Read Northern Rengma Naga 2 SAMUEL 13 Bible Online

2 SAMUEL 13 - Northern Rengma Naga bible

2 SAMUEL 13

¹David tsawa Absalon na ma tssüggüwa npi n-nukewa atsimehai ntsa kesa kesü ma nyan Tamar na ben. David tsa kepawa Amnon na Tamar nenya.

²Ma nzawa nen ntsa saya kesalina ma gwonaa wa kepaghenanye ma Tamar yaya nten; ma ghala pvünyimetha kesü ghena pi npvüza nccüneng thsüla benden.

³Isala ma ma pvüshang kesü ma nyan Jonadab, David cünyuwa Shamma tsa na ben. Jonadab na achokepvü nyi kesü.

⁴Ma Amnon wi khi, “No kadimiwa tsa kesü lela hi ghanan kaghapeng no nhathanathi mukeben ha ma jjügi mangwa saben nu?” Ma luneng, “Hi icünyuwa Absalon tssüggüwa Tamar nen benle.”

⁵Jonadab na ma wi khi, “No naa keben ghe sa nu awe wi dulo. Khathansha wi nba na no metule gho khe hati ma wi, ‘Nchala itssüggüwa ya ghola amesa gü pi hi dsa thsü, nu hewi hi kemu wi atssesa nu hi ma kwen wi tsü dsaya mvu benle,’ khilo. ”

⁶Tsalina Amnon na kinaa ghe sa nu awe wi dua. Kadimiwa David na ma ghangchile kegho wi Amnon na ma wi khi, “Nchala itssüggüwa Tamar ya ghola hewi hi kemu wi amesa pahan gü nu ma kwen wina pi hi dsaya thsülo.”

⁷Tsalina David na kadijjen wi ajüh pi Tamar wi kesunchi nu khi, “Nbaghawa Amnon jjen wi whala atssesa pi ma dsaya thsülo.”

⁸Tamar na ciwi wha nan ma baghawa na awe wi jen keben muya. Ma wala awheng pahan khuya nu pi minnu ya, nu ma kemu wina tsüpi amesa pahan güya. Ma amesa tsü güya

⁹nu kegükhu wina tsüthu sen wa Amnon na tsü dsalo pi cü, isala ma tsü ndsa mvula. Ma khi, “Anyi tsüdi kesun pi bvü thsülo,” — nu mathu tsüdila bvüa.

¹⁰Tsaseng wi ma nzawa wi khi, “No amesa tsü sen nu hewi iwe wi gho tsüthu pi hi dsaya thsülo.” Tamar na amesa tsü khu sen ma wi wa.

¹¹Tamar na amesa sen nu ma dsa thsüle kegho wi ma Tamar ghantenya nu khi, “Ghala awe wi hi gweghe jenlo!”

¹²Nzawa na khi, “Mmale! Hi meten pi anyankekinyen kekuli kesü ha nsa lalo! Hati kesau ayen nmile!

¹³Hi khatinu nyu ja wi immi piekiya nu? Nu nghena, no Israel ja wi kejüghe pvü ntsa saben. Tsalina no nchala wala kadimiwa kizalo, nu ma hi pi no cüaben kesa hi chütiben.”

¹⁴Isala ma nzawa jüh tsü nkina mvu; nu ma nzawa miwi züki kesalina ma miwi khangya nu ma messameshüa.

¹⁵Tsaseng wi Amnon na Tamar nanmeghü ntsa sa wa; nu ma kishi nzawa kenen miwi khili tsü ma nanmeghü kayi wadha. Ma nzawa wi khi, “Shagha bvülo!”

¹⁶Nzawa na luneng, “Mmale! No hati hi kesun pi bvü thsü kesa hana no imiwi kesazzi tsü miwi diki benle!” Isala Amnon na ma jüh nkina mvula;

¹⁷ma ketsikinawa cichi nu ma wi khi, “Nza hawa ha pi ituwi na bvü thsülo! Ma pi akhemi wi shhu thsü nu ajjen khetenyalo.”

¹⁸Amaghawa na nzawa pi akhemi wi shhu thsü nu ajjen khenya. Tamar na tsü tsüwi npi n-nukewa kadinga thsümeni agwomejuwa kaghazu ayakhu pi ma tsisa ketheng tsü pvüden.

