Read Northern Rengma Naga ADECHHÜ 8 Bible Online

ADECHHÜ 8 - Northern Rengma Naga bible

ADECHHÜ 8

¹Anyiza na Noah nu ma gweghe ahunjjen wi keben aghangsathu tsü nmali; ma ameghü yala sho thsü nu atssü mo teqha thsüa.

²Ayyi non wi atssü bvü keshhugho pen nu tang wi atsankuthu khen. Atsan nghola,

³ghanan meza nu deni seng wi atssü na ashishi sa qan wa.

⁴Asha tagüwa ghanan tagha nu tagü wi ahunjjen na ki Ararat Yyishiphon miwi ngan wa.

⁵Atssü na zeng pfü wa, nu asha taghawa ghanan atuwa wi ayikhathu shoni mu shagha.

⁶Ghanan jügha seng wi Noah na jjenkubhi shachi

⁷nu aduwwe kizzawa kesü kesun pi bvü thsü. Tsüna kheneng nghola, isala atssü npi keqha chu pighe kevüli wa.

⁸Tsaseng wi Noah na atssü keqha wadhala npi khe chüyale nkhetsü kesü kesun chi,

⁹isala atssü na khilila ayyi donbhon keben ghena nkhetsüwa na ma keka pen nmula. Tsüna kheneng ahunjjen wi gho, nu Noah na ma kwen chang chi nu tsü ssiya.

¹⁰Ma tsüseng wi ghanan tagü hie nu nkhetsüwa tsü kesun nengchi.

¹¹Tsüna minulen wi oliv wa kahang kesü mcü pi nu ma wi gho neng. Tsalina Noah na atssü qan wadhale kesa chüya.

¹²Tsaseng wi ma ghanan tagü hie nu nkhetsüwa tsü kesun nengchi; khilitsü nkhetsü tsüna kheneng ngho la.

¹³Noah kahang mapi 601 asha atuwa ghanan atuwa wi atssükedon na qan wa. Noah na ahunjjen sha nu ghang kevüli chinan ayyi wi atssükedon na keqha wa kebenla muya.

¹⁴Asha keniwa ghanan ngwe nu tagü wi ayyi na qentha sa.

¹⁵Anyiza na Noah wi kiza,

¹⁶“Nwubvü, ntsathu, nu mathu wubvüthu tsü ahunjjen wina ssinu shhulo.

¹⁷Awathu nu aghangsathu tsüdila ssinu no gweghe shhulo, isanu mathu ya mizzasa sen nu ayyi tsüdi wi waya thsülo.”

¹⁸Tsalina Noah na ahunjjen wina ma wubvü, ma tsathu, mathu wubvüthu ssinu shhua.

¹⁹Aghangsa nu awathu tsüdila ahunjjen wina mathu len kepapa wi akhang khang sala shhua.

²⁰Noah na Apvüwa wi kekinyipen kesü saya; ma aghangsa nu awa kemetha kesüsü khuya nu tsü maben pi kekinyipen miwi mecang pi ahhansha sachi.

²¹Apvüwa na ahhansha kesa kemecang han tsü ma nen nu ma ketanla hati khi, “Anyi kekuli ghena hi kishen-keshi pi ayyi wi nchi nengdha; anyi ma kepvüza tsü wina ma kemeshen nmehai kesa tsü hi chüben. Hi haseng witsü nansü ti ayyi wi kahangli keben tsüdi meyasa nengdha.

²²Ayyiwa ha keben chu ciwi pala cü keyang nu kewwi tsü saben. Ciwi keshüthangla kese tsü nu keyeng tsü, pathsü nu mazu, aghaja nu ghanan saben.”