Read Northern Rengma Naga 2 SAMUEL 12 Bible Online

2 SAMUEL 12 - Northern Rengma Naga bible

2 SAMUEL 12

¹ Apvüwa na atusenjüh-kechüwa Nathan kesun pi David wi chi. Nathan na ma wi wa nu khi, “Ciwi anyuti kesü wi anyi meshu keni na hang; kesü na keban nu kepawa na ketha-u sa.

²Kebanwa na amesüsi nu khaghaneni kejonla ben,

³isala ketha-uwa na ma shükeya khaghaneni zza kesütan ben. Ma tsü noncca, nu tsüna ma jjen wi ma tsanga gweghe shagha. Ma ma phedhi wi tsü pieya nu ma nün pahan pi tsü ghanja, nu tsü yala ma hyi wi jjü thsü. Khaghaneni zza tsüna ma ghena anga kesü ti sa.

⁴Ghanan kesü wi kijünyi kesü na kebanwa jjen wi gho. Kebanwa na ma sahang kesüla pathi pi kijünyi wa kedsakejjü nsa mvula ma wala ketha-uwa khaghaneni zza tsü pathi pi ma pfüwa ghena kedsakejjü kiden pi cüa.”

⁵David na kebanwa miwi aghepvü ntsa sa nu khi, “Hi hang kebenwa Apvüwa wina anyi tsüwa tsüpi shü thsü qole kishenben!

⁶Kepaghenanye ma nkemehai hati kesa ghena ma khuya kesa ju mejü tughu pi ndhi nengthu yishü.”

⁷Nathan na David wi khi, “Anyi tsüwa tsüna no le. Nu Apvüwa Israel Nyizawa na hati khiben: ‘Hi no pi Israel kadimiwa sa thsü nu Saul kwen wi no kekasha cü.

⁸Hi ma wubvüthu nu ma kadiyyi pi no cüdha; hi no pi Israel nu Judah miwi kadimiwa sa thsüdha. Keujüla hana n-non nkwen lethu, hi tsü miwi keni ju pi no cü kesa.

⁹Isalethu, no mangkesa na ayenkhukechi tsü n-niela nu? No mangkesa na pala nkemehai hati saten nu? No aghi wi Uria pathi thsüdha; no Ammon nyithu ya ma pathi thsüa, nu no ma wubvü ssiyadha!

¹⁰Khili nten na abvüye tsüdi wila nshicübvüghathu pahan na yasayala keshü wi shüben, kepaghenanye no ijüh nkina nu Uria wubvü ssiya kesalina.

¹¹ Ntheghi ja wi anyi pahan na ketizenkesa sen nu nmiwi ghoben kesa hi kishenben. Hi nwubvüthu khuya nu mathu pi anyi kepa wi cü lethu, no tsüti kesa tsü muyaben; nu ma aghanan kethang wina mathu ssimehai ben.

¹²No kuthila kesami sadha, isala hi aghanan kethang wina ha sapi Israel nyi tsüdi yala muya thsüden.’ ”

¹³David na khi, “Hi sami pi Apvüwa shundha.” Nathan na khineng, “Apvüwa na no kesami teshi cüben; no shü nben.

¹⁴Isala no kekuli ha sapi Apvüwa nyankenyen kesalina ntsawa tsüna shüaben.”

¹⁵Tsaseng wi Nathan na ajjen wi wha. Apvüwa na Uria wubvü na atsa pvügha pi David kecü tsü yala naa ntsa wa thsüa.

¹⁶David na atsa tsü ya mehaiya thsülo kesa ghena Anyiza wi kekhie sa. Ma mangla ndsajjü mvula, nu aghaja kaghapengla ma kejenben wi du aghaja thangthang ayyi wi nkhwen.

¹⁷Ma jjen wi kedithu na wa ma shaghalo sa lela ma hhaghe nu mathu gweghe ndsajjü mvula sa.

¹⁸Tagü ghanan wi atsawa na shü, nu David kekhu wi kedithu na atsawa keshü cüki tsüpi ma kiza messiben. Mathu na khi, “Atsawa na hangkeben wi ccünkhala ikhang na ma ccüneng lela ma ikhang nccüneng mvu le. Ma tsawa na shüdha le kesa ikhang na khatile ma kizaya mehai nu? Ma ketanla ma patenaya mehai le!”

¹⁹David na mathu na khokho wi cakhusha wi keccünengli keben zakeya wi ma atsawa tsüna shüdha le kesa chüya. Tsalina ma mathu wi keü, “Atsawa tsüna shüdha kwe?” Mathu na luneng, “Anle, ma shüdha le.”

²⁰David na ayyi wina shagha atssükizüya, ma li hheya, nu ma thsümeni kemiliya. Isanu ma wa Apvüwa jjen wi kekinyi sa. Ma kheneng kadijjen wi kegho wi ma kedsakejjü khie nu pi ma cü meyi ma dsajjüya.

²¹Ma kekhu wi kedithu na ma wi khi, “Atsawa na hangkeben wi no ma ghena qai nu ndsajjü mvula sa, isala ma shü nan no shaghala dsajjüya. Ikhang na ha jjügi chüshi meya ladha le!”

²²David na luneng, “Anle, ma hangkeben wi hi ma ghena qai nu zile. Hi kemeshen Apvüwa na hi nantizenchi nu atsawa ya shü thsü nbenshe sale.

²³Isala ma khili shü dhathu hi mangsale zi bendha nu? Hi ma kahangli ssi neng ghoya mehai kwe? Hi la ghanan kesü ma keben pen wi waden, isala ma khiela hi wi gho nengya nbendha.”

²⁴Tsaseng wi David na ma wubvü Bathsheba leben satecca. Ma wa ma wubvü gweghe nu ma atsa kesü pvügha cü, nu David na ma nyan pi Solomon cia. Apvüwa na pvüzanyiwa tsü nen,

²⁵nu atusenjüh-kechüwa Nathan kiza nu pvüzanyiwa nyan pi Judidia[9] ci thsü, kepaghenanye Apvüwa na ma nen ntsa sa.

²⁶Tsü tsüwi Joab na Ammon ghazen nyunutiwa Rabbah ssisa nu tsü nkayale saben.

²⁷Ma nyilothu kesun pi David wi chi nu khi thsü: “Hi Rabbah tsü ssikaghashen nu atssü pi cükeben tsü nkayadha.

²⁸Khili nsüpahi kepathu saghuya nu anyunutiwa tsü no ketanla nkayalo. Hi anyunutiwa tsü nkaya nu tsüpi inyan saya mvu nbenle.”

²⁹Tsalina David na ma süpahithu saghuya nu Rabbah wi wa tsü ssikaghashen nu tsü nkaya.

³⁰David na Ammon nyi cenpvü Molek[10] tsikezhü li wi suna kadiliwen kekiyan kilogram changha nu manga-u nu alon menkedhu kesü ciwi keben tsü khuya. David na alon menkedhuwa tsüpi ma kadiliwen wi chiya. Ma anyunutiwa wi la atsanqai ji ntsa shuya,

³¹nu ciwi anyithu meten pi achan kahanji, amkhu, nu ampvüthu cüh, nu mathu ya yyimecang-lonthu sa thsü. Ma Ammon nyuti kepathu wi la anyithu tsüdi pi tsü makesü sa thsü. Tsaseng wi ma nu ma nyithu na Jerusalem wi kheneng wha.