¹⁹Ma ajuwen pi ma li wi chi, ma gwomejuwa mezüqhe, nu ma kwen pi ma mmi shabhon pvüla bvüa.

²⁰Ma baghawa Absalon na ma mukeya wi ma wi keü, “Amnon na no messameshüdha kwe? Itssüggüwa, tsüghena nleben güccü ntsa nsa lalo. Ma nbaghawa, tsalina ha cüki pi anyi thola nkiza lalo.” Tsalina Tamar na ma ketan Absalon jjen wi ma hathanathi hang wa.

²¹Kadimiwa David na ha cüki tsüdi zakeya wi aghepvü ntsa sa.

²²Absalon na Amnon na ma tssüggüwa Tamar messameshü kesalina ma nanmeghü ntsa sa nu ma lela nccüneng.

²³Amapi keni seng wi Absalon na Efraim nyuti kete Baal Hazor wi ma khaghaneni ssen ceben, nu ma ciwi kaditsathu tsüdi cichi.

²⁴Ma kadimiwa David wi wa nu khi, “Njenkeben Kadimiwa, hi ikhaghaneni ssen ceben. No nu nkekhu wi kedithu la akho sa keben witsü ghoya mehai ma?”

²⁵Kadimiwa na luneng, “Nyele, itsa! Keujüla ithu maben gho lethu, ngüccü mtsü shaben.” Absalon na khvu sa, isala kadimiwa na nmale khi, nu ma Absalon kesun pi bvü thsüa.

²⁶Isala Absalon na khi, “Isalethu, no icünyuwa Amnon ketan lela gho thsü ma?” Kadimiwa na keü, “Mangkesa na ma no gweghe wa nu?”

²⁷Isala Absalon na David na Amnon nu ma tsa kepathu tsüdi ya Absalon gweghe npi kewa thsü chu khvu sa. Absalon na kadimi ghena kesa qo kemishu keti kesü sa,

²⁸nu ma maghathu wi kecükegwe chi: “Amnon na kisengtssü kejon jjü pi adinaya kesa ghanglo, nu hi ahza khuchi lethu, ma pathilo. Nmessila. Hi akhhiwa tsü pvüyaben. Kempvüza sa nu nkesütu lalo!”

²⁹Tsalina amaghathu na Absalon kecükegwethu tsü nie nu Amnon pathia. David tsa kepathu tsüdila gada miwi kiya nu bvü shan.

³⁰Mathu na ajjen wi wha ketenjü alenca wi nyu na David wi kiza, “Absalon na ntsathu thola nheila pathidhale!”

³¹Kadimiwa na ahathakina wina shagha ma thsümeni mezüqhe, nu ayyi wi khulidua. Amagha ma gweghe kebenthu la athsümeni mezüqhe.

³²Isala David cünyuwa Shamma tsawa Jonadab na khi, “Njenkeben Kadimiwa, mathu na ntsathu tsüdila npathile. Amnon ketan shüdha. Amnon na ma tssüggüwa Tamar messameshü kesa nten na Absalon na hati sale kidenya kesa khiya mehai.

³³Tsalina ntsathu tsüdi shü dhale kesa jühtheü tsü n-nondi lalo; Amnon ketan pathidhale.”

³⁴Tsü tsüwi Absalon na bvüdha. Isakeben wi süpahi aghikehiewa na anyitenti keti kesü na Horonaim wi yyishiphon wina alen wi dugho keten muya. Ma kadimiwa wi wala ma mangwa muya khe tsüpi ma kiza.

³⁵Jonadab na David wi khi, “Hi mathu na ghobenle kekhi tsüti gho ketenthu katsü na ntsathule!”

³⁶Ma ha khisha meyi David tsathu na gho cuya; mathu na qai, nu David nu ma kekhu wi kedithu la qai ntsa sa.

³⁷ Absalon na bvüsen Geshur kadimiwa Ammihud tsa Talmai wi wala amapi kecheng ciwi ben. David na ma tsawa Amnon ghena matsü kesiela anongü;

³⁹isala Amnon shü nu ma lebencca keya seng wi ma ma tsawa Absalon nmvuya.