Read Northern Rengma Naga ADECHHÜ 7 Bible Online

ADECHHÜ 7 - Northern Rengma Naga bible

ADECHHÜ 7

¹Apvüwa na Noah kiza, “Ntheghithu maben ssinu ahunjjen wi duyalo; kepaghenanye hi ayyi wi no ketan ketsatan nyi muyale!

²No aghangsa kemethathu len kepapa kesa wubanyi tagügü isala nkemethathu wubanyi kesüsü ketan kessiya.

³Awathu la alen kepapa kesa wubanyi tagügü kessiyalo. Aghangsa nu awa alen kepapa kesa ayyi wi hang nu mizzasa wa thsüle kesalina tsüti sayalo.

⁴Ghanan tagü seng wi hi atsankegho kesun pi ghanan jügha nu ghaja jügha ghothsü den, isanu ayyi wi hi sachi ketheng kahangli keben tsüdi dedi thsüaden.”

⁵Noah na Anyiza ma kekiza tsüdila saya.

⁶Noah kahang amapi 600 wi atssüdon na ayyi wi gho.

⁷ Noah nu ma wubvü, ma tsathu nu mathu wubvüthu na atssüdon wina shhuyale ahunjjen non wi duya.

⁸Aghangsa nu awa len kepapa kesa kemethathu nu nkemethathu lela wubanyi tsüdi,

⁹Anyiza na khikechi ti Noah gweghe ahunjjen wi duya.

¹⁰Ghanan tagü seng wi atssüdon na gho.

¹¹ Noah kahang mapi meza tugho asha keni ghanan tagha nu tagüwa wi ayyi non wi atssü keben pen tsüdila pvükhhi nu tang wi atsanku tsüdila shachi,

¹²nu ghanan jügha ghaja jügha ayyi wi atsangho thsü.

¹³Tsü ghanan wi Noah nu ma wubvü manyi tsa kecheng Shem, Ham, nu Jafeth, nu mathu wubvüthu gweghe ahunjjen non wi du.

¹⁴Aghangsa nu asahang kepapa kesa, kizza nu keti, nu awathu len kepapa kesa tsüdila ssinu mathu gweghe du.

¹⁵Kahangli keben len kepapa tsüdi wubanyinyi na Noah gweghe ahunjjen wi du,

¹⁶tsüna Anyiza na khikechi ti sa. Tsaseng wi Apvüwa na ajenka khenya.

¹⁷Ghanan jügha atsan na mahandhila gho nu atssüdon na dhu pi ahunjjen na ma mei wi benya kemehai sa.

¹⁸Atssüdon jikayi pi dhu ntsa nu ahunjjen na ma miwi ben wa.

¹⁹Atssüdon na ji ntsa pi yyishiphon kemisi ntsathu lela donbhon;

²⁰tsüna yyishiphon kemisi ntsathu miwi meter tagü kia.

²¹Ayyi miwi kahangli keben aghangsa, awa, nu anyi tsüdila shüa.

²²Ayyi miwi ahathakissa keten tsüdila shüa.

²³Apvüwa na ayyi wi kahangli keben anyi, aghangsa, nu awathu tsüdila dedi thsüa. Noah nu ma gweghe ahunjjen wi kebenthu tsü ketan meyasa.

²⁴Ghanan meza nu deni sa lela ayyi wi atssü na qan nwa.