Read Northern Rengma Naga 2 SAMUEL 5 Bible Online

2 SAMUEL 5 - Northern Rengma Naga bible

2 SAMUEL 5

¹Tsaseng wi Israel mizza tsüdi Hebron wi David wi wa ma wi khi, “Ithu na asajjü kesütan.

²Kheni Saul na kadimiwa sa keben tsü wi lela no aghi wi Israel nyi ssi, nu Apvüwa na no wina ma nyithu ssinu mathu miwi kekhang kesenwa saten kesa khishichi le.”

³Tsalina Israel ccülikesathu tsüdila Hebron wi Kadimiwa David wi gho. Ma mathu ssinu cenkethenjüh kesü sa, nu mathu na adeli pi ma nyen cü nu ma Israel kadimiwa saya.

⁴David na ma kahang mapi changha sakeben wi kadimiwa saya, nu ma amapi jügha kekhang senya.

⁵Ma amapi tagü nu pahan Hebron wi ben nu Judah miwi kekhangsen, nu Jerusalem wi ben nu Israel nu Judah maben miwi amapi changha nu kecheng kekhangsen.

⁶ Kadimiwa David nu ma nyithu na shula Jerusalem ssikaghashen keten matsü na gho. Jebus nyi ciwi hang kebenthu kemeshen na David na mathu nyunutiwa tsü nkaya nben, tsalina mathu na ma wi khi, “Nthu na khiewila hewi dughoya nben; anyon nkemu nu accü nkemehaithu lela nthu jügüpiya mehai le.”

⁷(Isala David na mathu Zion khweti tsü nkaya nu tsüpi “David Nyunutiwa” le cia.)

⁸Tsü ghanan David na ma nyithu wi khi, “Hewi thowa na hi ti Jebus nyithu nanmeghü ben nu? Wala mathu pathiya mehai ma? Isalethu, atssülen witsü na shula anyon nkemu nu accü nkemehaithu tsü ssikaghashenlo.” (Tsü jjügi ghena “Anyon nkemu nu accü nkemhaithu na Apvüwa jjen wi duya nben” le khia.)

⁹Akhwetiwa tsü nkakeya seng wi David na ciwi hang nu tsü nyan pi “David Nyunutiwa” isa cia. Ma anyunuti tsü khwetivü, tsüna yyishiphon na nishuwa ayyi pvüpi kechipen wina sa sen nu shu.

¹⁰Apvüwa, Anyiza Kekhang ntsawa na ma ssiketen ghena ma matsü tsüdi wila khang pfüpfü sa.

¹¹Tur wi kadimiwa Hiram na hathu kesun pi David cü: nyilothu, sedar chankedhithu, achan- kecüthu, nu alonkahathu; mathu na David kadijjenwa tsü sa.

¹²Tsalina David na Apvüwa na ma sapi Israel miwi kadimiwa sa thsü nu ma nyithu ghena ma kadiyyi sapi mehai kayi waya thsü benle kesa chüya.

¹³Hebron wina Jerusalem wi kewa seng wi David na awubvü nu meshibvüthu jikayi yaya nu atsangathu shapfü benya.

¹⁴Jerusalem wi atsanga hathu pvügha pi ma cü: Shammuya, Shoba, Nathan. Solomon,

¹⁵Ibhar, Elishua, Nefeg, Jafia,

¹⁶Elishama, Eliada, nu Elifelet.

¹⁷David sapi Israel kadimiwa sa thsüdhale kesa nyu na Filistinthu kiza, tsalina mathu süpahizithu na ma ghanyale lentsen wa. David na tsü zakeya wi ma akhweti sapi vüketheng pen witsü wa.

¹⁸Filistinthu na gho Refaim Yyiketijü cuya nu tsü nkaya.

¹⁹David na Apvüwa wi keü, “Hi wala Filistinthu ssikaghashenla khati sa nu? No khangkeya pi hi cübenla nu?” Apvüwa na luneng, “Anlo, no wa mathu ssisalo. Hi khangkeya pi no cüben na!”

²⁰Tsalina David na Baal Perazim wi wa ma ciwi Filistinthu chaya. Ma khi, “Apvüwa na ighinyithu pi atssüdan kepvüssi ti pakhhi cüdha.” Tsalina apen tsü nyan pi Baal Perazim[1] cia.

²¹Filistinthu na mathu ji tsikezhüthu tsü teshi nu bvüa; David nu ma nyithu na tsüthu pvü nu bvüa.

²²Filistinthu na wala Refaim Yyiketijü tsü nka nengya.

²³David na kheneng Apvüwa wi keü, nu Apvüwa na luneng, “Hewi na wala mathu nssisa lalo, isala vü wala mathu seng wa Balsam chantonthu kete wina mathu ssikaghashen le kidenyalo.

²⁴No khathansha wi achanton shonithu wi lenketsen hhai zaya khe wala mathu ssikaghashen lo, kepaghenanye hi nthu tuwi na wa Filistin süpahithu tsü chayaden.”

²⁵David na Apvüwa kekhi ti sa, nu ma Geba wina Filistinthu jügü neng pi Gezer kecu wi chia.