Read Northern Rengma Naga 2 SAMUEL 11 Bible Online

2 SAMUEL 11 - Northern Rengma Naga bible

2 SAMUEL 11

¹ Leghe tsüwi kadimithu na aghisa waketen tsüwi David na Joab nu ma kekhu wi kedithu nu Israel nyi süpahizi kesunshi chi, nu mathu na Ammon nyithu chaya nu Rabbah nyunutiwa tsü vüya. Isala David na Jerusalem wi ben.

²Ghanan kesü minulen wi David na wa khhali benla nu shagha kadijjen mili wi ki. Ma ciwi kegoeten nan nza kesü na ma jjen wi atssükizü keben muya. Nza tsüna atsimehai ntsawa.

³Tsalina ma nyilo kesü kesun pi wala nza tsüna thowa khe chüyalo sa, nu nzawa tsüna Hitti nyiwa Uria wubvü nu Eliam nga Bathsheba le kesa chüya.

⁴David na nzawa tsü ssigholo kesa nyilothu kesun chi, mathu na nzawa ssinu ma wi gho nu ma nzawa tsü ssijen. (Nzawa na asha kaghapeng nzayen tsü sacen nu ma samethadha.) Tsaseng wi ma ajjen wi kheneng wha.

⁵Matsü pahan seng wi ma atsa-npvüdha kesa chüya nu ketsijüh kesü kesun pi David wi chi nu ma kiza.

⁶David na tsaseng wi ketsijüh kesü kesun pi Joab wi chi, “Hitti nyiwa Uria tsü kesun pi hi wi chilo.” Tsalina Joab na ma kesun pi David wi chia.

⁷Uria na gho cukeya wi David na Joab nu süpahithu na kemehai saben ma, nu aghi khati saben nu kesa ma wi keü.

⁸Tsaseng wi ma Uria wi khi, “Whala ajjen wi matsü keu mnanyalo.” Uria na bvüa, nu David na aju kesü pi ma jjen wi kesunchi.

⁹Isala Uria na ajjen wi nwhala wa kadijjen kaghapeng jenka wi kadimiwa ghikehiethu gweghe jen wa.

¹⁰Khathansha wi David na Uria na ajjen wi nwhale kesa zaya khe ma Uria wi keü, “No matsü kesie nghola nu gho neng ben; mangkesa na ajjen wi nwhala nu?”

¹¹Uria na luneng, “Israel nu Judah nyithu na aghi wi ben, nu Cenkethenjüh Khitson na mathu gwegheben; hi benchüwa Joab na ma kedithu ssinu ayela wi kemnanpen saben. Hi khatinu ajjen wi whala dsajjü nu iwubvü gweghe jenben nu? No hang keben ti hi kishenben, hi khiewila hati ha saya nben!”

¹²Tsalina David na khi, “Isalethu, nansü hewi mnanben lalo, hi dhitsü wi no kesun pi wha neng thsüa na.” Tsalina Uria na tsü ghanan nu dhitsüwa Jerusalem wi ben wa.

¹³David na aghaja kedsakejjü wi ma cichi nu ma ya adinaya thsüa. Isala tsü ghaja la Uria na ma jjen wi nwhala wa kadijjen ghikehiethu pen wi ma sükhuthsü mphi nu jen wa.

¹⁴Ghanenwa wi David na lesü kesü zhüpi Joab cü nu pi Uria wina kesunchi.

¹⁵Ma kezhü na: “Aghikesa ntsa witsü Uria pi atuwa sa thsülo, tsaseng wi aseng kheneng nu ma pathi thsülo.”

¹⁶Tsalina Joab na anyunutiwa tsü vüsen keben wi ma Uria kesun pi ma chükeben aghinyi na khang ntsa keben pen witsü chi.

¹⁷Tsaseng wi aghinyi süpahithu na anyunutiwa wina shhugho Joab süpahithu ssikesali; David kedithu pahan nu Uria la pathia.

¹⁸Tsaseng wi Joab na aghikesa cüki tsü kesun pi David wi chi nu ma kiza,

¹⁹nu ma hati nyilowa tsü kecükegwe chi, “No aghikesa cüki tsüdi pi kadimiwa kiza kesa seng wi

²⁰ma aghepvü nu no wi keüya mehai, ‘Nthu mangkesa na anyunutiwa tetsaki whala mathu ssisaten nu? Mathu na ajjen-keshon wi n-niya nu alakusü pi nthu gaben kesa tsü nthu na nchü kwe?

²¹ Nthu na Gideon tsa Abimelek tsü khatinu pathi khe meshen meya kwe? Tsüna Thebez wi kinyibvü kesü na ajjen-keshon miwi asu kenyeggü lon kesü pasha pi ma kecenthi le. Isathu, nthu mangkesa na ajjen-keshon tetsaki whaten nu?’ Keujüla kadimiwa na no wi ha keü lethu, ma wi, ‘No kekhu wi kediwa Uria la pathidha le,’ kizalo.”

²²Tsalina nyilowa na David wi wa nu Joab na ma mangwa khilo khi khe pi ma kiza.

²³Ma khi, “Ithu ghinyithu na ithu miwi khangkila anyunutiwa wina shhugho ayela wi ithu ssisale, isala ithu na mathu jügü neng sendu anyunutiwa kaghapeng jenka non wi chia.

²⁴Tsaseng wi mathu na ajjen-keshon chhen nu alakusü pi ithu ga, nu kadimiwa kedithu pahan gathia; no kekhu wi kedi Uria la gathi le.”

²⁵David na nyilowa wi khi, “Joab satenong nu accükwen meshü lalo ma kizalo, kepaghenanye thowa na aghishü ten khe no khiela khiya nben. Khangkayila anyunutiwa ssikaghashen nu tsü miwi khangyalo ma kizalo.”

²⁶Bathsheba na nyu ma wuba pathidha le kesa zakeya wi ma ghena anongü.

²⁷Anonke-ü tsü cenkeya seng wi David na nyu ya Bathsheba ssinu kadijjen wi gho thsü; ma David wubvü saya nu atsa kesü pvügha pi ma cü. Isala Apvüwa na David na mangwa sa khe tsü n-nenla.