Read Northern Rengma Naga 2 SAMUEL 7 Bible Online

2 SAMUEL 7 - Northern Rengma Naga bible

2 SAMUEL 7

¹Kadimiwa David na kadipen wi benya, nu Apvüwa na ma pi ma ghinyithu tsüdi tuwi yazishu ben thsüa.

²Tsaseng wi kadimiwa na atusenjüh-kechüwa Nathan wi khi, “Hi hewi sedar chan pi kesa jjen wi hangben isala Anyiza Cenkethenjüh Khitsonwa tsü pi nithsüjjen kesü wi chitheng le.”

³Nathan na luneng, “Apvüwa na no ssiketen ghena no nleben wi mangwa ben khe sayalo.”

⁴Isala tsü ghaja Apvüwa na Nathan wi khi,

⁵“Wala imaghawa David wi hi hati ma wi khibenle kizalo, ‘No hi ya hang thsüle kesa ghena kekinyijjen kesü tsü sa nben.

⁶Hi Ejipt wina Israel nyithu kekashakeya nten na gho nansü kecu hi khiela kekinyijjen kesü wila nhang; hi kegoela nithsüjjen kesü wi hangden.

⁷Hi Israel nyithu gweghe kijünyi kewa ha tsüdi hi mathu pi accülithu[4] sa thsü kesathu wi hi khiela mathu mangkesa na sedar chan pi ighena kekinyijjen kesü nsanu kesa nkeü.’

⁸“Tsalina hi Kekhang ntsawa Apvüwa na imaghawa David wi hati khibenle ma kizalo, ‘Hi no alli wi khaghaneni hieketen ssigho no pi Israel nyithu miwi kekhang kesenwa sa thsü.

⁹Nu hi no khiewa wa khe no ssigho, nu no atujügüwathu hi nghinyithu tsüdila chaya. Hi no sapi ayyi wi ccülikesa nyankemechan ntsathu ti sa thsüden.

¹⁰Hi inyi Israel nyithu ghena apen kesü kessiya nu mathu pi ciwi ben thsüa, mathu ciwi nyu na mathu kepasha nmila hang benden. Mathu na ayyi hewi dughoya meyi anyi yasayalathu na mathu ssikaghashen, isala hati ha nsa nengdha. Hi nghinyithu tsüdi tuwi apvü-nkesa pi no nu nshicübvüghathu cütenle khishiben.

¹²No shü nu pi nbamyithu gweghe kevhü seng wi hi ntsathu ja wi kesü pi kadimiwa sa thsü nu ma kadiyyi ya zü ntsa sa thsüden.

¹³Ma ighena kekinyijjen kesü sa ketenwa tsüle, nu hi ma kadishi tsü sapi anuphanla ben thsü metsiden.

¹⁴ Hi ma ba sa nu ma itsawa saden. Ma khathansha wi sazzi khe aba kesü na atsawa kesansi ti hi ma meten cüden. [5]

¹⁵Isala hi Saul khupi nu no pi kadimiwa sa thsü kesa ti ma wi tsü hi kaghaliwa tsü khunengya nben.

¹⁶ No keshüthangla ashicübvüghathu benben, nu hi no kadiyyi sapi anuphan ben thsü- den. No kadishi na khiela asakhen sa nben.’ ”

¹⁷Nathan na Anyiza pi ma keccüca tsüdi khipi David kiza.

¹⁸Kadimiwa David na Apvüwa ketenpen Nithsüjjen wi du donki nu kekhie sa, “O, Kemisintsa Apvüwa, hi nu itheghi lela no ighena sa kechi tsü meya qole.

¹⁹Isala no tsümiwi la saben, Kemisintsa Apvüwa; no ghaketen mapithu wi ishicübvüghathu ghena khishichidha. Nu no anyi kesü yala ha muya thsüdha. [6] Kemisintsa Apvüwa!

²⁰Hi tsü miwi mangwa le no kiza yadha nu! No nmaghawa cüki chüben.

²¹Tsüwa tsü no kemeshen nu kenen wina sa; no hi kecükegwe chile kesalina pala keti hathu tsüdi sa chidha.

²²No khatila di nu, Kemisintsa Apvüwa! Ciwi no ti kesa kesüla nmi; ithu na keshüthangla no ketan Anyiza le kesa chüben.

²³ Ciwi Israel ti kesa mizzatenti kepa wi nmi, no nyu nssümagha kesa wina mathu kekasha pi n-nyithu sayadha. No mathu [7] ghena amankesa keti kuli kechi tsüna ayyi tsüdi wi n-nyankethang sa chidha. No Ejipt wina ssi shhugho n-nyithu saya kesathu na atujügüwathu mizzatenti kepathu nu mathu cenpvüthu jügüshi [8] cü.

²⁴Anuphan ghena no Israel pi n-nyi saya, nu no Apvüwa, mathu Nyiza sayadha.”

²⁵Apvüwa Anyiza, khili no hi nu ishicübvüghathu ghena khishi ketheng tsüdi sacen, nu no mangwa sale khitheng khe sayalo.

²⁶N-nyankemechan na di ntsa, nu anyithu na anuphanla “Kekhang ntsawa Apvüwa Anyiza na Israel miwi benle” khiden. Nu no matsü tsüdi wila hi kadishi tsü nonccaben.

²⁷Apvüwa Kekhang ntsawa, Israel Nyiza! Hi kempvüza sala no wi kekhie ha saya mehaidha, kepaghenanye no ha tsüdi pi nmaghawa hi ccücadha, nu no ishicübvüghathu pi kadimithu sa thsü benle kesa hi kizadha.

²⁸“Nu khili, Apvüwa Kemisintsa, no Anyiza le; no keshüthangla khishi ketheng tsü saden, nu no hi wi amankesa khishikechi ha sadha.

²⁹Ishicübvüghathu na no kenen benkiya thsüle kesalina no sawegü pi mathu cülo kesa hi no wi khieben. O Kemisintsa Apvüwa, no ha khishichidha, nu no kesawegü na anuphanla ishicübvüghathu miwi benden.”