Read Northern Rengma Naga 2 SAMUEL 20 Bible Online

2 SAMUEL 20 - Northern Rengma Naga bible

2 SAMUEL 20

¹ Ciwi Gilgal wi anyi yencüki nkemehai kesü Benjamin mizza wi Bikri tsa Sheba na ben. Ma tutuwa khou pi jisha nu khi, “David pashalo! Ithu na ma nie wa nten! Israel nyithu, ithu ajjen wi wha na khwelo!”

²Tsalina Israel nyithu na David teshi nu Sheba nie wa, isala Judah nyithu na jühkeya wi ben nu Jordan wina David niesen Jerusalem wi wa.

³ David na kheneng gho Jerusalem wi ma kadijjen cukeya wi ma wubvü meshibvüthu tagha teshi pi kadijjen noncca thsü kethengthu tsü ssiya, nu nyu pi mathu ghihie thsüa. Ma mathu na nsenthu keyishü pi cü, isala ma mathu nssijen. Mathu kahang chu pi makepa sa nu denyilethu ti hang thsüa.

⁴Kadimiwa na Amasa wi khi, “Wa Judah nyithu cighuya nu pitsü wi hewi ghonenglo.”

⁵Amasa na mathu cile wa, isala kadimiwa na ma kekiza tsüwi ma kheneng nghola.

⁶Tsalina kadimiwa na Abishai wi khi, “Sheba na Absalon miwi agükeccü pi ikhang cüben. Inyithu ssiya nu ma jügü walo, nyelethu, ma ikhang wina bvü wa anyuti khweti sa ketheng pahan nkaya ben na.”

⁷Tsalina Joab nyithu, kadi ghikehiethu, nu süpahi kepathu tsüdi Abishai gweghe Jerusalem teshi nu Sheba jügü wa.

⁸Mathu na wala Gibeon wi alonshi ketiwa tsü cukeya wi Amasa na gho mathu metu. Joab na njünnu pi alicen wi chipi ma geshi wi bhenkiya nu aghighe kiden pvüden. Ma atuwi keshhugho wi ma njünnu na kephenshia.

⁹Joab na Amasa wi khi, “Ipvüshangwa, kemehai saben ma?” nu ma kwen ajewa pi ma pangkenye mahhaya nu ma kimang le sa.

¹⁰Amasa na Joab ma kwen pahanwa pi njünnu khusen keten tsü nmu, nu Joab na tsüpi ma pvü kecun cüa, nu ma keghongthu na ayyi wi keji dugho. Ma wan shü, nu Joab na ma npa nengla. Tsaseng wi Joab nu ma cü nyuwa Abishai manyi na Sheba jügü wa.

¹¹Joab nyi kesü na Amasa kamang kete wi ngan nu jisha, “Anyi kesü le kesü lela Joab nu David manyi wiwa kesa mvuwa na Joab nie walo!”

¹²Amasa kamang na ajjü ketan pi alen non wi cüchi theng. Joab nyiwa na anyi tsüdila tsü kete wi gho ngan nu ghangkeben kemu wi ma kamang tsü alen wina zan sen wa alli wi chi nu sükhuthsü kesü pi tsü whengbhon.

¹³Alen wi akamang tsü piebvü kesa seng wi anyi tsüdila Joab nie sen Sheba jügü wa.

¹⁴Sheba na Israel mizza yyi tsüdi pvüdhi sen nu Abel Beth Maaka nyunutiwa wi gho, nu Bikri gei wi anyi tsüdi saghuya nu ma nie sen anyunutiwa wi dua.

¹⁵Joab nyithu na Sheba na ciwi benle kesa zakeya ghena wala anyunutiwa tsü vüya. Mathu na ayyi pvü pi akhweti na ameiwa tsü zhü nu ma cakhu witsü chhünu tsü ya khuli thsüale sa wa.

¹⁶Ciwi anyunuti wi nza kemetsa kesü na ben, ma akhweti miwi na jisha, “Kinachilo! Kinachilo! Joab kiza nu hewi gho thsülo; hi ma wi ajüh kiza mvu benle.”

¹⁷Joab na wa, nu nzawa na ma wi keü, “No Joab kwe?” Ma luneng, “Anle, hi le.” Nzawa na khi, “Kediwa, ijüh kinachilo.” Ma luneng, “Hi kina benle.”

¹⁸Nzawa na khi, “Matsü kesie wadha mathu na hati khi keten, ‘Wala Abel nyunutiwa wi nthu keluneng muyalo’ nu mathu na tsüti sa.

¹⁹Ithu nyunutiwa hana keti kesü, Israel wi kecca nu jühkeya ntsa nyunuti kesü. No mangkesa na tsü yasale saben nu? No Apvüwa ji tsü yasa mvuben kwe?”

²⁰Joab na luneng, “Khiela tsüti sa nben! Hi khiela nthu nyunutiwa yasa nbenle!

²¹Ikhang na tsüti sale kiden nben. Anyi kesü Efraim yyishiphon diyyiwa wina keghowa Bikri tsa Sheba na Kadimiwa David matangla shun shaghale. Anyi hawa ha khuchilo, isathu hi anyunutiwa wina kheneng bvüaben.” Nzawa na khi, “Ikhang na ma li pi akhweti miwi na no wi cüchi cüben na.”

²²Tsaseng wi nzawa na ma cho tsü sen anyunutiwa wi anyithu wi wa, nu mathu na Sheba li wiya nu tsüpi akhweti meiwa Joab wi cüchi cüa. Joab na ma nyithu na anyunutiwa tsü teshi yilo kesa tutuwa khouchi, nu mathu na ajjen wi whaneng. Nu Joab na Jerusalem wi kadimiwa wi whaneng.

²³Joab na Israel süpahizi wi benchüwa; Johoiada tsa Benaiya na David ghikehiethu ja wi kediwa;

²⁴Adoniram na kekuli kesathu ja wi kediwa; Ahilud tsa Jehoshafat na zhükethengthu kenonccawa;

²⁵Sheva na jühkaghatenpen wi kezhüwa; Zadok nu Abiathar na keqhaikedithu,

²⁶nu Jair nyuti wina keghowa Ira la David ghena keqhaikedi kesü sa.