Read Northern Rengma Naga ADECHHÜ 9 Bible Online

ADECHHÜ 9 - Northern Rengma Naga bible

ADECHHÜ 9

¹ Anyiza na sawegü pi Noah nu ma tsathu cü nu khi, “Atsanga kejon benyalo, isanu nthu shicübvüghathu na ayyi tsüdi wi hangyalo.

²Aghangsa, awathu, nu anga tsüdi nthu messi nu hang thsüden. Mathu tsüdi pi nthu kekhu wi chidha.

³Nthu na tsüthu nu aghangwen la dsaya mehai, hi tsüthu tsüdi pi nthu tsse sa thsüdha.

⁴ Isala ajjü na asa wi keben tsü ndsala, kepaghenanye kahangli na ajjü wi ben.

⁵Kesüle kesü lela anyi kahangli kepathiwa hi ma miwi kahangli ya nengden; nu aghangsa na anyi kahangli kepathiwa hi tsü pi shü thsüaden.

⁶Anyiza na anyi pi ma tsi ti sachi, tsalina thowa na anyi pathi khe anyi kepa wi ma pathiaben.

⁷ Nthu atsanga kejon ben meyathu yishü, isanu nthu shicübvüghathu na ayyi tsüdi wi hangyalo.”

⁸Anyiza na Noah nu ma tsathu wi kiza,

⁹“Hi khili nthu nu nthu shicübvüghathu, kahangli keben tsüdi — awa nu aghangsathu, — nthu gweghe ahunjjen wina shhugho keyathu tsüdi ssinu cenkethenjüh kesü saben.

¹¹Ajüh hathu wi nthu ssinu cenkethenjüh saben: Hi ijüh khuchiben, haseng witsü hi atssükedon pi kahangli keben tsüdi meyasa nengdha; nu atssükedon pi ayyiwa tsü meyasa nengdha.

¹²Hi nthu nu kahangli keben tsüdi ssinu anuphan cenkethenjüh sa keben zensu wi,

¹³hi cünieqho-keshon pi akulu wi chitheng. Tsüna hi ayyiwa ssinu cenkethenjüh zensu.

¹⁴Hi khathansha atssan wi akulukeshü sengho nu cünieqho-keshon muya khe,

¹⁵hi nthu nu aghangsathu tsüdi tuwi ijühkhuchi ketheng atssükedon pi kahangli keben tsüdi meyasa nengdha kesa tsü meshen yaden.

¹⁶Akulu wi cünieqho-keshon shhugho nu hi tsü muya lethu hi ayyi wi kahangli keben tsüdi ssinu anuphan ghena cenkethenjüh sa ketheng tsü meshen yaden.

¹⁷Tsüwa tsüna hi ayyi wi kahangli keben tsüdi ssinu ajüh cenketheng zensu.”

¹⁸Ahunjjen wina shhukeya Noah tsa kecheng na Shem, Ham, nu Jafeth. (Ham na Kanaan ba).

¹⁹Noah tsa kecheng na ayyi wi anyi tsüdi bamyithu.

²⁰Noah na allikeca nyi kesü, ma kemeshentsse ton pi kisheng nyi atuwa.

²¹Ma kisengtssü pahan jjükeya seng wi ma dina wa, athsümeni khushi pi nu kemissü ma nithsüjjen wi jenben.

²²Kanaan bawa Ham na ma ba kemissü tsü munu shhula ma cünyuwa keni kiza.

²³Tsaseng wi Shem nu Jafeth manyi athsü pi manyi depfü wi chiya nu demisenneng lentsen du athsü pi manyi ba wheng cüa; manyi mmi pi manyi ba kemissü tsü n-ghang.

²⁴Noah na metsa shagha nu ma tsa ghanyi ntsawa na ma miwi khati sa khe chüya,

²⁵nu khi, “Kishen-keshi na Kanaan miwi benlo! Ma ma cünyuthu magha kesü saden.

²⁶Apvüwa Anyiza ya sawegü pi Shem cülo! Kanaan na Shem maghawa saden.

²⁷Anyiza na Jafeth[21] sapi jikayi wa keyawa sa! Ma shicüthu ya Shem nyithu gweghe hang keyawa sa! Kanaan na Jafeth maghawa saden.”

²⁸Atssükedon seng wi Noah na amapi 350 hang,

²⁹nu ma kahang amapi 950 wi shüa.