakejjü pi mathu cü.

¹⁸Vvüthiwa wi mathu ma wi gho nu khi, “Kediwa, ikhang na pi ntuwi kuthikeya nmi, ikhang na apisa tsüdila senkhidha nu ikhang sahangthu na nji sadha. Ikhang gwo nu ikhang yyi ketan khe mangla pi no cükeya nmidha.

¹⁹Ikhang ya nshü thsü lalo. Ikhang llithu yisha nsa thsü lalo. Kedsakejjü pi ikhang cü nu ikhang yyi shüyalo. Ikhang na kadimiwa nssümaghathu sa wa, nu ikhang yyi na ma ji saden. Ikhang ya hangya thsüle kesalina asu pi ikhang cü, nu amacü pi ikhang lli wi chiya thsülo.”

²⁰Josef na Ejipt wi kadimiwa ghena ayyi tsüdi shüya. Ejipt nyi tsüdila ma yyi pi njeüthu yishüa, kepaghenanye azeng tsüna nmehaitha sa kesalina; nu ayyi tsüdila kadimiwa ji sa.

²¹Josef na Ejipt yyi kenten kesü na wa pahanwa kecu anyithu pi nssümaghathu sa thsüa.

²²Ma keqhaikedithu yyi ketan shü nkeya sa. Keqhai- kedithu na mathu yyi pi njeüla mehai, kepaghenanye kadimiwa na mathu shei pi mathu kecü tsü dsa nu hangden.

²³Josef na anyithu wi kiza, “Hi kadimiwa ghena nthu nu nthu yyi la shüyadha. Hewi amacü nthu ghena ha sen wa nthu lli wi chiyalo.

²⁴Nthu na alli kewwi wi gishü manga wi kesü pi kadimiwa ncüthu yishü. Kepa wi tsü pahan pi amacü sa, nu pahan pi nthu nu nthu theghithu ghena kedsa sayalo.”

²⁵Mathu khineng “Kediwa, no ikhang kahang hangsha cü; nu ikhang ghena kemehaiwa sa, nu ikhang na kadimiwa nssümagha saden.”

²⁶Tsalina Josef na Ejipt yyi ghena ayen kesü sachi, tsüna alli kewwi wi gishü manga wi kesü na kadimiwa ji. Ayen hawa ha khilila senben. Keqhaikedithu yyi tsü ketan kadimiwa ji nsala.

²⁷Israel nyithu na Ejipt yyi Goshen yegu wi hang, mathu na keban sa nu atsangathu kejon ben.

²⁸Jakob na Ejipt wi amapi tagha nu tagü hang, nu ma amapi meza nu jügha nu tagü hang.

²⁹ Ma shü wa keten tsüwa na tetsaki kegho wi ma tsa Josef cichi nu ma wi khi, “Nkwen pi ipedhi[77] cakhu wi chiya nu no hi pila Ejipt wi vhü nbenle kesa khi kishenlo.

³⁰Hi pi ibaqhaithu gweghe vhü mvuben, tsalina Ejipt wina hi pvü shula ibaqhaithu vhü ketheng pen wi vhülo.” Josef na luneng “Hi no kekhi ti sa cüben.”

³¹Jakob na khi, “No tsüti sa benle kishenlo.” Josef na kishen, nu Jakob na anonkeghe sa awe wi keli dua.