Read Northern Rengma Naga 2 SAMUEL 15 Bible Online

2 SAMUEL 15 - Northern Rengma Naga bible

2 SAMUEL 15

¹Haseng wi Absalon na ma ketanla ma ghena goru- gari kesü nu goruthu, nu ma ssi wa thsüle kesa ghena anyitenti kidenya.

²Ma ghanen mitu shagha nu wa anyunutiwa kaghapeng jenka wi alen kete wi nganden. Khathansha wi anyi pahan na kicennali sengho kadimiwa ya südhe thsü mvula gho khe, Absalon na ma cichi nu ma khiewa na gho khe keüden. Tsaseng wi anyi tsüwa na ma mangwa mizza wina gho khe pi ma kiza.

³Absalon na hati khi, “Ghangchilo, no khi keben tsüna mehai nu meshon benle, isala kadimiwa na anyi kesüla kesun pi no kaghatenjüh tsü nkina thsüle.”

⁴Nu ma tsümiwi la khi, “Hi pendhenyi kesü salo kheshilan! Isanu anyi kesü le kesü lela kicennali nyelela kaghatenjüh sen nu hi wi gho lethu, hi kemeshonwa tsü sapi ma cüakesa.”

⁵Anyi thowa na Absalon wi gho nu ma tuwi kukedu khe, ma anyi tsüwa zanki nu ma kimang cüden.

⁶Israel nyi na kadimiwa wi ajühkaghaten kegho tsüdi miwi Absalon na hati sa, tsalina ma mathu kenenwa pvüya.

⁷Amapi mejü seng wi Absalon na Kadimi David wi khi, “Kediwa, hi ya Hebron wi wa nu Apvüwa wi hi ajüh khishi ketheng tsü sa thsülo.

⁸Hi kheni Siriya yyi Geshur wi keben hi Apvüwa wi hati ijüh khishitheng, keujüla ma hi ssineng wha Jerusalem wi chicü lethu, hi Hebron wi wa ma kinyiden.”

⁹Kadimiwa na khi, “Nlebencca walo.” Tsalina Absalon na Hebron wi wa.

¹⁰Isala ma nyilothu kesun pi Israel mizza tsüdi wi chi nu khi thsü, “Nthu na khathansha wi tutuwa kekhou hhai zaya khe hati jishalo, ‘Absalon na Hebron wi kadimiwa sayadha le!’ ”

¹¹Ciwi Absalon na ci kechithu anyi meza keni Jerusalem wina ma gweghe wa; mathu tsüdi acho ha mangla nchüla kenondi kemehai wina wa.

¹²Nu Absalon na ahhansha sa keben wi ma Gilo nyuti wi Ahithofel Kadimi David kesansiwa tsü la cichi. Kadimiwa keshun cho hana zükayi nu Absalon senkeniethu na jikayi saya.

¹³Nyilo kesü na hapi David kiza, “Israel nyithu na Absalon wi mathu jühkeya khishi bendha.”

¹⁴Tsalina David na ma gweghe Jerusalem wi keben kedithu tsüdi wi kiza, “Ikhang na Absalon tubvüya mvu lethu, wan bvü nsathu yishüdha! Wan wanlo! Nyelethu ma wan hewi gho ikhang chaya nu anyunutiwa wi anyithu tsüdi pathia tendha!”

¹⁵Mathu na luneng, “Anle, Njenkeben Kadimiwa, ikhang na no mangwa khi khe saden.”

¹⁶Tsalina kadimiwa na ma wubvü meshibvüthu tagha teshi pi kadijjen noncca thsü kesathu ketan khe ma theghi nu kedithu mabenla ma gweghe bvüa.

¹⁷Kadimiwa nu ma nyithu tsüdi anyunutiwa teshi keten wi mathu na ajjen sakhenwa witsü ngan.

