Read Northern Rengma Naga 2 SAMUEL 14 Bible Online

2 SAMUEL 14 - Northern Rengma Naga bible

2 SAMUEL 14

¹Kadimiwa David na Absalon nmvu ntsa keben tsü Joab na chüben,

²tsalina ma Tekoa wi hang keten achokepvü nza kesü cichi. Nzawa na gho cukeya wi ma nzawa wi khi, “No anongü keben ghe sala anonkegü thsümeni pvüya nu nli nhhela. Nu nza kesü matsü kesiela anongü keben kekuli ti salo.

³Isanu kadimiwa wi wa nu hi no mangwa khilo khi khe pi ma kizalo.” Isanu Joab na ma mangwa khilo ben khe khipi nzawa kiza.

⁴Nzawa na kadimiwa wi wa nu kenyuwakü wina ayyi wi nkhwendu nu ma wi khi, “Njenkeben Kadimiwa, hi kiqa chilo!”

⁵Kadimiwa na nzawa keü, “No mangwa yamvuben nu?” Nzawa na luneng, “Hi ketha-u denyile kesü. Iwuba na shüdha.

⁶Kediwa, hi atsa keni na ben, nu ghanan kesü manyi alli wi kitagha shagha, nu ciwi thola manyi kebisha nyi na nmi; manyi meshu kesü na kepawa pathile.

⁷Nu itheghithu na khili tsüdila hi shun nu hi itsa tsüpi mathu kwen wi chicülo khieben, isanu ma ma cünyuwa pathi kesalina mathu na ma pathiale kesa ghena. Keujüla mathu na tsüti sa lethu, hi atsa kesüla nmila tendha. Mathu na hi kaghang asakhenwa tsü yasa nu iwuba tsa kesüla pi ma nyan sa nben thsüla ben.”

⁸Kadimiwa na luneng, “Ajjen wi whalo, hi nghena sacü ben na.”

⁹Nzawa na khi, “Njenkeben Kadimiwa, no mangwa sacü khe hi nu itheghi na kesami tsü pvüben; no nu kaditheghi na kesami mangla nmi.”

¹⁰Kadimiwa na khineng, “Keujüla anyi pahan na no pateqhe lethu, ma ssinu hi wi gholo, ma khiela nlikesaghang sa neng nbendha.”

¹¹Nzawa na khi, “Njenkeben Kadimiwa, nchala Apvüwa n-Nyiza wi kekhie salo, isanu ishili itsa keshü jukhiya ketenwa tsüna itsa kepawa tsü pathi nu kesazzi keti kesü nsa thsüle kesalina.” David na luneng, “Hi hang keben Apvüwa nyan wina khishiben, ntsawa lissen kesüla ayyi wi qanca keya nmi.”

¹²Nzawa na khi, “Njenkeben Kadimiwa, nchala hi ya ajüh kesütan khi thsülo.” Ma “Anlo” khineng.

¹³Nzawa na ma wi khi, “Mangkesa na no Anyiza nyithu tuwi kesazzi hati saten nu? No ntsawa bvü kesawa yala kheneng ngho thsülaben, tsalina no khili kekhi ti no ketanla no meshensadha.

¹⁴Ithu tsüdila shüa tendha; ithu na atssü pi ayyi wi keshushachi nu saghu neng nkeya ti sadha. Anyiza na keshüwa sapi hang neng ncü, isala kadimiwa tsü kushinyiwa ssi neng ghole kesa alen kesü bhaya mehai le.

¹⁵Njenkeben Kadimiwa, hi gho ajüh khipi no kekiza ma jjügi na anyi pahan hi pateqhe keben ghena hi no kiza nu no ya hi kekhiewa tsü sapi cü thsüle kemeshen wina le.

¹⁶Kepaghenanye no ijüh kina chi nu anyi kesü Anyiza na pi ma nyithu kecü yyi wi hi nu itsa ishinyi yasale kebenwa kwen wi kekasha cüben kesa nondiben.

