Read Northern Rengma Naga 2 SAMUEL 23 Bible Online

2 SAMUEL 23 - Northern Rengma Naga bible

2 SAMUEL 23

¹Anyiza na sapi di kecüwa Jesse tsa David, Jakob Nyiza na ma kessi pi kadimiwa sa thsü, ma Israel ghena akhwi kemehai ntsathu sa kechiwa. Hathu hana David jüh sakhenthu:

²Apvüwa ghamu na hi wina khi; ma ketsijüh na ipang wi ben.

³Israel Nyizawa na khidha; Israel kekhwewa na hi wi khi: “Kadimiwa na atsentsa sen nu kadisa, ma Anyiza kemessikü wina kekhangsen,

⁴tsüna aghanen akulukeshü nkemi wi aghani na shhugho keben ti kesa, atsankegho seng wi aghani na aghang sapi wegüthsü keten tile.”

⁵Anyiza na tsüti nu sawegü pi ishicübvüghathu cüden, kepaghenanye ma hi wi anuphan ghena cenkethenjüh kesü sapi thengdha, keccünenglicen kethengwa tsü pakhhiya nben, khishikethengwa tsü kemiliya nben. Tsüthu tsüna hi nmvu ketenwa; tsüna hi khangkeyawa, nu Anyiza na tsü sengho metsiben.

⁶Isala Anyiza nkechüthu na aghazüthu pi khala kesa tsü makesü; thola akwen kevü pi tsüthu paya nben.

⁷No amighe tsanqai nyelela apie kesü nsenthu yishü; tsüthu pi mecangtha saben.

⁸Hathu hana David süpahi nyankemechan ntsathu: atuwa na Takhemon wina keghowa Josheb Basshebeth, ma “Meshu Kecheng jawi aliwa; ma apie sen nu anyi meza tazen ssisa nu aghikesa kesü wi mathu tsüdi yathikhia.

⁹Meshu Kecheng ja wi nyankemechan keniwa na Ahob gei wi Dodo tsa Eleazar. Ghanan kesü Filistinthu na saghu keben wi ma nu David na aghi nnichi. Israel nyithu na asenkheneng,

¹⁰isala ma ma pen wi ngan nu ma kwen mnankezü nu ma njünnu ghansen meyala npi kesa chu Filistinthu ssisa. Tsü ghanan Apvüwa na khangkeya keti saya. Tsü kesacen seng wi Israel nyithu na Eleazar wi kheneng gho nu keshü kamangthu wi aghighe tsü ccenya.

¹¹Meshu Kecheng ja wi nyankemechan kechengwa na Harar wina keghowa Agee tsa Shamma. Filistinthu na Lehi wi akaha lli kesü keben wi saghuben. Israel nyithu na Filistinthu tubvüa,

¹²isala Shamma na alli wi ma pen ngan nu Filistinthu kaghanineng nu mathu pathia. Tsü ghanan Apvüwa na khangkeya keti saya.

¹³Alliwwi wa keten pang wi “Meshu Changha” ja wi kecheng na David na Adullam Lonshiku wi keben ciwi cü, tsü tsüwi Filistinthu akhang kesü na Refaim Yyiketijü wi kemnanpen saben.

¹⁴Tsü tsüwi David na khweti sa ketheng yyishiphon kesü wi ben, nu Filistinthu na Bethlehem nkaya.

¹⁵David na ma jjen wi nmvuya nu khi, “O anyi pahan na wa Bethlehem kaghapeng jenka kete wi tsü atssü sengho hi jjüya thsülo kheshilan!”

¹⁶Süpahi nyankemechan kecheng hathu na Filistinthu kemnanpen tsü pvüghe dula atssükhang wi tsü atssü ssuya nu sengho David cü. Isala ma tsü njjüla meyisha pi Apvüwa wi kekinyi kesü sa,

¹⁷nu khi, “Apvüwa, hi khiela hawa ha jjüya nten! Ha anyi mathu kahang khuchi nu kewathu jjü jjükeben ti saben le!” Tsalina ma tsü njjü mvula. Tsüthu tsüna süpahi nyankemechan kecheng kempvüza kekulithu.

¹⁸Joab cünyuwa Abishai (manyi jja na Zeruiya) na “Kemechan Meshu Changha ja wi nyankemechanwa saya.

¹⁹Ma “Meshu Changha” ja wi nyankemechan ntsawa saya nu mathu liwa saya, isala “Meshu Kecheng” ja wi nyankemechanwa ti sa meya.

²⁰Kabzeel wina keghowa Jehoiada tsa Benaiya na kepa wi süpahi nyankemechan kesü; ma kempvüza kekuli kejonla sa, nu Moab nyi aghikekhang ntsathu keni qho pathia. Ma kuti aghola keca ghanan kesü wi ayyiku kesü wi dula ssensitemi kesü pathia.

²¹Ma Ejipt nyi ketikesie kesü na apie khusen ketenwa tsü la pathia. Benaiya na adajen sen wa ma ssikaghashen nu Ejipt nyiwa kwen wi apie tsü chenya, nu tsüpi ma yathia.

²²Hathu hana “Meshu Changha” ja wi meshu kesüwa, Benaiya na kempvüza kekulithu.

²³Ma mathu ja wi nyankemechan kesü, isala ma “Meshu Kecheng” ja wi nyankemechanwa ti sa meya. David na Benaiya pi ma ghikehie ja wi kediwa sa thsü.

²⁴“Meshu Changha” ja wi anyi kepathu na hathu: Joab cünyuwa Asahel Bethlehem wina keghowa Dodo tsa Elhanan Harod wina keghowa Elika nu Shamma Pelet wina keghowa Helez Tekoa wina keghowa Ikkesh tsa Ira Anathoth wina keghowa Abiezer Hushab wina keghowa Mebunnai Aho wina keghowa Zalmon Netofa wina keghowa Maharai Netofa wina keghowa Baanah tsa Heleb Benjamin nyi Gibea wina keghowa Ribai tsa Ittai Pirathon wina keghowa Benaiya Gaash yyiketijü kete wina keghowa Hiddai Araba wina keghowa Abialbon Bahurim wina keghowa Azmaveth Shaalbon wina keghowa Eliaba Jashen tsathu Jonathan Harar wina keghowa Shamma Harar wina keghowa Shara tsa Ahiam Maaka wina keghowa Ahasbai tsa Elifelet Gilo wina keghowa Ahithofel tsa Eliam Karmel wina keghowa Hezro Arab wina keghowa Paarai Zoba wina keghowa Nathan tsa Igal Gad wina keghowa Bani Ammon wina keghowa Zelek Beeroth wina gho Joab ghighe kep(...)