¹⁸Kadimiwa ghikehiethu na ma tuwi wa keten wi David kekhu wi kedithu tsüdila ma shiwa sala ngan. Gath wina ma niekegho süpahithu meza tugho tsü la wa,

¹⁹nu kadimiwa na mathu ccülikesawa Ittai wi khi, “No mangkesa na ithu gweghe waten nu? Wha neng nu kadimi ketheüwa gweghe benlo. No asang kesü, no diyyiwa na lenkesie wi kushinyi kesü saben.

²⁰No hewi kahang matsü keu ketan sabenthu mangkesa na no ya hi gweghe kegoedeja ben thsü nu? Hi khiewa waten khe khiela nchüle. N-nyithu ssiya nu no gweghe wha nenglo — nu Apvüwa na no tizen nu no wi jühtsentsa kesawa salo.”

²¹Isala Ittai na luneng, “Njenkeben Kadimiwa, hi keshüthangla shüle hang lela no gweghe watenle kesa hi Apvüwa nyan wina kishenben.”

²²David na luneng, “Mantsadha! Khwelo! Tsalina Ittai na ma nyithu nu ma maghaki ketenthu tsüdi ssinu wa.

²³David senkeniethu na wa keten wi anyithu na misi ntsa jisha. Kadimiwa nu ma nyithu na ma nie sen nu Kidron Kuza pvüdhi, nu mathu gweghesen aghansha wiwa wa.”

²⁴Keqhaikediwa Zadok na ciwi ben, nu Levi nyithu na ma gweghe kemetha Cenkethenjüh Khitsonwa tsü pvüden. Mathu na tsü pi ton nu anyithu na anyunutiwa npi keteshikhi chu tsü pieki neng meyala. Keqhaikediwa Abiathar la ciwi ben.

²⁵Tsaseng wi kadimiwa na Zadok wi khi, “Cenkethenjüh Khitsonwa tsü pienu anyunutiwa wi wha nenglo. Keujüla Apvüwa na hi nen lethu ma hi ya ghanan kesü kheneng gho tsü nu tsü keben pen muya thsüben.

²⁶Isala keujüla ma hi n-nenla lethu ma imiwi mangwa samvu khe saya thsülo.”

²⁷Nu ma Zadok wi khi, “Ghangchilo, ntsa Ahimaaz nu Abiathar tsa Jonathan manyi ssiya nu lebencca anyunutiwa wi wha nenglo.

²⁸Hi aghansha wi aghakughu witsü no wi jühtheü npi zakeya chu no hiebenla ben na.”

²⁹Tsalina Zadok nu Abiathar manyi na Cenkethenjüh Khitsonwa tsü khuya nu Jerusalem wi whala ciwi ben wa.

³⁰David na qai sen nu Oliv Yikha wi ki; ma accükevü nu ahathakina zensu wina ma li shanpvü. Ma nieketenthu tsüdila ali shanpvü nu qai.

³¹Ahithofel na Absalon gweghe kematang kekuli sawadha le kesa pi David kekiza wi ma kekhie sa, “O Apvüwa, Ahithofel kesansijüh tsü sapi ma men nkemi sa thsülo.”

³²David na ki kekinyipen kesü na keben yyishiphon shoni cukeya wi ma pvüshang ntsawa Arkhit nyi Hushai na ma thsümeni mezüqhe nu ayyi pi ma li wi chipvü ghola ma metu.

³³David na ma wi khi, “No hi gweghe wa lethu, hi kiqakeya mangla nmi,

³⁴isala no anyunutiwa wi kheneng whala Absalon wi no kheni jühtsentsa sa ma ba kekuli sa kegho ti nansü nten no ma kekuli satenle kekiza wina hi kiqaya mehai. Nu no saya kemehai chu Ahithofel na kesansijüh khukechi tsüdi shunlo.

³⁵Keqhaikedi keni Zadok nu Abiathar na ciwi ben; no kadijjen wi zakeya tsüdi pi manyi kizalo.

³⁶Manyi tsa keni Ahimaaz nu Jonathan na manyi gwegheben, no manyi kesunchi pi no ciwi chükeya tsüdi pi hi kizaya mehai le.”

³⁷Tsalina David pvüshangwa Hushai na Absalon ghola Jerusalem wi duya meyi ma gho anyunutiwa cuya.