¹⁷ Nu hi kemeshen tsü njüh khishikechi tsüghena hi kecca muyaben; kepaghenanye kadimiwa na Anyiza nyilo ti kemehai nu nkemehai tsü chü kepapa sayaden. Apvüwa n-Nyiza na no ssiben ketenwa salo!”

¹⁸Kadimiwa na luneng, “Hi pala kesü pi no keüden, nu no atsentsawa pi hi nkizathu yishü.” Nzawa na luneng, “Hale ha lela pi hi keü chilo. Njenkeben Kadimiwa.”

¹⁹Ma nzawa keü, “Joab na no ya ha khi thsüben kwe?” Nzawa na luneng, “Hi kemetha wina kishenben, Njenkeben Kadimiwa, mangla sanu no keü kebenwa tsü nlunengla meya cha. Tsüna ntsakhiwa, nkekhu wi kediwa Joab na hi mangwa sa nu mangwa nkhithu yishü khe pi hi kizale.

²⁰Isala ma ha jjügi maben satemeshon chile kesalina ha sale. Njenkeben Kadimiwa, no Anyiza nyilowa kemetsa ti mangwa saben khe mabenla chübenle.”

²¹Tsaseng wi kadimiwa na Joab wi khi, “Hi no mangwa nmvuben khe tsü sale cenyadha. Wala pvüzawa Absalon ssinu hewi gholo.”

²²Joab na kenyuwakü wina ayyi wi nkhwendu nu khi, “Njenkeben Kadimiwa, Anyiza na sawegü pi no kecüwa salo! No hi kekhie sacü kesalina hi khili ntuwi hi kenen muyadha kesa hi chüben.”

²³Tsaseng wi ma shagha nu Geshur wi wa, nu Absalon ssi neng sen Jerusalem wi gho.

²⁴Isala kadimiwa na Absalon na kadijjen wi nhang lalo kesa ahza khuchia. Kadimiwa na khi, “Hi ma mmi ghang mvu nbenle.” Tsalina Absalon na ma ketanla ma jjen wi hang nu kadimiwa tuwi nghola.

²⁵Ciwi Israel ja wi anyi kesüla Absalon ti atsikemehai nmi; ma ccü na ki ma li kecu mangla nkemehai nmi.

²⁶Ma lissen na sha ntsawa, nu amapi kesü wi tsüna sie ntsa sa nu kiyan shagha lethu kuti ceden. Tsüna tsü tsüwi kadipen wi kuwhu kenie wina kilogram keni miwi whuya den.

²⁷Absalon na atsa kecheng nu anga kesü ma nyan Tamar atsimehai ntsawa kesa na ben.

²⁸Absalon na kadimiwa mmi nmula amapi keni Jerusalem wi hang.

²⁹Tsaseng wi ma Joab cichi nu ma ghena kadimiwa wi walo keü, isala Joab na nghola. Absalon na kheneng ma cichi, isala Joab na ngho mvula hhaghea.

³⁰Tsalina Absalon na ma maghathu wi khi, “Ghangchilo, Joab lli na illi kekhenghe, ma lli wi achentha na shigü shhughoben. Wala anni pi tsü mecang chilo.” Tsalina mathu na wa anni pi alli tsü mecang chia.

³¹Joab na Absalon jjen wi wa nu ma wi khi, “Mangkesa na nmaghathu na illi mecangchi nu?”

³²Absalon na luneng, “Kepaghenanye hi no cichi lela no nghola. Hi no ya wala kadimiwa wi ighena khi thsü mvuben: ‘Mangsale hi Geshur teshi nu gho hewi ben nu? Hi ciwi kebenwa ighena mehai kesa nan.’ ” Isanu Absalon na khi, “Hi kadimiwa metule kesa ghena no ighena kecükepeng thsü mvu benle, nu keujüla hi samitheng lethu ma ya hi pi shü thsülo.”

³³Tsalina Joab na Kadimiwa David wi wa nu Absalon na mangwale khi khe pi ma kiza. Kadimiwa na Absalon cichi, nu Absalon na ma tuwi whala ayyi wi nkhwendu. Kadimiwa na Absalon kimang nu kemehai sala ma ssiya.