Read Northern Rengma Naga ADECHHÜ 48 Bible Online

ADECHHÜ 48 - Northern Rengma Naga bible

ADECHHÜ 48

¹Matsü pahan seng wi nyu na Josef wi ma ba na naaben le kiza. Tsalina ma ma tsa kinyi Efraim nu Manasseh manyi ssiya nu ma ba Jakob wi wa.

²Jakob na ma tsa Josef na ma ghangchi le ghoben le kekhi za keya wi ma ghechhen sala shagha awe wi donkiya.

³ Jakob na Josef wi kiza, “Kekhang ntsawa Anyiza na Kanaan yyi Luz wi itu gho nu sawegü pi hi cü.

⁴Ma hi wi kiza, ‘Hi atsanga kejon pi no cüden, isanu nshicübvüghathu na anyi mizzatenti kejon saben! Hi ayyi hapi nshicüthu cü nu anuphanla mathu ji sa thsüden’ khile.”

⁵Jakob khi, “Josef, hi he Ejipt wi npi kedugho wi ntsa kinyi pvügha keya tsüna iji; Reuben nu Simeon manyi na itsa tsüti Efraim nu Manasseh manyi la itsa.

⁶Keujüla no atsa kepa wi ben lethu mathu na iji nye; mathu na Efraim nu Manasseh miwi na keben ghong yaben.

⁷ Hi njja Rachel ghena hati saben. Hi Mesopotamia wina gho keten Kanaan yyi wi Efrath cule kesa temejakhang nkesa wi ma shü nu ihathana ntsa sa. Hi ma pi Efrath kewa len kete wi vhüa.” (Efrath tsüna khili pi Bethlehem le khiden.)

⁸Jakob na Josef tsathu mukeya wi ma keü, “Pvüzanyi ha keni ha thothu nu?”

⁹Josef na luneng “Ha keni ha itsa, Anyiza na he Ejipt wi pi hi kecü le.” Jakob na khi, “Manyi ssinu hi wi gholo, hi sawegü pi manyi cü ten le.”

¹⁰Jakob na qhai wa kesalina ma nyon nmehaila nu pala mehaitsü mu meya ladha. Josef na pvüzanyi keni ssinu ma ba wi gho, nu ma manyi khenpie nu kimang.

¹¹Jakob na Josef wi kiza, “Hi no mu nengya keben nondi nkeben, isala Anyiza na hi ya khili ntsangathu la muya thsüdha.”

¹²Tsaseng wi Josef na Jokob pedhi wina manyi pieya nu ma mmi zan mcüggü nu ma tuwi kukedu.

¹³Josef na Efraim pi Jakob kwen tavüwa nu Manasseh pi ajewa donki thsü.

¹⁴Isala Jakob na ma kwen kemiliya nu ajewa pi Efraim na ghanyiwa lela ma li wi chi, nu ma kwen tavüwa pi Manasseh keqhaiwa li wi chiya.

¹⁵Tsaseng wi ma sawegü pi Josef [78] cü nu khi, “Anyiza, iba Abraham nu Isak manyi na kinyi ketenwa na sawegü pi pvüzanyi keni ha kecüwa salo! Anyiza, hi ssigho nansü cu kecüwa na sawegü pi manyi kecüwa salo!”

¹⁶“Tangnyilo, ketizenkesa tsüdi wi hi khushi kecüwa na sawegü pi manyi kecüwa salo! Inyan nu iba Abraham nu Isak nyan yala pvüzanyi keni wina hang kebenwa salo! Manyi ya atsanga nu ashicübvügha kejon ben keyawa saya thsülo!”

¹⁷Josef na ma ba kwen ajewa pi Efraim li wi chi keben mukeya wi ma lebenmagha sa; tsalina ma Efraim li wina ma ba kwen zan sen wa Manasseh li wi chi.

¹⁸Ma ma ba wi khi, “Tsüti nyele, iba. pvüzanyi hawa ha keqhaiwa le, nkwen ajewa pi ma li miwi chilo.”

¹⁹Ma ba na hhaghe nu khi, “Hi chüben le, itsa, hi chüben. Manasseh shicübvüghathu la mizza keti saben. Isala ma cünyu ghanyiwa na ma miwi tiki ben, nu ma shicübvüghathu na mizzatenti kejon sa shagha ben.”

²⁰Tsalina ma tsü ghanan sawegü pi manyi cü nu khi, “Israel nyithu na nshinyi nyan khi nu sawegüben. Mathu hati khiben, ‘Anyiza na no sapi Efraim nu Manasseh ti sa kecüwa salo.’ ” Hatinu Jakob na Efraim pi Manasseh tuwa sa thsüa.

²¹Tsaseng wi Jakob na Josef wi kiza, “No chüben, hi shü wa tendha, isala Anyiza na no ssi benden nu no ssinu nbaqhaithu yyi wi tsü wa neng ben.

²²Hi njünnu nu alamugho sen nu Amor nyithu wi nkakeya Shekhem yyi kenyan yegu tsüpi ncünyuthu nyela no cü ben le.”